ഇന്ത്യന് വിപണിയില് കിതച്ച് ടെസ്ല; നവംബറില് വിറ്റത് 48 മോഡല് Y കാറുകള്മാത്രം
2025-ൽ മോഡൽ Y അവതരിപ്പിച്ചുകൊണ്ടാണ് ഇലോൺ മസ്കിൻ്റെ ഉടമസ്ഥതയിലുള്ള ഇലക്ട്രിക് വാഹന കമ്പനിയായ ടെസ്ല ഇന്ത്യൻ വിപണിയിൽ പ്രവേശിച്ചത്. എന്നാൽ, അവതരിപ്പിച്ചത് മുതൽ ഈ ഇലക്ട്രിക് കാറിന് വിപണിയിൽനിന്ന് തണുത്ത പ്രതികരണമായിരുന്നു ലഭിച്ചത്. വിൽപനയും മന്ദഗതിയിലായിരുന്നു.
IANS-ൻ്റെ റിപ്പോർട്ട് പ്രകാരം, 2025 സെപ്റ്റംബറിൽ ഡെലിവറി ആരംഭിച്ചതിന് ശേഷം യുഎസ് ആസ്ഥാനമായുള്ള ഈ ബ്രാൻഡ് രാജ്യത്ത് 157 യൂണിറ്റുകളുടെ വിൽപനയാണ് രേഖപ്പെടുത്തിയത്. വാഹൻ പോർട്ടലിലെ നവംബറിലെ ഡാറ്റ അനുസരിച്ച് ബ്രാൻഡ് വിറ്റതാകാട്ടെ വെറും 48 കാറുകളും എതിരാളികളേക്കാൾ വളരെ പിന്നിലാണിത്.
വാഹൻ ഡാറ്റ അനുസരിച്ച്, ബിഎംഡബ്ല്യു, മെഴ്സിഡീസ് ബെൻസ് തുടങ്ങിയ മറ്റ് ആഡംബര കാർ നിർമാതാക്കൾ നവംബറിൽ യഥാക്രമം 267, 69 ഇവികളുടെ വിൽപനയുമായി ടെസ്ലയെ മറികടന്നു.
2025 സെപ്റ്റംബറിൽ ബ്രാൻഡ് നേരിട്ട സാഹചര്യങ്ങൾക്ക് സമാനമാണിത്. വാഹൻ ഡാറ്റ അനുസരിച്ച്, 2025 സെപ്റ്റംബറിൽ ബിഎംഡബ്ല്യു, മെഴ്സിഡീസ് ബെൻസ് തുടങ്ങിയ എതിരാളികളായ ആഡംബര കാർ നിർമാതാക്കൾ യഥാക്രമം 307, 95 യൂണിറ്റുകളുടെ വിൽപനയുമായി ടെസ്ലയെ മറികടന്നു.
കൂടാതെ, വോൾവോ തങ്ങളുടെ ഇലക്ട്രിക് വാഹനങ്ങളുടെ 22 യൂണിറ്റുകളുടെ വിൽപനയും രേഖപ്പെടുത്തി. എന്നാൽ മാസം അവസാനിക്കുന്നതിന് മുൻപ് ടെസ്ലയുടെ വിൽപന ഏകദേശം 60 യൂണിറ്റുകളിൽ ഒതുങ്ങി.
മീഡിയ റിപ്പോർട്ടുകൾ പ്രകാരം, സെപ്റ്റംബർ പകുതിയോടെ ബ്രാൻഡ് 600-ൽ അധികം ബുക്കിങ്ങുകൾ നേടിയിരുന്നു. ബിബിസി റിപ്പോർട്ട് അനുസരിച്ച്, സെപ്റ്റംബറിൽ ഡെലിവറി ആരംഭിച്ചപ്പോൾ ഈ ഓർഡറുകളിൽ ഒരു ചെറിയ ഭാഗം മാത്രമാണ് വിൽപനയായി മാറിയത്. അതേസമയം, ഉത്സവകാല ആവശ്യകതയും നികുതി ഇളവുകളും പിന്തുണച്ചതിനാൽ മത്സരിക്കുന്ന പ്രീമിയം മോഡലുകൾ ഉയർന്ന വിൽപന നേടി.
അതേസമയം, ഇന്ത്യയിൽ തങ്ങളുടെ സാന്നിധ്യം വർധിപ്പിക്കുന്നതിനായി ടെസ്ല കിണഞ്ഞു പരിശ്രമിക്കുകയാണ്. അടുത്തിടെ കമ്പനി ഗുരുഗ്രാമിൽ തങ്ങളുടെ ആദ്യത്തെ ഓൾ-ഇൻ-വൺ ടെസ്ല സെൻ്റർ തുറന്നിരുന്നു. സെക്ടർ 48-ലെ ഓർക്കിഡ് ബിസിനസ് പാർക്കിൽ സ്ഥിതിചെയ്യുന്ന ഈ പുതിയ സൗകര്യം റീട്ടെയിൽ, വിൽപനാനന്തര സേവനം, ഡെലിവറി, ചാർജിങ് ഇൻഫ്രാസ്ട്രക്ചർ എന്നിവ സംയോജിപ്പിക്കുന്നതിനായി രൂപകൽപന ചെയ്തിട്ടുള്ളതാണ്.
റിയർ-വീൽ ഡ്രൈവ്, ലോങ് റേഞ്ച് റിയർ-വീൽ ഡ്രൈവ് എന്നിങ്ങനെ രണ്ട് വേരിയൻ്റുകളിലാണ് ഇന്ത്യയിൽ ടെസ്ല മോഡൽ Y ലഭിക്കുന്നത്. ഇവ യഥാക്രമം 500 കി.മീ, 622 കി.മീ റേഞ്ച് വാഗ്ദാനം ചെയ്യുന്നു. മോഡൽ Y-യുടെ അടിസ്ഥാന വില 59.89 ലക്ഷം രൂപയിൽ ആരംഭിക്കുന്നു. നിലവിൽ, ടെസ്ല റിയർ-വീൽ ഡ്രൈവ് വേരിയൻ്റിൻ്റെ ഡെലിവറിയാണ് ആരംഭിച്ചിരിക്കുന്നത്. അതേസമയം ലോങ് റേഞ്ച് ട്രിമ്മിൻ്റെ ഡെലിവറി ആരംഭിക്കാനിരിക്കുന്നതേയുള്ളൂ.
Content Highlights: Tesla Model Y launched in India with slow sales, facing stiff competition from BMW & Mercedes. Learn about its performance and future in the Indian EV market.