ഓപ്പറേഷൻ സിന്ദൂർ എല്ലാം തച്ചുതകർത്തു; വീണ്ടും ശക്തരാവാൻ ഡിജിറ്റൽ ഹവാല വഴി പണം സ്വീകരിച്ച് JEM

ഇസ്‌ലാമാബാദ്: ഡിജിറ്റൽ ഹവാല വഴി പാകിസ്താൻ ഭീകര സംഘടനയായ ജെയ്ഷെ മുഹമ്മദ് പണം സംഭരിക്കുന്നതായി രഹസ്യാന്വേഷണ റിപ്പോർട്ട്. പുതിയ റിക്രൂട്ട്‌മെന്റിനും ആയുധസംഭരണത്തിനുമാണ് വലിയ  തോതിൽ ക്രൗഡ് ഫണ്ടിങ്ങിലൂടെ ഇവർ പണം സംഭരിക്കുന്നതെന്നാണ് സൂചന. രഹസ്യാന്വേഷണ റിപ്പോർട്ടുകൾ പ്രകാരം ഈസിപൈസ, സദാപേ പോലുള്ള പാകിസ്താനി ഡിജിറ്റൽ വാലറ്റുകളെ ആധാരമാക്കിയാണ് ഇത്.

പഹൽഗാം ആക്രമണത്തെത്തുടർന്ന്, മെയ് ഏഴിന് ഇന്ത്യൻ സൈന്യം ഓപ്പറേഷൻ സിന്ദൂറിലൂടെ തിരിച്ചടിച്ചപ്പോൾ ജെഇഎമ്മിന്റെ ആസ്ഥാനമായ മർക്കസ് സുബ്ഹാനള്ളയും മറ്റ് പരിശീലന കേന്ദ്രങ്ങളായ മർക്കസ് ബിലാൽ, മർക്കസ് അബ്ബാസ്, മഹ്‌മോന സോയ, സർഗൽ എന്നിവയും നശിപ്പിക്കപ്പെട്ടു. എന്നാൽ,  ഇതിനുപിന്നാലെ, ഈ കേന്ദ്രങ്ങൾ പുനർനിർമ്മിക്കാൻ പാക് സർക്കാർ ധനസഹായം പ്രഖ്യാപിച്ചു.

പാകിസ്താനിലുടനീളം 313 പുതിയ പരിശീലന കേന്ദ്രങ്ങൾ സ്ഥാപിക്കുന്നതിനായി 391 കോടി പാകിസ്തനി രൂപ സമാഹരിക്കാൻ ജെയ്ഷെ മുഹമ്മദ് ഈസിപൈസ വഴി ഓൺലൈൻ ധനസമാഹരണ കാമ്പയിൻ ആരംഭിച്ചതായി രഹസ്യാന്വേഷണ വിവരങ്ങൾ സൂചിപ്പിക്കുന്നു. ബാങ്ക് അക്കൗണ്ടുകൾക്ക് പകരം, സംഭാവനകൾ ഇപ്പോൾ മസൂദ് അസ്ഹറിന്റെ കുടുംബാംഗങ്ങൾ നിയന്ത്രിക്കുന്ന ഡിജിറ്റൽ വാലറ്റുകളിലേക്കാണ് പോകുന്നത്. 

ഫണ്ട് സ്വരൂപിക്കുന്നതിനായി ജെയ്ഷെ മുഹമ്മദ് തങ്ങളുടെ കേഡർമാരെ സജീവമാക്കിയിട്ടുണ്ട്. രഹസ്യാന്വേഷണ റിപ്പോർട്ടുകൾ പ്രകാരം, ഫേസ്ബുക്ക്, വാട്ട്സ്ആപ്പ് പോലുള്ള പ്ലാറ്റ്ഫോമുകളിൽ ജെഇഎമ്മുമായും അതിന്റെ കമാൻഡർമാരുമായും ബന്ധമുള്ള പ്രോക്‌സി അക്കൗണ്ടുകളിലൂടെ പോസ്റ്ററുകളും വീഡിയോകളും മസൂദ് അസ്ഹറിന്റെ കത്തും പോസ്റ്റ് ചെയ്യപ്പെടുന്നു. ജെഇഎം 313 മർക്കസുകൾ നിർമ്മിക്കുകയാണെന്നും ഓരോ കേന്ദ്രത്തിനും 1.25 കോടി പാകിസ്താനി രൂപ ആവശ്യമാണെന്നും ഈ അഭ്യർത്ഥനകളിൽ പറയുന്നു. 

രഹസ്യാന്വേഷണ റിപ്പോർട്ടുകൾ പ്രകാരം, ജെഇഎമ്മിന്റെ ധനസമാഹരണ കാമ്പയിൻ നിരവധി വലിയ ഡിജിറ്റൽ വാലറ്റുകളുമായി ബന്ധപ്പെട്ടിരിക്കുന്നു. ജെയ്‌ഷെ മുഹമ്മദിന്റെ പല കമാൻഡർമാരും സദാപേ, ഈസിപൈസ വാലറ്റുകൾ വഴിയാണ് പണം സംഭരിക്കുന്നത്. 

മസൂദ് അസ്ഹറിന്റെ കുടുംബം ഒരേ സമയം 7-8 ഡിജിറ്റൽ വാലറ്റുകൾ പ്രവർത്തിപ്പിക്കുകയും, ഓരോ 3-4 മാസം കൂടുമ്പോഴും അവ മാറ്റി പുതിയ അക്കൗണ്ടുകളിലേക്ക് വലിയ തുകകൾ കൈമാറുകയും ചെയ്യുന്നു. വലിയ തുകകൾ ആദ്യം ഒരു പ്രധാന വാലറ്റിൽ നിക്ഷേപിക്കുകയും, പിന്നീട് പണം പിൻവലിക്കുന്നതിനോ കൈമാറ്റങ്ങൾക്കോ വേണ്ടി 10-15 മറ്റ് വാലറ്റുകളിലേക്ക് ചെറിയ തുകകളായി വിതരണം ചെയ്യുകയും ചെയ്യുന്നു. യഥാർത്ഥ ഫണ്ടിംഗ് ഉറവിടം കണ്ടെത്തുന്നത് കൂടുതൽ ബുദ്ധിമുട്ടാക്കാൻ ജെയ്ഷെ മുഹമ്മദ് എല്ലാ മാസവും കുറഞ്ഞത് 30 പുതിയ വാലറ്റുകളെങ്കിലും സജീവമാക്കുന്നുണ്ടെന്നും റിപ്പോർട്ടുകളുണ്ട്.

നിലവിൽ, ജെഇഎമ്മിന്റെ ഫണ്ടിംഗിന്റെ ഏകദേശം 80 ശതമാനവും ഈ ഡിജിറ്റൽ വാലറ്റുകളിലൂടെയാണ് ഒഴുകുന്നത്, വർഷം തോറും 80-90 കോടി പാകിസ്താനി രൂപയുടെ ഇടപാടുകൾ നടക്കുന്നുണ്ട്. ആയുധങ്ങൾ വാങ്ങാനും പരിശീലന ക്യാമ്പുകൾ നടത്താനും ആശയവിനിമയ സംവിധാനങ്ങൾ നിലനിർത്താനും, ആഡംബര കാറുകൾ വാങ്ങാനും മസൂദ് അസ്ഹറിന്റെ കുടുംബത്തിന് പണം നൽകാനും ഈ പണം ഉപയോഗിക്കുന്നു. 

അതേസമയം, ഫിനാൻഷ്യൽ ആക്ഷൻ ടാസ്‌ക് ഫോഴ്സിന്റെ (എഫ്എടിഎഫ്) കരിമ്പട്ടികയിൽനിന്ന് പുറത്തുകടക്കാൻ പാകിസ്താൻ നടപ്പാക്കിയ തന്ത്രം ഭീകരസംഘടനയായ ജെയ്‌ഷെ മുഹമ്മദിനെ സംരക്ഷിക്കാനായിരുന്നുവെന്ന് തെളിഞ്ഞു. പട്ടികയിൽനിന്ന് ഒഴിയാൻ 2019-ൽ ദേശീയ കർമ്മ പദ്ധതി എന്ന നിലയിലായിരുന്നു ജെയ്‌ഷെ മുഹമ്മദിനെ പാക് സർക്കാർ സംരക്ഷിച്ചത്.

ജെയ്ഷെ മുഹമ്മദിന്റെ (ജെഇഎം) മർക്കസുകളുടെ നിയന്ത്രണം ഏറ്റെടുക്കുകയും ജെയ്‌ഷെ തലവന്മാരായ മസൂദ് അസ്ഹർ, സഹോദരന്മാരായ റൗഫ് അസ്ഗർ, തൽഹ അൽ സൈഫ് എന്നിവരുടെ ബാങ്ക് അക്കൗണ്ടുകൾ നിരീക്ഷിക്കുകയും പണമിടപാടുകൾ നിരോധിക്കുകയും ചെയ്തുകൊണ്ട് സംഘടനയെ നിയന്ത്രിച്ചതായി പാകിസ്താൻ അവകാശപ്പെട്ടു. 2022 ആയപ്പോഴേക്കും എഫ്എടിഎഫ് പാകിസ്താനെ കരിമ്പട്ടികയിൽനിന്ന് നീക്കം ചെയ്തു.

ഇതിനു പിന്നാലെയാണ് ഇപ്പോൾ ക്രൗഡ് ഫണ്ടിങ്ങിലൂടെയും ഡിജിറ്റൽ ഹവാലയിലൂടെയും വലിയ തോതിൽ ജെയ്‌ഷെ മുഹമ്മദ് പണം സംഭരിക്കുന്നതായി കണ്ടെത്തിയിരിക്കുന്നത്.

Content Highlights: Jaish-e-Mohammed goes for digital fundraising to rebuild, destroyed during operation sindoor