സ്റ്റേഷനിൽ പ്രായപൂർത്തിയാകാത്ത പെൺകുട്ടിയുടെ അതിക്രമം; വീഡിയോ പ്രചരിപ്പിച്ചവർക്കെതിരെ കേസെടുക്കും

തിരുവനന്തപുരം: പോത്തൻകോട് പോലീസ് സ്റ്റേഷനിൽ പ്രായപൂർത്തിയാകാത്ത പെൺകുട്ടി അതിക്രമം നടത്തിയ സംഭവത്തിന്റെ ദൃശ്യങ്ങൾ സാമൂഹിക മാധ്യമങ്ങളിലൂടെ പ്രചരിപ്പിച്ചവർക്കെതിരെ കേസെടുക്കുമെന്ന് പോലീസ്. വീഡിയോ ദൃശ്യങ്ങൾ വ്യാപകമായി പ്രചരിച്ചതിന് പിന്നാലെയാണ് പോലീസ് നടപടി.

രണ്ടുദിവസം മുമ്പാണ് പെൺകുട്ടി പോത്തൻകോട് പോലീസ് സ്റ്റേഷനിലെത്തി ബഹളം വയ്ക്കുകയും അതിക്രമം കാണിക്കുകയും ചെയ്തത്. തുടർന്ന് പോത്തൻകോട് പോലീസ് ഉടനടി ഇടപെടുകയും ബന്ധുക്കളുടെ സാന്നിധ്യത്തിൽ പെൺകുട്ടിയെ തിരുവനന്തപുരത്തെ മാനസികാരോഗ്യ കേന്ദ്രത്തിലേക്ക് മാറ്റുകയും ചെയ്തിരുന്നു.

എന്നാൽ, സംഭവസമയത്ത് സ്റ്റേഷനിലുണ്ടായിരുന്ന ആരോ പെൺകുട്ടി ബഹളംവെക്കുന്ന ദൃശ്യങ്ങൾ ഫോണിൽ പകർത്തി പുറത്തുവിടുകയായിരുന്നു. ഈ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചതോടെയാണ് ദൃശ്യങ്ങൾ പങ്കുവെച്ചവർക്കെതിരേ കേസെടുക്കാൻ ഉന്നത ഉദ്യോഗസ്ഥർ നിർദ്ദേശം നൽകിയത്.

സോഷ്യൽമീഡിയ വഴി ഈ ദൃശ്യങ്ങൾ പ്രചരിപ്പിച്ചവർ എത്രയും വേഗം അവ ഡിലീറ്റ് ചെയ്യണമെന്ന് പോലീസ് കർശന മുന്നറിയിപ്പ് നൽകി. അല്ലാത്തപക്ഷം അവർക്കെതിരെ ജാമ്യമില്ലാ വകുപ്പുകൾ ചുമത്തി കേസെടുക്കുമെന്നും അധികൃതർ വ്യക്തമാക്കി.

Content Highlights: Police action initiated against individuals spreading the minor's station rampage video., Strict warning issued to delete the video from social media immediately., Non-bailable offenses to be charged for further circulation of the video., The minor involved was shifted to a mental health center in Thiruvananthapuram.