നല്ല യോഗ്യതയുണ്ട്, പക്ഷേ ജോലി തരാനാവില്ലെന്ന് കമ്പനി; 'പാവങ്ങൾക്കീ ഗതി വരുത്തല്ലേ'യെന്ന് ടെക്കി

മോശം ഉദ്യോ​ഗാർത്ഥികളെയാണ് സാധാരണ​ഗതിയിൽ കമ്പനികൾ അഭിമുഖത്തിനുശേഷം നിരസിക്കുക. ഉയർന്ന യോ​ഗ്യതയും സർവോപരി നന്നായി ജോലിചെയ്യുന്നവരേയും ഏതെങ്കിലും കമ്പനി നിരസിക്കുമോ? ഉണ്ടെന്നാണ് സോഷ്യൽ മീഡിയയിൽ അനു ശർമ എന്ന യുവതി പോസ്റ്റ് ചെയ്ത സ്ക്രീൻഷോട്ട് പറയുന്നത്. നല്ല അനുഭവപരിജ്ഞാനമുള്ളതുകൊണ്ട് ഒരു കമ്പനി തനിക്ക് ജോലി നിഷേധിച്ചെന്നാണ് അനുവിന്റെ പോസ്റ്റിന്റെ ചുരുക്കം.

​ഗൂ​ഗിൾ ജീവനക്കാരിയും ഡൽഹി സ്വദേശിയുമാണ് അനു ശർമ. ജോലിക്കപേക്ഷിച്ച ഒരു സ്റ്റാർട്ടപ്പ് കമ്പനിയിൽനിന്നാണ് അനുവിന് വളരെ വിചിത്രമായ മറുപടി ലഭിച്ചത്. തങ്ങൾ നിർദേശിച്ചതിലും ഉയർന്ന യോ​ഗ്യതയാണ് അനുവിനുള്ളതെന്ന് ബയോഡാറ്റ വിശകലനം ചെയ്തതിൽനിന്ന് മനസിലായെന്നാണ് കമ്പനി റിജക്ഷൻ ലെറ്ററിൽ പറയുന്നത്. ഉയർന്ന യോ​ഗ്യതയുള്ള ഉദ്യോ​ഗാർത്ഥികൾ പലപ്പോഴും ജോലി പൂർത്തീകരിക്കുന്നില്ല. കൂടാതെ ജോലിയിൽ പ്രവേശിച്ചതിനുശേഷം താമസിയാതെ രാജിവെയ്ക്കുന്നതായി തങ്ങൾക്കനുഭവമുണ്ടെന്നും കത്തിൽ പറയുന്നു.

വളരെ നല്ല ആളായതുകൊണ്ട് നിഷേധിക്കപ്പെടുമെന്ന് അറിയാമായിരുന്നോ എന്ന തലക്കെട്ടിലാണ് അനു ശർമ ഈ സ്ക്രീൻ ഷോട്ട് പങ്കുവെച്ചത്.

നിരവധി പേരാണ് അനുവിന്റെ പോസ്റ്റിന് പ്രതികരണങ്ങളുമായെത്തിയത്. കൂടുതൽ യോഗ്യതയുള്ളതുകൊണ്ടല്ല, ഉയർന്ന റാങ്കിലുള്ള കോളേജിൽ നിന്നുള്ള ആളായതുകൊണ്ട് തനിക്കും സമാനമായ അനുഭവമുണ്ടായെന്ന് ഒരാൾ കമന്റ് ചെയ്തു. തനിക്ക് യോ​ഗ്യത കൂടുതലായതുകൊണ്ട് ചിലപ്പോൾ കമ്പനി വിട്ടേക്കുമെന്ന് ബന്ധപ്പെട്ടവർ കരുതുന്നുവെന്നും യോ​ഗ്യതക്കൂടുതലിന്റെ കാര്യം മൂന്ന് തവണ നടന്ന അഭിമുഖങ്ങളിൽ അവർ പറഞ്ഞിട്ടുണ്ടെന്നും മറ്റൊരാൾ കമന്റ് ചെയ്തു.

Content Highlights: A Google employee, Anu Sharma, shared a job rejection letter