ആയുഷ് യു.ജി. കേന്ദ്ര കൗൺസലിങ് മൂന്നാംറൗണ്ട് ചോയ്‌സ് ഫില്ലിങ് 14 വരെ
ബിരുദതല ആയുർവേദം, യുനാനി, സിദ്ധ, ഹോമിയോപ്പതി, ആയുർവേദ ഫാർമസി കോഴ്സുകളിലെ അഖിലേന്ത്യാ കൗൺസലിങ്ങിന്റെ മൂന്നാംറൗണ്ട് നടപടികൾ aaccc.gov.in ൽ ആരംഭിച്ചു. ആയുഷ് അഡ്മിഷൻസ് സെൻട്രൽ കൗൺസലിങ് കമ്മിറ്റി (എ.എ.സി.സി.സി.) നടത്തുന്ന കൗൺസലിങ്ങിലേക്ക് പുതിയ രജിസ്‌ട്രേഷന് (ബാധകമെങ്കിൽ), ഒക്ടോബർ 14-ന് ഉച്ചയ്ക്ക് രണ്ടുവരെ സൗകര്യമുണ്ടാകും. പണം അടയ്ക്കേണ്ടവർക്ക് അതിനുള്ള അവസരം അതേദിവസം വൈകീട്ട് അഞ്ചുവരെ ലഭിക്കും. ചോയ്‌സ് ഫില്ലിങ് 10 മുതൽ 14-ന് രാത്രി 11.55 വരെ നടത്താം. ചോയ്‌സ് ലോക്കിങ് 14-ന് ഉച്ചയ്ക്ക് രണ്ടുമുതൽ അന്ന് രാത്രി 11.55 വരെയും.
മൂന്നാംറൗണ്ട് അലോട്‌മെന്റ് ഫലം 17-ന് പ്രസിദ്ധപ്പെടുത്തും. സ്ഥാപനത്തിൽ പ്രവേശനം നേടാൻ 18 മുതൽ 22 വരെ സമയം ലഭിക്കും.
മൂന്നാംറൗണ്ടിൽ പങ്കെടുക്കാൻ അർഹതയുള്ളവർ
• നീറ്റ് യു.ജി. 2024 യോഗ്യത നേടിയ, ഈ കൗൺസിലിങ്ങിന്റെ ആദ്യ രണ്ടു റൗണ്ടുകളിൽ രജിസ്റ്റർ ചെയ്യാത്തവർ
• രജിസ്റ്റർചെയ്ത് ആദ്യ രണ്ടുറൗണ്ടുകളിൽ പങ്കെടുത്ത്, രണ്ടിലും സീറ്റ് ലഭിക്കാത്തവർ. ഇവർ പുതിയ രജിസ്‌ട്രേഷൻ നടത്തേണ്ടതില്ല.
• ആദ്യറൗണ്ടിൽ സീറ്റ് ലഭിച്ച്, സ്ഥാപനത്തിൽ പ്രവേശനം നേടാതെ ഫ്രീ എക്സിറ്റ് എടുത്തവർ. ഇവരും പുതിയ രജിസ്‌ട്രേഷൻ നടത്തേണ്ടതില്ല.
• ആദ്യറൗണ്ടിൽ പ്രവേശനം നേടി, രണ്ടാംറൗണ്ട് അന്തിമഫലം പ്രഖ്യാപിച്ച തീയതിവരെ (ഫലപ്രഖ്യാപന തീയതി ഒഴികെ) ഫ്രീ എക്സിറ്റ് എടുത്തവർ
• ആദ്യറൗണ്ട് പ്രവേശനമെടുത്ത, രണ്ടാംറൗണ്ടിൽ അപ്ഗ്രഡേഷൻ ലഭിക്കാത്തവർ
• ആദ്യറൗണ്ട് പ്രവേശനമെടുത്ത, രണ്ടാംറൗണ്ടിൽ അപ്ഗ്രഡേഷൻ ലഭിക്കാതെ, റൗണ്ട് മൂന്ന് നടപടികൾ ആരംഭിക്കുന്ന ദിവസത്തിന് മൂന്നുദിവസം മുമ്പുവരെ കൗൺസലിങ് ഫീ നഷ്ടപ്പെടുത്തി എക്സിറ്റ് എടുത്തവർ. ഇവർ കൗൺസലിങ് ഫീ പൂർണമായും അടയ്ക്കണം
• ആദ്യറൗണ്ട് പ്രവേശനം നേടി രണ്ടാംറൗണ്ടിലേക്ക് അപ്ഗ്രഡേഷൻ ഓപ്റ്റ് ചെയ്തെങ്കിലും രണ്ടാംറൗണ്ടിൽ പങ്കെടുക്കാത്തവർ.
• രണ്ടാംറൗണ്ട് സീറ്റിൽ പ്രവേശനം നേടി മൂന്നാംറൗണ്ടിലേക്ക് അപ്ഗ്രഡേഷൻ ഓപ്ഷൻ നൽകിയവർ.
• രണ്ടാംറൗണ്ട് അലോട്‌മെന്റ് പ്രകാരം പ്രവേശനം നേടാതെ കൗൺസലിങ് ഫീസ് നഷ്ടപ്പെടുത്തി എക്സിറ്റ് എടുത്തവർ. ഇവർ കൗൺസലിങ് ഫീ പൂർണമായും അടയ്ക്കണം
• രണ്ടാംറൗണ്ട് പ്രവേശനമെടുത്തശേഷം, റൗണ്ട് മൂന്ന് നടപടികൾ ആരംഭിക്കുന്ന ദിവസത്തിന് മൂന്നുദിവസംമുമ്പുവരെ കൗൺസലിങ് ഫീ നഷ്ടപ്പെടുത്തി എക്സിറ്റ് എടുത്തവർ. ഇവർ കൗൺസലിങ് ഫീ പൂർണമായും അടയ്ക്കണം.
രണ്ടാംറൗണ്ട് പ്രവേശനം നേടിയവർക്ക് വ്യവസ്ഥകളോടെ ഇനിയും എക്സിറ്റ് ചെയ്യാം.
16-ന് വൈകീട്ട് അഞ്ചുവരെ എക്സിറ്റ് ചെയ്യുന്നവർക്ക്, കൗൺസലിങ് ഫീ നഷ്ടപ്പെടും. അവർക്ക് എ.എ.സി.സി.സി. കൗൺസലിങ്ങിൽ തുടർന്ന് പങ്കെടുക്കാൻ കഴിയില്ല. പക്ഷേ, സ്റ്റേറ്റ്/യൂണിയൻ ടെറിട്ടറി കൗൺസലിങ്ങിൽ തുടർന്നും പങ്കെടുക്കാം.
രണ്ടാംറൗണ്ട് പ്രവേശനത്തിൽനിന്നും 17-ന് മുതൽ എക്സിറ്റ് ചെയ്യുന്നവർക്കും കൗൺസലിങ് ഫീ നഷ്ടപ്പെടും. അവർക്ക്, എ.എ.സി.സി.സി. കൗൺസലിങ്ങിലോ സ്റ്റേറ്റ്/യൂണിയൻ ടെറിട്ടറി കൗൺസലിങ്ങിലോ തുടർന്നു പങ്കെടുക്കാൻ കഴിയില്ല.
അറിയിപ്പുകൾ വെബ്‌സൈറ്റിൽ ലഭ്യമാണ്. മൂന്നാംറൗണ്ടിന്റെ അർഹത സംബന്ധിച്ച വിശദമായ വ്യവസ്ഥകൾ, മൂന്നാംറൗണ്ട് റിപ്പോർട്ടിങ് വ്യവസ്ഥകൾ തുടങ്ങിയവ, വെബ്‌സൈറ്റിലെ ഇൻഫർമേഷൻ ബുള്ളറ്റിൻ, കൗൺസലിങ് സ്‌കീം 2024, എഫ്.എ.ക്യു. എന്നിവയിൽ ലഭിക്കും.
Content Highlights: ayush ug central counselling third round choice filling