'അയോധ്യ രാമക്ഷേത്രത്തിൽനിന്ന് തട്ടിയെടുത്തത് 2.7 കോടി': സുപ്രീം കോടതിയിൽ കുറ്റപത്രം സമർപ്പിച്ച് എസ്ഐടി

അയോധ്യ: ഉത്തർപ്രദേശിലെ അയോധ്യ രാമക്ഷേത്രത്തിലെ സംഭാവനക്കൊള്ളയുമായി ബന്ധപ്പെട്ട കുറ്റപത്രം സുപ്രീം കോടതിയിൽ സമർപ്പിച്ച് പ്രത്യേക അന്വേഷണ സംഘം (SIT). സംഭാവനകളിൽ നിന്ന് 2.7 കോടി രൂപ പ്രതികൾ തട്ടിയെടുത്തതായാണ് സോളിസിറ്റർ ജനറൽ തുഷാർ മേത്ത സമർപ്പിച്ച എസ്ഐടിയുടെ സ്റ്റാറ്റസ് റിപ്പോർട്ടിൽ ഔദ്യോഗികമായി വ്യക്തമാക്കിയിരിക്കുന്നത്.

ഈ കുറ്റപത്രം സമർപ്പിച്ചതിന് പിന്നാലെ, കേസിൽ സ്വതന്ത്രമായ സിബിഐ അന്വേഷണം വേണമെന്ന് ആവശ്യപ്പെട്ടുകൊണ്ടുള്ള എല്ലാ പൊതുതാത്പര്യ ഹർജികളും ചീഫ് ജസ്റ്റിസ് സൂര്യകാന്തിന്റെ നേതൃത്വത്തിലുള്ള ബെഞ്ച് അവസാനിപ്പിച്ചു. കേസിലെ എട്ട് പ്രതികളുടെ വിചാരണയ്ക്ക് തിങ്കളാഴ്ച സുപ്രീം കോടതി അനുമതി നൽകി.

അയോധ്യ രാമക്ഷേത്ര സംഭാവനക്കൊള്ള കേസ്

ഭക്തർ നൽകിയ വഴിപാട് തുകകൾ ആസൂത്രിതമായി തട്ടിയെടുത്തു എന്നതാണ് അയോധ്യ രാമക്ഷേത്ര സംഭാവന മോഷണ കേസിന്റെ കാതൽ. 2026 പകുതിയോടെയാണ് ക്രമക്കേടുകൾ ആദ്യം ശ്രദ്ധയിൽപ്പെട്ടത്. തുടർന്ന് സുപ്രീം കോടതി വരെ എത്തിയ ഉന്നതതല അന്വേഷണത്തിനും നിയമപോരാട്ടങ്ങൾക്കും ഇത് വഴിവെച്ചു. ക്ഷേത്ര വളപ്പിലെ പിൽഗ്രിം ഫെസിലിറ്റേഷൻ സെന്റർ (PFC) കെട്ടിടത്തിനുള്ളിലാണ് മോഷണം നടന്നത്.

തുറന്ന കാണിക്കവഞ്ചികളിൽ നിന്നല്ല, മറിച്ച് സംഭാവന തുക എണ്ണുന്ന ഘട്ടത്തിലാണ് മോഷണം നടന്നതെന്ന് സംസ്ഥാന സർക്കാർ നിയമിച്ച എസ്‌ഐടി വ്യക്തമാക്കി. സിസിടിവി ദൃശ്യങ്ങളാണ് അന്വേഷണത്തിൽ നിർണായക പങ്കുവഹിച്ചത്. സംഭാവന എണ്ണുന്ന മുറിയിൽ നിന്ന് പണം അനധികൃതമായി കടത്തുകയോ ഒളിപ്പിക്കുകയോ ചെയ്തതായി ദൃശ്യങ്ങളിൽ നിന്ന് വ്യക്തമായി. 105 തവണയാണ് ഇത്തരത്തിൽ പണം അപഹരിക്കപ്പെട്ടത്.

കേസ് ഔദ്യോഗികമായി രജിസ്റ്റർ ചെയ്യുന്നതിന് മാസങ്ങൾക്ക് മുമ്പ് തന്നെ പണം എണ്ണുന്നതിലും കണക്കുകൾ ഒത്തുനോക്കുന്നതിലും ഉണ്ടായ വ്യത്യാസങ്ങൾ സ്റ്റേറ്റ് ബാങ്ക് ഓഫ് ഇന്ത്യ ചൂണ്ടിക്കാണിച്ചിരുന്നതായി റിപ്പോർട്ടുണ്ട്. പിന്നാലെ, പൊതുജനരോഷത്തെയും ക്ഷേത്ര ട്രസ്റ്റ് ഭാരവാഹികളുടെ ആവശ്യത്തെയും തുടർന്നാണ് ഉത്തർപ്രദേശ് സർക്കാർ പ്രത്യേക അന്വേഷണ സംഘത്തിന് (SIT) രൂപം നൽകിയത്.

2026 ജൂലൈ 27-ന് അന്വേഷണത്തിന് മേൽനോട്ടം വഹിക്കാൻ സുപ്രീം കോടതി ഇടപെടുകയും സാമ്പത്തിക ഇടപാടുകളുടെ രേഖകൾ കൃത്യമായി പരിശോധിക്കുന്നതിനായി എസ്ഐടിയോടൊപ്പം ഒരു ഫോറൻസിക് ഓഡിറ്ററെക്കൂടി ഉൾപ്പെടുത്താൻ ഉത്തരവിടുകയും ചെയ്തു.

കേസിൽ എസ്ഐടിയുടെ വിപുലമായ അന്വേഷണം

കേസിന്റെ ഭാഗമായി 173 സാക്ഷികളിൽ നിന്നാണ് എസ്‌ഐടി ഔദ്യോഗികമായി മൊഴി രേഖപ്പെടുത്തിയത്. മൂല്യമുള്ള 803 വസ്തുക്കളുടെ രസീതുകളും വിതരണം ചെയ്യാത്ത 86 ഫിസിക്കൽ രസീതുകളും പരിശോധിച്ചു. ക്രമക്കേടുകൾ ഉണ്ടോയെന്ന് പരിശോധിക്കാൻ 944.411 കിലോഗ്രാം വൈറ്റ് മെറ്റൽ (വെള്ളി തരം) വഴിപാടുകൾ ഉരുക്കി പരിശോധിച്ചു (ഇത്തരം വസ്തുക്കളിൽ യാതൊരു പ്രശ്‌നവും കണ്ടെത്തിയില്ല; പണം മാത്രമാണ് പ്രതികൾ മോഷ്ടിച്ചത്).

തട്ടിയെടുത്ത 2.7 കോടി രൂപ ഉപയോഗിച്ചാണ് പ്രതികൾ പല സ്വത്തുക്കളും വാങ്ങിയതെന്ന് തെളിയിക്കുന്നതിനായി സംശയിക്കപ്പെടുന്നവരുടെ ബാങ്ക് അക്കൗണ്ടുകൾ, സാമ്പത്തിക ഇടപാടുകൾ, സ്ഥാവര-ജംഗമ സ്വത്തുക്കൾ എന്നിവ അന്വേഷണ ഉദ്യോഗസ്ഥർ കണ്ടെത്തി രേഖപ്പെടുത്തി. ആർജെഡി എംപി സുധാകർ സിങ്, ഹിന്ദു ധർമ പരിഷത്ത് എന്നിവരുൾപ്പെടെയുള്ള ഭക്തരും അഭിഭാഷകരും രാഷ്ട്രീയ നേതാക്കളും കേസിൽ പൊതുതാത്പര്യ ഹർജികൾ സമർപ്പിച്ചിരുന്നു.

എസ്ഐടിയുടെ കുറ്റപത്രത്തിൽ പറയുന്ന വിവരങ്ങൾ

ക്ഷേത്രത്തിന് സംഭാവനയായി ലഭിച്ചതിൽനിന്നുംനിന്നും തട്ടിയെടുക്കപ്പെട്ട തുക ഏകദേശം 2.7 കോടി രൂപയാണ് എന്നാണ് കുറ്റപത്രത്തിൽ വ്യക്തമാക്കിയിരിക്കുന്നത്. പിൽഗ്രിം ഫെസിലിറ്റേഷൻ സെന്ററിൽ (PFC) സ്ഥിതി ചെയ്യുന്ന, സംഭാവന എണ്ണുന്നതിനായി പ്രത്യേകം ഒരുക്കിയിട്ടുള്ള മുറിയിൽ വെച്ച്, പണം എണ്ണി തിട്ടപ്പെടുത്തുന്ന ഘട്ടത്തിലാണ് മോഷണം നടന്നതെന്ന് ഉത്തർപ്രദേശ് സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത വാദത്തിനിടെ വ്യക്തമാക്കി.

അതേസമയം, ക്ഷേത്രത്തിലെ പുരാവസ്തുക്കൾ പൂർണമായും സുരക്ഷിതമാണ്, മോഷ്ടിക്കപ്പെട്ടിട്ടുള്ള വസ്തുക്കളിൽ ഇവ ഉൾപ്പെട്ടിട്ടില്ല. സിസിടിവി ദൃശ്യങ്ങൾ പരിശോധിച്ചതിൽ നിന്നും 105 തവണയോളം പ്രതികൾ പണം മാറ്റുകയോ ഒളിപ്പിക്കുകയോ ചെയ്തതായി കണ്ടെത്തിയിട്ടുണ്ട്. പ്രതികൾ തുക വസ്തുക്കളിൽ നിക്ഷേപിക്കുകയും മറ്റു ചിലർ ബാങ്കുകളിൽ നിക്ഷേപമായി സൂക്ഷിക്കുകയും ചെയ്തിട്ടുണ്ടെന്ന് അദ്ദേഹം പറഞ്ഞു.

വസ്തുക്കൾ, നിർമാണ ചെലവുകൾ, വാഹനങ്ങൾ, ആഭരണങ്ങൾ എന്നിവയുൾപ്പെടെയുള്ള സ്ഥാവര-ജംഗമ സ്വത്തുക്കൾ വാങ്ങാൻ പ്രതികൾ ക്ഷേത്രത്തിൽ നിന്നും തട്ടിയെടുത്ത പണം ഉപയോഗിച്ചതായി റിപ്പോർട്ടിൽ രേഖപ്പെടുത്തിയിട്ടുണ്ട്. ഒരു വസ്തു ഇടപാടിൽ, ആധാരത്തിൽ (Sale Deed) 15 ലക്ഷം രൂപയാണ് കാണിച്ചതെങ്കിലും യഥാർത്ഥ വില 50 ലക്ഷം രൂപയായിരുന്നുവെന്ന് അന്വേഷണ ഉദ്യോഗസ്ഥർ കണ്ടെത്തി.

ഇതിന് ബാക്കി നൽകിയ തുക, ക്ഷേത്രത്തിലെ തട്ടിപ്പിലൂടെ സമ്പാദിച്ചതായിരിക്കാം എന്നും സോളിസിറ്റർ ജനറൽ കൂട്ടിച്ചേർത്തു. ക്ഷേത്രത്തിൽ കൃത്യമായ ഓഡിറ്റ് നടത്തിയിട്ടുണ്ടെന്നും അന്വേഷണത്തിനിടെ എല്ലാ പുരാവസ്തുക്കളും മറ്റ് വസ്തുക്കളും സുരക്ഷിതമായി കണ്ടെത്തിയെന്നും അദ്ദേഹം കോടതിയിൽ വ്യക്തമാക്കി.

ക്ഷേത്രത്തിന്റെ ഭാവിയിലെ സുരക്ഷ സംബന്ധിച്ച് ചീഫ് ജസ്റ്റിസ് ആശങ്ക പ്രകടിപ്പിച്ചപ്പോൾ, ഇത്തരം സംഭവങ്ങൾ ആവർത്തിക്കാതിരിക്കാൻ ആവശ്യമായ മുൻകരുതൽ നടപടികൾ ഇതിനോടകം സ്വീകരിച്ചിട്ടുണ്ടെന്നും തുഷാർ മേത്ത വ്യക്തമാക്കി.

സുപ്രീം കോടതിയുടെ നിരീക്ഷണവും നിർദ്ദേശങ്ങളും

അയോധ്യ രാമക്ഷേത്ര സംഭാവന തട്ടിപ്പ് കേസിൽ സ്വതന്ത്ര അന്വേഷണം ആവശ്യപ്പെട്ടുകൊണ്ടുള്ള ഹർജികളിലെ തുടർനടപടികൾ സുപ്രീം കോടതി തിങ്കളാഴ്ച അവസാനിപ്പിച്ചു. പ്രതികൾക്കെതിരായ കേസിൽ ഇനി പ്രാദേശിക കോടതി വിചാരണയുമായി മുന്നോട്ട് പോകുമെന്ന് സുപ്രീം കോടതി അറിയിച്ചു.

കേസിൽ കോടതി നിയോഗിച്ച പ്രത്യേക അന്വേഷണ സംഘം (SIT) കുറ്റപത്രം സമർപ്പിച്ചിട്ടുണ്ടെന്ന ഉത്തർപ്രദേശ് സർക്കാരിന്റെ വാദം കണക്കിലെടുത്ത്, ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് 'നിയമപ്രകാരം വിചാരണയുമായി മുന്നോട്ട് പോകാൻ' സംസ്ഥാന സർക്കാരിന് അനുമതി നൽകി.

ഭാരതീയ നാഗരിക് സുരക്ഷാ സംഹിതയിലെ (BNSS) വ്യവസ്ഥകൾ ചൂണ്ടിക്കാട്ടി, ജസ്റ്റിസ് ജോയ്മല്യ ബാഗ്ചി, ജസ്റ്റിസ് വി. മോഹന എന്നിവരുൾപ്പെട്ട ബെഞ്ച്, പൊതുതാത്പര്യം കണക്കിലെടുത്ത്, അയോധ്യയിലെ ജുഡീഷ്യൽ മജിസ്ട്രേറ്റിനെ വിചാരണ വേളയിൽ സഹായിക്കാൻ ഹർജിക്കാർക്ക് അനുമതി നൽകുകയായിരുന്നു.

ഹർജികൾ തീർപ്പാക്കുന്നതിനിടയിൽ, കേസിന്റെ വസ്തുതകളെക്കുറിച്ച് കോടതി യാതൊരു നിരീക്ഷണങ്ങളും നടത്തിയിട്ടില്ലെന്നും ബെഞ്ച് വ്യക്തമാക്കി. 90 ദിവസത്തെ ഡിഫോൾട്ട് ജാമ്യത്തിനുള്ള (default bail) സമയപരിധിക്ക് മുമ്പ് തന്നെ എസ്ഐടി അന്തിമ കുറ്റപത്രം സമർപ്പിച്ചതിനാൽ, കേസിന്റെ വിചാരണ ഇനി അയോധ്യയിലെ ജുഡീഷ്യൽ മജിസ്ട്രേറ്റിന് മുമ്പാകെയായിരിക്കും നടക്കുക.

Content Highlights: The Supreme Court received a charge sheet from the Special Investigation Team (SIT) regarding a theft of 2.7 crore rupees from donations at the Ayodhya Ram Temple, with the theft occurring during the counting of donations, as revealed by CCTV footage. The Supreme Court dismissed all Public Interest Litigations (PILs) seeking an independent CBI investigation, allowing the trial of eight accused individuals to proceed, and emphasized that the case will now be handled by the local judicial magistrate in Ayodhya. The SIT's extensive investigation involved recording statements from 173 witnesses and examining financial transactions, revealing that the stolen funds were used to purchase various assets, while ensuring that all temple artifacts remained secure.