വൃദ്ധസദനം നടത്തി തട്ടിപ്പ്: വിദേശത്തേക്ക് കടന്ന പ്രതി പിടിയിൽ; അറസ്റ്റിലായത് വിമാനത്താവളത്തിൽവെച്ച്

തൊടുപുഴ: വൃദ്ധസദനം തുടങ്ങി, അന്തേവാസികളിൽനിന്ന് ലക്ഷങ്ങൾ തട്ടിയെടുത്ത് വിദേശത്തേക്ക് മുങ്ങിയെന്ന കേസിൽ പ്രതി പിടിയിൽ. തൊടുപുഴ കാളിയാർ മേടക്കൽ വീട്ടിൽ ജീവൻ തോമസി(40)നെയാണ് തൊടുപുഴ പോലീസ് ബെംഗളൂരു അന്താരാഷ്ട്ര വിമാനത്താവളത്തിൽനിന്ന് അറസ്റ്റുചെയ്തത്.

ആജീവനാന്തം പൂർണ ഉത്തരവാദിത്വത്തോടെ സംരക്ഷിക്കാമെന്ന് ഉറപ്പുനൽകി ഭീമമായ തുക വാങ്ങി വയോധികരെയും ഭിന്നശേഷിക്കാരെയും വൃദ്ധസദനത്തിൽ പ്രവേശിപ്പിച്ചശേഷം ഇയാൾ വിദേശത്ത് കടക്കുകയായിരുന്നു. മൂന്ന് പരാതിയിലാണ് ഇപ്പോൾ കേസ് രജിസ്റ്റർ ചെയ്തിരിക്കുന്നത്.

തൊടുപുഴയ്ക്കുസമീപം മുതലക്കോടത്താണ് ‘എൽഡർ ഗാർഡൻ ഓൾഡ് ഏജ് ഹോം’ എന്നപേരിൽ ഇയാൾ വൃദ്ധസദനം തുടങ്ങിയത്. സ്ഥാപനത്തിൽ എല്ലാ അംഗീകാരവും രേഖകളുമുണ്ടെന്ന് വിശ്വസിപ്പിച്ച് അന്തേവാസികളെ ചേർത്തു. അഞ്ചുമുതൽ 15 ലക്ഷംവരെയാണ് ഈടാക്കിയത്. ആദ്യഘട്ടത്തിൽ പ്രശ്നമില്ലാതെ പോയി. 2025 ആദ്യം ജീവൻ അയർലൻഡിലേക്ക് മുങ്ങി.

നല്ല ആഹാരവും ചികിത്സയും പരിചരണവുമില്ലാതെ വയോധികരും ഭിന്നശേഷിക്കാരുമുൾപ്പെടെയുള്ള അന്തേവാസികൾ കടുത്ത ദുരിതത്തിലായി. വയോധികർക്ക് സാന്ത്വനപരിചരണമോ ആരോഗ്യശുശ്രൂഷകളോ ഒന്നും ലഭിച്ചില്ല. തുടർന്ന് പോലീസും നഗരസഭയും ഇടപെട്ടു. അന്വേഷിച്ചപ്പോഴാണ്, മതിയായ രജിസ്ട്രേഷൻ നടപടികൾപോലും സ്ഥാപനം പൂർത്തിയാക്കിയിരുന്നില്ലെന്ന് മനസ്സിലായത്.

വിശ്വാസവഞ്ചന, ചതി, സ്വത്ത് തട്ടിയെടുക്കൽ എന്നീ വകുപ്പുകൾപ്രകാരം കേസെടുത്തു. പ്രതിക്കെതിരേ പോലീസ് ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. ശനിയാഴ്ച അയർലൻഡിൽനിന്ന് കുടുംബസമേതം ബെംഗളൂരു എയർപോർട്ടിലെത്തിയ പ്രതിയെ ഇമിഗ്രേഷൻ ഉദ്യോഗസ്ഥരാണ് തടഞ്ഞത്. തുടർന്ന് തൊടുപുഴ പോലീസിന് വിവരം കൈമാറി. തൊടുപുഴയിൽനിന്നുള്ള പോലീസ്‌സംഘം ബെംഗളൂരുവിലെത്തി അറസ്റ്റുചെയ്യുകയായിരുന്നു.

സമാനരീതിയിൽ പാലക്കാട്ടും തട്ടിപ്പ്

ജീവൻ തോമസ് സമാനരീതിയിൽ അനധികൃതമായി ‘സൗപർണിക ഓൾഡ് ഏജ് ഹോം’ എന്നപേരിൽ പാലക്കാട്ടും വൃദ്ധസദനം നടത്തിയിരുന്നു. എന്നാൽ, ലൈസൻസും അനുബന്ധരേഖകളും ഇല്ലാത്തതിനെത്തുടർന്ന് പാലക്കാട്ടെ വൃദ്ധസദനം പൂട്ടിപ്പോയി.

അതിനാൽ, അവിടെയുണ്ടായിരുന്ന ഒരാളെ തൊടുപുഴ മുതലക്കോടത്തെ വൃദ്ധസദനത്തിൽ പാർപ്പിക്കുകയായിരുന്നു. ഈ അന്തേവാസിയും പരാതി നൽകിയിട്ടുണ്ട്.

Content Highlights: Jeevan Thomas arrested for defrauding elderly and disabled residents of lakhs. The operator fled to Ireland in early 2025 after collecting large sums under false pretenses. The Thodupuzha facility lacked proper registration and provided inadequate care. A lookout notice led to his detention by immigration officials at Bengaluru Airport. The accused was previously involved in a similar illegal facility in Palakkad.