ഭർത്താവിന്റെ മരണം, തുണിക്കടയിൽ ജോലി, ലോട്ടറിവിൽപന; ഇനി സജിത സർക്കാർ ജോലിയിലേക്ക്

അഞ്ചുവർഷം മുൻപുള്ള ഒരു ഓണക്കാലത്താണ് പറക്കമുറ്റാത്ത മൂന്ന് കുഞ്ഞുങ്ങളെയും സജിതയേയും തനിച്ചാക്കി സുഭാഷ് യാത്രയാകുന്നത്. പ്രണയവിവാഹവും ആറ് വർഷത്തെ ദാമ്പത്യവും കടന്നുള്ള വേർപാട് സജിതയ്ക്ക് താങ്ങാവുന്നതിലുമപ്പുറമായിരുന്നു. അന്നോളം തനിക്ക് തണലുതന്ന ഭർത്താവ് ഇനിയില്ലെന്ന തിരിച്ചറിവ് ഒന്ന് വാവിട്ട് കരയാൻ പോലുമാകാത്ത വിധം സജിതയെ തകർത്തുകളഞ്ഞു. അയാൾ ബാക്കി വെച്ചു പോയ ശൂന്യതയിൽ കുഞ്ഞുങ്ങളുടെ കരച്ചിലോ ഇല്ലായ്മയുടെ പടുകൂറ്റൻ ലിസ്റ്റോ അവർ കണ്ടില്ല. സുഭാഷ് മരിച്ചെന്നും കുടുംബം തന്റെ ചുമലിലാണെന്നുമുള്ള ബോധ്യത്തിലേക്ക് സജിത നടന്നുകയറുമ്പോഴേക്കും വർഷം ഒന്ന് കഴിഞ്ഞിരുന്നു.

സ്ഥിരവരുമാനമില്ലാത്ത ഒരു കുടുംബത്തെ സംബന്ധിച്ച് സർക്കാർ ജോലിയെന്നത് സ്വപ്ന സാക്ഷാത്കാരമെന്നതിനപ്പുറം ജീവിതത്തിലേക്കുള്ള പിടിവള്ളിയാണ്. അങ്ങനെയാണ് 35-ാം വയസിൽ സജിത പി.എസ്.സി പഠനമാരംഭിക്കുന്നത്. ഈ പ്രായത്തിൽ പഠിച്ചിട്ട് എന്ത് ജോലി വാങ്ങാനാണെന്ന നേർത്ത പരിഹാസങ്ങളെ സജിത വകവെച്ചതേയില്ല. പഠനത്തിൽ ശരാശരിയിലും താഴെ മാർക്ക് വാങ്ങിയിരുന്ന, സപ്ലികളുടെ എണ്ണം കൂടിയപ്പോൾ ബി.ടെക്ക് നിർത്തിപ്പോയ അതേ സജിത പക്ഷേ മധുരപ്രതികാരം വീട്ടിയത് പി.എസ്.സി ലാസ്റ്റ് ഗ്രേഡ് സെർവന്റ്സ് മെയിൻ ലിസ്റ്റിൽ ഇടം നേടിയാണ്.

Content Highlights: Success story of Sajitha Subhash who got rank in Kerala PSC LGS, inspiring stories