തെങ്കാശിയില് കൊല്ലം സ്വദേശിനിയായ ഗേറ്റ്കീപ്പറെ ആക്രമിച്ചു; ട്രാക്കിലൂടെ വലിച്ചിഴച്ചു, പീഡനശ്രമം
കൊല്ലം/തെങ്കാശി: തമിഴ്നാട്ടിലെ തെങ്കാശിയില് മലയാളി റെയില്വേ ഗേറ്റ് കീപ്പര്ക്ക് നേരേ ക്രൂരമായ ആക്രമണം. തെങ്കാശി പാവൂര്ഛത്രം റെയില്വേ ഗേറ്റില് ഡ്യൂട്ടിയിലുണ്ടായിരുന്ന കൊല്ലം സ്വദേശിയായ യുവതിയാണ് ആക്രമണത്തിനിരയായത്. റെയില്വേ ട്രാക്കിലൂടെ യുവതിയെ വലിച്ചിഴച്ച അക്രമി, ലൈംഗികമായി പീഡിപ്പിക്കാനും ശ്രമിച്ചു. ഗുരുതരമായി പരിക്കേറ്റ യുവതി തിരുനെല്വേലിയിലെ ആശുപത്രിയില് ചികിത്സയിലാണ്.
വ്യാഴാഴ്ച രാത്രി എട്ടുമണിയോടെയായിരുന്നു സംഭവം. റെയില്വേ ഗേറ്റില് ഡ്യൂട്ടിയിലുണ്ടായിരുന്ന ജീവനക്കാരി വീട്ടിലേക്ക് ഫോണ്ചെയ്യുന്നതിനിടെയാണ് അക്രമി എത്തിയത്. യുവതിയുടെ മുഖത്ത് കല്ലുകൊണ്ടിടിച്ച ഇയാള് ക്രൂരമായി മര്ദിക്കുകയായിരുന്നു. റെയില്വേ ട്രാക്കിലൂടെ വലിച്ചിഴയ്ക്കുകയും ലൈംഗികമായി പീഡിപ്പിക്കാനും ശ്രമിച്ചു. എന്നാല് യുവതി നിലവിളിച്ചതോടെ അക്രമി സംഭവസ്ഥലത്തുനിന്ന് ഓടിരക്ഷപ്പെട്ടു.
ഗുരുതരമായി പരിക്കേറ്റനിലയില് കണ്ടെത്തിയ ജീവനക്കാരിയെ പിന്നീട് നാട്ടുകാരാണ് സമീപത്തെ ആശുപത്രിയില് എത്തിച്ചത്. ഇവിടെനിന്ന് തിരുനെല്വേലിയിലെ ആശുപത്രിയിലേക്ക് മാറ്റി.
ആക്രമിച്ചയാളെ ഇതുവരെ പിടികൂടാന് കഴിഞ്ഞിട്ടില്ല. അക്രമിയെ കണ്ടെത്താന് തെങ്കാശി പോലീസ് തിരച്ചില് ഊര്ജിതമാക്കിയിട്ടുണ്ട്.
Content Highlights: malayali woman railway gate keeper brutally attacked in tenkasi tamilnadu