കാറിന്റെ EMI അടയ്ക്കാന് പണംവേണം; ഭാര്യയുടെ ഒളിക്യാമറദൃശ്യം പകര്ത്തി ഭീഷണി; ഭര്ത്താവിനെതിരേ കേസ്
മുംബൈ: ഭാര്യയുടെ കുളിമുറി ദൃശ്യം പകര്ത്തി ഭീഷണിപ്പെടുത്തിയെന്ന പരാതിയില് പുണെയിലെ സര്ക്കാര് ജീവനക്കാരനെതിരേ പോലീസ് കേസെടുത്തു. ഇതിനുപുറമേ ഗാര്ഹിക, സ്ത്രീധന പീഡനക്കുറ്റങ്ങളും പ്രതിക്കെതിരേ ചുമത്തിയിട്ടുണ്ട്. സര്ക്കാര് ജീവനക്കാരിയായ ഭാര്യയുടെ പരാതിയിലാണ് നടപടി.
ഭര്ത്താവും ഇയാളുടെ കുടുംബാംഗങ്ങളും സ്ത്രീധനത്തിന്റെ പേരില് നിരന്തരം ഉപദ്രവിച്ചെന്നും ഇതിനുപുറമേയാണ് രഹസ്യദൃശ്യങ്ങള് പകര്ത്തി പണം ആവശ്യപ്പെട്ട് ഭീഷണിപ്പെടുത്തിയതെന്നുമാണ് പരാതിക്കാരിയുടെ ആരോപണം. 2020-ലാണ് ഇരുവരും വിവാഹിതരായത്. വിവാഹത്തിന് പിന്നാലെ തന്നെ ഭര്ത്താവ് സംശയത്തിന്റെ പേരില് ശാരീരികമായും മാനസികമായും ഉപദ്രവം ആരംഭിച്ചെന്നും പരാതിക്കാരി പറയുന്നു. ഭര്ത്താവും ഭര്ത്താവിന്റെ വീട്ടുകാരും കൂടുതല് സ്ത്രീധനം ആവശ്യപ്പെട്ടും ഉപദ്രവിച്ചു. സ്ത്രീധനമായി കൂടുതല് പണവും കാറും വേണമെന്നാണ് ഇവര് ആവശ്യപ്പെട്ടിരുന്നതെന്നും പരാതിക്കാരി ആരോപിച്ചു.
തന്നെ നിരീക്ഷിക്കാനായി വീട്ടിലെ പലയിടങ്ങളിലും ഭര്ത്താവ് ഒളിക്യാമറകള് സ്ഥാപിച്ചു. കുളിമുറിയിലടക്കം ഒളിക്യാമറ സ്ഥാപിച്ച് ദൃശ്യങ്ങള് പകര്ത്തി. ജോലിസ്ഥലത്തുപോലും തന്നെ നിരീക്ഷിക്കാനെത്തി. പിന്നീട് കാര്, ഭവന വായ്പകള് അടയ്ക്കാനായി ഒന്നരലക്ഷം രൂപ ആവശ്യപ്പെട്ടു. പണം നല്കിയില്ലെങ്കില് കുളിമുറിദൃശ്യങ്ങള് പുറത്തുവിടുമെന്നാണ് ഭര്ത്താവ് ഭീഷണിപ്പെടുത്തിയതെന്നും സ്ത്രീയുടെ പരാതിയിലുണ്ട്.
യുവതിയുടെ പരാതിയില് ഭര്ത്താവിനും ഇയാളുടെ കുടുംബാംഗങ്ങളായ ഏഴുപേര്ക്കുമെതിരേ കേസെടുത്തതായി പോലീസ് അറിയിച്ചു. അതേസമയം, ആരുടെയും അറസ്റ്റ് രേഖപ്പെടുത്തിയിട്ടില്ല. നിലവില് വീട്ടിലെ നിരീക്ഷണക്യാമറകളിലെ ദൃശ്യങ്ങള് പരിശോധിച്ചുവരികയാണ്. യുവതിയുടെ ആരോപണങ്ങളിലും വിശദമായ അന്വേഷണം നടത്തുന്നുണ്ട്. ഈ അന്വേഷണത്തില് ലഭിക്കുന്ന തെളിവുകളുടെ അടിസ്ഥാനത്തില് കൂടുതല് നടപടികളിലേക്ക് കടക്കുമെന്നും പോലീസ് പറഞ്ഞു.
Content Highlights: A Pune government employee is facing charges for filming his wife in the bathroom and blackmailing