കരട് EV നയം: 2028 ഏപ്രിൽ മുതൽ ഡൽഹിയിൽ ഇലക്ട്രിക് ടൂവീലറുകൾക്ക് മാത്രം രജിസ്ട്രേഷൻ
ഡൽഹിയിൽ 2028 ഏപ്രിൽ ഒന്ന് മുതൽ ഇലക്ട്രിക് ഇരുചക്ര വാഹനങ്ങൾക്ക് മാത്രമേ രജിസ്ട്രേഷൻ ലഭിക്കൂ. ഡൽഹി സർക്കാർ പുറത്തിറക്കിയ ഇലക്ട്രിക് വാഹന (ഇ.വി) നയം 2026-2030 ന്റെ കരടിലാണ് ഇക്കാര്യം വ്യക്തമാക്കുന്നത്. മുച്ചക്ര വാഹനങ്ങൾക്കും നിയന്ത്രണം വരും. 2027 ജനുവരി ഒന്ന് മുതൽ ഡൽഹിയിൽ ഇലക്ട്രിക് ത്രീ-വീലറുകൾക്ക് മാത്രമേ രജിസ്ട്രേഷന് അനുമതി ലഭിക്കൂ എന്നും കരട് നയം വ്യക്തമാക്കുന്നു
വാണിജ്യ വാഹനങ്ങൾക്കുള്ള നിയന്ത്രണങ്ങളും നയത്തിൽ ഉൾപ്പെടുന്നുണ്ട്. 2026 ജനുവരി ഒന്ന് മുതൽ 3.5 ടൺ വരെയുള്ള ചെറിയ ചരക്ക് വാഹനങ്ങൾ ഉൾപ്പെടെ പുതിയ പെട്രോൾ- ഡീസൽ എഞ്ചിൻ വാഹനങ്ങൾക്ക് അനുമതിയുണ്ടാവില്ല. സ്കൂൾ ബസുകൾ ഘട്ടം ഘട്ടമായി ഇലക്ട്രിഫൈ ചെയ്യും. വാടകയ്ക്കും പാട്ടത്തിന് എടുത്തവയുമായ എല്ലാ സർക്കാർ വാഹനങ്ങളും 100 ശതമാനം ഇലക്ട്രിക് മൊബിലിറ്റിയിലേക്ക് മാറും. എല്ലാ പുതിയ സർക്കാർ വാഹനങ്ങളും ഇനി ഇലക്ട്രിക് ആയിരിക്കും. പുതിയ സംസ്ഥാനാന്തര ബസുകളും ഇലക്ട്രിക് ആയി മാറും. എന്നാൽ ഭാവിയിൽ ഹൈഡ്രജൻ പോലുള്ള സാങ്കേതികവിദ്യകൾക്ക് ഇതിൽ വ്യവസ്ഥയുണ്ട്.
2.25 ലക്ഷം രൂപ വരെ വിലയുള്ള ഇലക്ട്രിക് ഇരുചക്രവാഹനങ്ങൾക്ക് ബാറ്ററി ശേഷിയുമായി ബന്ധപ്പെട്ട സബ്സിഡികൾ ലഭിക്കും. ആദ്യ വർഷം ഉയർന്ന പിന്തുണ ലഭിക്കുമെങ്കിലും അതിനുശേഷം ആനുകൂല്യങ്ങൾ കുറയും. ഇലക്ട്രിക് കാറുകൾക്ക് വ്യവസ്ഥകൾക്ക് വിധേയമായി 1 ലക്ഷം രൂപ വരെ പ്രോത്സാഹനം ലഭിക്കും. വിവിധ വിഭാഗങ്ങളിൽപ്പെട്ട വാഹനങ്ങൾക്ക് 10,000 രൂപ മുതൽ 1 ലക്ഷം രൂപ വരെ സ്ക്രാപ്പേജ് പ്രോത്സാഹനങ്ങളും നയം വാഗ്ദാനം ചെയ്യുന്നുണ്ട്. ഇതുകൂടാതെ അർഹതയുള്ള ഇലക്ട്രിക് വാഹനങ്ങൾക്ക് റോഡ് ടാക്സിലും രജിസ്ട്രേഷൻ ഫീസിലും 100 ശതമാനം ഇളവും കരട് നിർദ്ദേശിക്കുന്നു, അതേസമയം ഹൈബ്രിഡ് വാഹനങ്ങൾക്ക് ഭാഗിക ഇളവുകൾ ലഭിക്കും. ഉയർന്ന വിലയുള്ള ഇലക്ട്രിക് കാറുകൾക്ക് ഇളവിനുള്ള അർഹതയ്ക്ക് പരിധികളുണ്ട്.
ഇവി ചാർജിംഗ് അടിസ്ഥാന സൗകര്യങ്ങളുടെ ദ്രുതഗതിയിലുള്ള വിപുലീകരണം നയത്തിന്റെ പ്രധാന ആകർഷണമാണ്. ചാർജിങ്, ബാറ്ററി സ്വാപ്പിങ് നെറ്റ്വർക്ക് വിപുലീകരണം, പദ്ധതി നടപ്പാക്കൽ, ഗ്രേഡ് സംയോജനം എന്നിവയുടെ ചുമതലയുള്ള നോഡൽ ഏജൻസിയായി ഡൽഹി ട്രാൻസ്കോ ലിമിറ്റഡിനെ നിയോഗിച്ചിട്ടുണ്ട്. വാഹന നിർമ്മാതാക്കൾ ഡീലർഷിപ്പുകളിൽ ചാർജിംഗ് പോയിന്റുകൾ സ്ഥാപിക്കാനും ആവശ്യപ്പെടും. ഇ.വി നിർമാതാക്കളോട് ആവശ്യമായ ഇവി വിതരണം ഉറപ്പാക്കാൻ നിർദേശിക്കും.
അടുത്ത ദശകത്തിൽ ഇലക്ട്രിക് മൊബിലിറ്റിയിലേക്കുളള വലിയ മാറ്റത്തിനുള്ള റോഡ്മാപ്പ് കരട് നയം വിശദീകരിക്കുന്നു. ഡൽഹി ഗതാഗത വകുപ്പിന്റെ ഇവി സെൽ പുറത്തിറക്കിയ കരട് അന്തിമമാക്കുന്നതിന് മുമ്പ് പൊതുജനാഭിപ്രായം ശേഖരിക്കുന്നതിനായി 30 ദിവസത്തേക്ക് ലഭ്യമാക്കും. ശൈത്യകാലത്തടക്കം ഡൽഹിയുടെ വായു മലിനീകരണ പ്രതിസന്ധിക്ക് പ്രധാന കാരണമാകുന്ന വാഹന മലിനീകരണം കുറയ്ക്കുക എന്നതാണ് ഈ നയം ലക്ഷ്യമിടുന്നത്.
Content Highlights: Fixed phase-out timelines for petrol two-wheelers and three-wheelers starting 2027., Aggregator fleets mandated to shift to electric by 2026., Tiered subsidy structure for EVs and scrappage incentives up to Rs 1 lakh., Delhi Transco Limited to lead massive charging network expansion., Focus on circular economy with battery recycling and EPR mandates.