പ്രതാപം മങ്ങിയ ചുവന്ന ചെകുത്താന്മാർ; തിരിച്ചുവരുമോ യുണൈറ്റഡ്?

ഒരുകാലത്ത് ഇംഗ്ലീഷ് ഫുട്‌ബോളിന്റെ അവസാനവാക്കായിരുന്നു മാഞ്ചെസ്റ്റർ യുണൈറ്റഡ്. സർ അലക്‌സ് ഫെർഗൂസന്റെ കാലത്ത് എതിരാളികൾക്ക് പേടിസ്വപ്നമായിരുന്ന ഓൾഡ് ട്രാഫോർഡ് ഇന്ന് സ്വന്തം ആരാധകരുടെ നിരാശയുടെ വേദിയായി മാറുകയാണ്. പ്രീമിയർ ലീഗ് കിരീടങ്ങൾക്കായി പോരാടിയിരുന്ന ചുവന്ന ചെകുത്താന്മാർക്ക് ഇപ്പോൾ തരംതാഴ്ത്തൽ മേഖലയോട് ചേർന്നുനിൽക്കുന്ന അവസ്ഥയാണ്.

പ്രശ്‌നം തോൽവികളിൽ മാത്രം ഒതുങ്ങുന്നില്ല. കളിക്കളത്തിൽ വ്യക്തമായൊരു ശൈലി കണ്ടെത്താനാകാത്തതും പ്രതിരോധത്തിലെ പിഴവുകളും ആക്രമണത്തിലെ സ്ഥിരതയില്ലായ്മയും യുണൈറ്റഡിനെ അലട്ടുന്നു. മൈക്കൽ കാരിക്കിന്റെ പരിശീലനത്തിന് കീഴിലും ടീമിന് പ്രതീക്ഷിച്ച മുന്നേറ്റം സൃഷ്ടിക്കാനായിട്ടില്ല.

2013-ൽ അലക്‌സ് ഫെർഗൂസൺ വിരമിച്ചതിനുശേഷം യുണൈറ്റഡിന് പ്രീമിയർ ലീഗ് കിരീടം നേടാനായിട്ടില്ല. പരിശീലകരും താരങ്ങളും മാറിമാറി വന്നിട്ടും പഴയ പ്രതാപത്തിലേക്കുള്ള മടക്കം ഇപ്പോഴും അകലെയാണ്. വലിയ തുക മുടക്കി താരങ്ങളെ സ്വന്തമാക്കുന്നതുകൊണ്ടുമാത്രം ഒരു മികച്ച ടീമിനെ വാർത്തെടുക്കാനാകില്ലെന്നതിന്റെ ഉദാഹരണമായി യുണൈറ്റഡിന്റെ സമീപകാല ചരിത്രം മാറുന്നു.

ഇംഗ്ലീഷ് ഫുട്‌ബോളിന്റെ സിംഹാസനത്തിൽനിന്ന് തരംതാഴ്ത്തൽ ഭീഷണിയുടെ വക്കിലേക്ക് മാഞ്ചെസ്റ്റർ യുണൈറ്റഡിന്റെ വീഴ്ച ഒരു ക്ലബ്ബിന്റെ മാത്രം കഥയല്ല. വിജയചരിത്രവും ലോകമെമ്പാടുമുള്ള ആരാധകപിന്തുണയും മാത്രം കളിക്കളത്തിൽ വിജയം ഉറപ്പുനൽകില്ലെന്ന ഓർമപ്പെടുത്തൽ കൂടിയാണത്.

ഓൾഡ് ട്രാഫോർഡിലെ ആരാധകർ ഇപ്പോഴും കാത്തിരിക്കുകയാണ്. പഴയ പ്രതാപത്തിന്റെ ഓർമകൾക്കല്ല, പുതിയൊരു വിജയയുഗത്തിന്റെ തുടക്കത്തിനായി.

Content Highlights: Manchester United faces a severe decline from Premier League contenders to near the relegation zone. Lack of playing style, defensive errors, and inconsistent attack continue to plague the team. Post-Sir Alex Ferguson era struggles highlight that high spending does not guarantee success.