കണ്ണഞ്ചിപ്പിക്കുന്ന ലൈറ്റുകളോട് നോ കോംപ്രമൈസ്; പിഴ അയ്യായിരത്തിൽ ഒതുങ്ങില്ല, നടപ്പാക്കാൻ MVD

അടൂർ: കോടതി ഉത്തരവ് നടപ്പാക്കാൻ മോട്ടോർ വാഹനവകുപ്പ് എം.വി.ഐ.മാർക്ക് നിർദേശം നൽകി. തീവ്രത കൂടിയ ലൈറ്റുകൾ ഉപയോഗിക്കുന്ന വാഹനങ്ങൾ കണ്ടെത്താനാണ് നിർദേശം. ഇതു സംബന്ധിച്ച് ഓഗസ്റ്റ് നാലിനാണ് എല്ലാ എം.വി.ഐമാർക്കും നിർദേശം നൽകിയിരിക്കുന്നത്. ഉത്തരവ് ഇറങ്ങി ഓഗസ്റ്റ് 20-ന് പരിശോധനകൾ നടത്തിയോ, നടത്തിയെങ്കിൽ എത്ര വാഹനങ്ങൾക്കെതിരേ നടപടിയെടുത്തു തുടങ്ങിയ കാര്യങ്ങളിൽ റിപ്പോർട്ട് സമർപ്പിക്കാനും നിർദേശമുണ്ട്.

നിയമലംഘനം കണ്ടെത്തിയാൽ ഇടാക്കേണ്ട പിഴത്തുക മുൻപുതന്നെ ഹൈക്കോടതി നിശ്ചയിച്ചിട്ടുണ്ട്. കോടതി ഇതിനുള്ള ചില നിർദേശങ്ങളും പിഴത്തുകയും ഉത്തരവായി ഇറക്കിയിട്ടുമുണ്ട്.

പ്രധാനമായും മിന്നുന്ന പ്രകാശമുള്ള ലൈറ്റുകൾ കണ്ടെത്തിയാൽ ഒരു യൂണിറ്റിന് അയ്യായിരം രൂപയാണ് പിഴ. പുറത്തേക്ക് തള്ളിനിൽക്കുന്ന ടയറുകൾ, വലിയ ശബ്ദത്തിനും പുക പുറന്തള്ളലിനും കാരണമാകുന്ന പരിഷ്‌കരിച്ച എക്സ്ഹോസ്റ്റ് ഉപകരണങ്ങൾ, മറ്റ് അനധികൃതമാറ്റങ്ങൾ തുടങ്ങിയവക്കെല്ലാം യൂണിറ്റ് ഒന്നിന് 5,000 രൂപ പിഴയീടാക്കാനും ഉത്തരവിട്ടുണ്ട്.

എന്നാൽ, നിയമലംഘനം കണ്ടാൽ പലപ്പോഴും ഉദ്യോഗസ്ഥർ തുകയിൽ ചെറിയ വിട്ടുവീഴ്ചകൾ ചെയ്യാറുണ്ട്. നിയമപരമായി കുറ്റമാണെങ്കിലും വലിയ തുക പിഴയായി ഈടാക്കാറില്ല.

മിന്നുന്ന പ്രകാശമുള്ള ലൈറ്റുകൾ അനധികൃതമായി സ്ഥാപിക്കുന്നത് സംബന്ധിച്ച് പലപ്പോഴും കോടതി ഇടപെടാറുണ്ട്. 2023 ഓഗസ്റ്റ് 15, 2025 നവംബർ 20, 2026 ജൂലായ് 16 തീയതികളിൽ കോടതി ഇത്തരം പരിശോധനകൾ കർശനമായി നടത്തണമെന്നു കാട്ടി ഉത്തരവുകൾ ഇറക്കിയിരുന്നു.

ഇത്തരം മാനദണ്ഡങ്ങൾ പാലിച്ച് ഓഗസ്റ്റ് അഞ്ചിന് അടൂരിൽ ഒരു വാഹനത്തിന് 5,000 രൂപ പിഴയിട്ടു. എന്നാൽ, പ്രളയ ദുരിതാശ്വാസ പ്രവർത്തനത്തിന് എത്തിയ വാഹനത്തിന് പിഴ ചുമത്തിയെന്നാരോപിച്ച് രണ്ട് മോട്ടോർ വാഹനവകുപ്പ് ഉദ്യോഗസ്ഥരെ വകുപ്പ് സസ്‌പെൻഡ് ചെയ്തിരുന്നു. നിയമവിരുദ്ധമായി ലൈറ്റുകൾ ഘടിപ്പിച്ചതിനാണ് പിഴയീടാക്കിയത്.

Content Highlights: Motor Vehicle Department instructed MVEs to enforce court orders against high-intensity lights and illegal vehicle modifications., A fine of Rs 5,000 per unit applies for violations including bright lights, protruding tyres, and modified exhausts., Inspections and compliance reports are mandated under strict court guidelines.