വാഹനത്തില്‍ 'കേരള സ്റ്റേറ്റ്' ബോര്‍ഡ് വെച്ചാല്‍ 'വിവരം അറിയും', നടപടിക്കൊരുങ്ങി എം.വി.ഡി.
കാക്കനാട്: സ്വകാര്യ വാഹനങ്ങളില്‍ 'കേരള സര്‍ക്കാര്‍' എന്ന ബോര്‍ഡ് ഉപയോഗിക്കുന്ന സര്‍ക്കാര്‍ ജീവനക്കാര്‍ക്കെതിരേ മോട്ടോര്‍ വാഹനവകുപ്പ് ശക്തമായ നടപടിയിലേക്ക്. നിയമം ലംഘിച്ച് ഈ ബോര്‍ഡ് വെയ്ക്കുന്നവരെ കണ്ടെത്താന്‍ വാഹനവകുപ്പ് പട്ടിക തയ്യാറാക്കി തുടങ്ങി. പിടിവീണാല്‍ കടുത്ത ശിക്ഷാനടപടികള്‍ സ്വീകരിക്കുമെന്ന് അധികൃതര്‍ വ്യക്തമാക്കി.
നിയമ പ്രകാരമല്ലാതെ സ്വകാര്യ വാഹനത്തില്‍ 'കേരള സ്റ്റേറ്റ്' ബോര്‍ഡ് ഉപയോഗിക്കാന്‍ പാടില്ല. രേഖാമൂലം വകുപ്പ് മേധാവിയെ അറിയിച്ച ശേഷമായിരിക്കും നടപടിയിലേക്ക് നീങ്ങുകയെന്ന് അധികൃതര്‍ പറഞ്ഞു. ബാങ്കിലെയും ഇന്‍ഷുറന്‍സ് ഓഫീസിലെയും ഉദ്യോഗസ്ഥര്‍ കേരള സ്റ്റേറ്റ്, ഗവണ്‍മെന്റ് ഓഫ് ഇന്ത്യ എന്നീ ബോര്‍ഡുകള്‍ വാഹനത്തില്‍ പതിപ്പിക്കുന്നതായി ശ്രദ്ധയില്‍പ്പെട്ടിട്ടുണ്ട്.
ഇവര്‍ക്കെതിരേയും നടപടി സ്വീകരിക്കും. വി.ഐ.പി. സന്ദര്‍ശനം പോലുള്ള വിശേഷ സന്ദര്‍ഭങ്ങളില്‍ ടാക്സികളില്‍ 'കേരള സ്റ്റേറ്റ്' ബോര്‍ഡ് സ്ഥാപിക്കാറുണ്ട്. ഇത് മോട്ടോര്‍ വാഹനവകുപ്പിന്റെ അനുമതിയോടെ മാത്രമാണെന്ന് അധികൃതര്‍ പറഞ്ഞു.
സര്‍ക്കാര്‍ സ്ഥാപനങ്ങളിലേക്ക് ടാക്സികള്‍ വാടകയ്ക്ക് വിളിച്ചും ഇത്തരം തട്ടിപ്പ് നടത്തുന്നത് വര്‍ധിച്ചുവരുന്നുണ്ട്. ആഴ്ചകള്‍ക്ക് മുന്‍പ് മോട്ടോര്‍ വാഹനവകുപ്പ് നടത്തിയ പരിശോധനയില്‍ ഇത്തരത്തിലുള്ള രണ്ട് വാഹനങ്ങള്‍ പിടിച്ചിരുന്നു.
Content Highlights: MVD Kerala taking action against use of kerala state board in private vehicle, Government Vehicle