മാക്വാരി സർവകലാശാലാ സ്കോളർഷിപ്പ്; അന്താരാഷ്ട്ര വിദ്യാർഥികൾക്ക് 50,000 ഓസ്ട്രേലിയൻ ഡോളർ വരെ ട്യൂഷൻ ഫീസ് ഇളവ്
ഓസ്ട്രേലിയയിലെ മാക്വറി യൂണിവേഴ്സിറ്റി (Macquarie University) ബിരുദ, ബിരുദാനന്തര വിദ്യാർഥികൾക്കായി വൈസ് ചാൻസലറുടെ അന്താരാഷ്ട്ര സ്കോളർഷിപ്പ് പ്രഖ്യാപിച്ചു. മികച്ച അക്കാദമിക് നിലവാരം പുലർത്തുന്ന വിദ്യാർഥികൾക്ക് ട്യൂഷൻ ഫീസിൽ 50,000 ഓസ്ട്രേലിയൻ ഡോളർ (AUD) വരെ ഇളവ് ഈ സ്കോളർഷിപ്പിലൂടെ ലഭിക്കും.
ഇന്ത്യ എർലി അക്സപ്റ്റൻസ് സ്കോളർഷിപ്പ് വഴി 40,000 AUD വരെയും, വൈസ് ചാൻസലറുടെ അന്താരാഷ്ട്ര സ്കോളർഷിപ്പ് വഴി അധികമായി 10,000 AUD യും വിദ്യാർഥികൾക്ക് നേടാനാകും.
സ്കോളർഷിപ്പിനുള്ള പ്രധാന യോഗ്യതാ മാനദണ്ഡങ്ങൾ
- ലെറ്റർ ഓഫ് ഓഫർ സ്വീകരിച്ച് സമയപരിധിക്കുള്ളിൽ കമൻസ്മെൻ്റ് ഫീസ് അടച്ചിരിക്കണം.
- മുഴുവൻ ട്യൂഷൻ ഫീസും വഹിക്കുന്ന ഏതെങ്കിലും സർക്കാർ സ്പോൺസർഷിപ്പിന്റെയോ സ്കോളർഷിപ്പിന്റെയോ ഗുണഭോക്താവായിരിക്കരുത്, മാക്വാരി യൂണിവേഴ്സിറ്റി സ്കോളർഷിപ്പ് ടീം അംഗീകരിച്ചാൽ മാത്രമേ ഇതിന് ഇളവുള്ളൂ.
- അപേക്ഷകർ ഫുൾ ടൈം അന്താരാഷ്ട്ര വിദ്യാർഥിയായിരിക്കണം.
- ബിരുദ കോഴ്സുകൾക്കോ ബിരുദാനന്തര കോഴ്സുകൾക്കോ (ഗ്രാജ്വേറ്റ് സർട്ടിഫിക്കറ്റുകൾ ഒഴികെ) ചേരുന്നവരായിരിക്കണം.
ബിരുദാനന്തര കോഴ്സുകൾക്ക് അപേക്ഷിക്കുന്നവർക്ക് കുറഞ്ഞത് 65-ന് തുല്യമായ വെയ്റ്റഡ് ആവറേജ് മാർക്ക് (WAM) ഉണ്ടായിരിക്കണം. അതേസമയം, ബിരുദ കോഴ്സുകൾക്ക് അപേക്ഷിക്കുന്നവർക്ക് കുറഞ്ഞത് 85-ന് തുല്യമായ ഓസ്ട്രേലിയൻ ടെറിട്ടറി അഡ്മിഷൻ റാങ്ക് (ATAR) ഉണ്ടായിരിക്കണം. വിദ്യാർഥികൾ അവരുടെ സ്കോളർഷിപ്പ് ഓഫർ ലെറ്ററിൽ വ്യക്തമാക്കിയിട്ടുള്ള സെഷനിലും വർഷത്തിലും തന്നെ പഠനം ആരംഭിക്കേണ്ടതുണ്ട്.
Content Highlights: Macquarie University offers Vice-Chancellor`s International Scholarships up to AUD $50,000 for undergraduate & postgraduate students. Apply now!