അജയ് ആയങ്കിയെ ജാമ്യത്തിലെടുക്കാൻ എത്തിയയാളെ കസ്റ്റഡിയിലെടുത്തു; ഗുണ്ടാ നേതാവെന്ന് പോലീസ്

കോഴിക്കോട്: അർജുൻ ആയങ്കിയുടെ ഇളയ സഹോദരൻ അജയ് ആയങ്കിയെ ജാമ്യത്തിലെടുക്കാൻ എത്തിയയാളെ പോലീസ് കസ്റ്റഡിയിലെടുത്തു. നിരവധി കേസുകളിൽ പ്രതിയായ മലാപ്പറമ്പ് സ്വദേശിയായ ഐനിഷ് എന്നയാളെയാണ് പോലീസ് കരുതൽ തടങ്കലിലെടുത്തത്. അജയിയെ സ്റ്റേഷൻ ജാമ്യത്തിലെടുക്കാൻ എത്തിയതായിരുന്നു ഇയാൾ.

അജയ് ആയങ്കിയെ ജാമ്യത്തിലെടുക്കുന്നതിന് രണ്ടുപേരുടെ ആൾ ജാമ്യം ആവശ്യമായിരുന്നു. ഇതിനാണ് ഐനിഷും മറ്റൊരാളും നടക്കാവ് പോലീസ് സ്റ്റേഷനിലെത്തിയത്. എന്നാൽ ഐനിഷിനെതിരെ വധശ്രമം അടക്കമുള്ള കേസുണ്ടെന്ന് മനസ്സിലായതോടെ പോലീസ് ഇയാളുടെ ക്രിമിനൽ പശ്ചാത്തലം പരിശോധിക്കണമെന്ന് വ്യക്തമാക്കുകയായിരുന്നു. വാറണ്ടോ മറ്റുനിയമനടപടികളോ ഇല്ലെന്ന് ബോധ്യപ്പെട്ടാൽ ഇയാളെ കസ്റ്റഡിയിൽ നിന്ന് മോചിപ്പിക്കുമെന്ന് പോലീസ് വ്യക്തമാക്കി.

ഐനിഷിന് ജാമ്യം നിൽക്കാൻ സാധിക്കില്ലെന്ന് ബോധ്യമായതോടെ അജയുടെ മറ്റൊരു സഹോദരനായ അഖിൽ ആയങ്കി സ്റ്റേഷനിലെത്തി ജാമ്യം നിൽക്കുകയായിരുന്നു. സ്റ്റേഷന് പുറത്തെത്തിയ അഖിൽ മാധ്യമപ്രവർത്തകരോട് തട്ടി കയറി. മാധ്യമങ്ങൾ തെറ്റായ വാർത്ത പ്രചരിപ്പിക്കുകയാണെന്നും സാമൂഹികമാധ്യമങ്ങളിൽ പോസ്റ്റുകൾ പങ്കുവെച്ചിരുന്നത് അജയ് അല്ല, അത് അർജുൻ തന്നെയായിരുന്നുവെന്നും ഇയാൾ ക്ഷുഭിതനായി പ്രതികരിച്ചു.

രാത്രി 12 മണിയോടെ കോഴിക്കോട് നടക്കാവ് ഭാഗത്തുള്ള ഒരു സ്വകാര്യ സ്ഥാപനത്തിന് മുന്നിൽ വെച്ചാണ് അജയ് പോലീസ് പിടിയിലാകുന്നത്. അർജുൻ ആയങ്കിയുടെ ബാങ്ക് അക്കൗണ്ടുകൾ പോലീസ് ഫ്രീസ് ചെയ്തതിനെ തുടർന്ന്, കേസ് നടത്തുന്നതിനാവശ്യമായ പണം സ്വരൂപിക്കാൻ അജയ് ആയങ്കിയുടെ അക്കൗണ്ടാണ് ഉപയോഗിച്ചിരുന്നത്. സോഷ്യൽ മീഡിയ വഴി ക്രൗഡ്‌ ഫണ്ടിങ് നടത്തി പണം ശേഖരിക്കാനായി സ്വന്തം പേരിലുള്ള ക്യു.ആർ കോഡ് സ്‌കാനർ ഇയാൾ പ്രചരിപ്പിച്ചുവെന്നും ഇത്തരത്തിൽ സമാഹരിച്ച പണം ഉപയോഗിച്ചാണ് അർജുൻ ആയങ്കിയുടെ അഭിഭാഷകർക്കുള്ള ഫീസും മറ്റ് ഒളിവുജീവിത ചെലവുകളും വഹിച്ചിരുന്നത് എന്നും പോലീസ് പറയുന്നു.

Content Highlights: Man arriving to bail Ajay Ayanki detained by Kozhikode police.