പൊതുവിദ്യാലയങ്ങളിൽ കുട്ടികൾ കുറയുന്നു; അൺ എയ്ഡഡിൽ വർധന

തിരുവനന്തപുരം: ഈ അധ്യയനവർഷം പൊതുവിദ്യാലയങ്ങളിൽ 1,31,368 വിദ്യാർഥികളുടെ കുറവ്. സ്കൂൾ തുറന്ന്, സർക്കാർ ആറാം പ്രവൃത്തിദിനത്തിലെ കണക്കെടുത്തപ്പോഴാണ് ഈ കണ്ടെത്തൽ. 2025-26 അധ്യയനവർഷം പൊതുവിദ്യാലയങ്ങളിൽ 31,61,989 കുട്ടികളുണ്ടായിരുന്നു. ഈ വർഷം 30,30,621 ആയി.

അതേസമയം, അൺ എയ്ഡഡ് സ്കൂളിൽ 7860 വിദ്യാർഥികൾ കൂടി. എന്നാൽ, അൺ എയ്ഡഡ് ഉൾപ്പെടെയുള്ള വിദ്യാലയങ്ങളിൽ ഇത്തവണ ഒന്നാം ക്ലാസിൽ ചേർന്നവരുടെ എണ്ണം കുറഞ്ഞെന്നാണ് കണക്കുകൾ. 2025-26 അധ്യയനവർഷം ഒന്നാംക്ലാസിൽ 2,82,339 കുട്ടികൾ ചേർന്നിരുന്നു. ഈ അധ്യയനവർഷം 2,50,858. ആകെ 31,481 കുട്ടികളുടെ കുറവ്.

മറ്റുക്ലാസുകളെടുത്താൽ എയ്ഡഡ് സ്കൂളിൽ മൂന്നിലും പത്തിലും മാത്രമേ മുൻവർഷത്തെക്കാൾ കുട്ടികൾ കൂടിയിട്ടുള്ളൂ. മൂന്നിൽ-2109 കുട്ടികളും പത്തിൽ 4803 കുട്ടികളും കൂടി.

സർക്കാർ സ്കൂളിൽ പത്താം ക്ലാസിലേ വർധനയുള്ളൂ-939 കുട്ടികൾ. അൺഎയ്ഡഡ് സ്കൂളിലാവട്ടെ ഒന്ന്, രണ്ട്, അഞ്ച് എന്നിവയിലൊഴികെ മറ്റെല്ലാ ക്ലാസിലും മുൻവർഷത്തെക്കാൾ കുട്ടികൾ കൂടി.

അങ്ങനെയാണ് അൺ എയ്ഡഡ് വിദ്യാലയങ്ങളിൽ മൊത്തം കുട്ടികൾ കൂടിയതെന്നാണ് കണക്കുകൾ.

Content Highlights: The official sixth-working-day school census in Kerala reveals a significant decline of over 1.31 lakh students in public schools for the 2026-27 academic year, even as unaided schools recorded an increase in enrollment.