തലച്ചോറിൽ നുഴഞ്ഞുകയറും, 'സോംബി'കളാക്കും; ചിലന്തികളെ ബാധിക്കുന്ന ഫംഗസിനെ കണ്ടെത്തി

വികൃതമായ രൂപമുള്ള, ചിന്താശേഷിയില്ലാത്ത, കണ്മുന്നിൽപ്പെടുന്നവരെയെല്ലാം ആക്രമിക്കാനോടിക്കുന്ന സോംബികളെ നമ്മൾ സിനിമകളിലും വെബ്സീരീസുകളിലുമെല്ലാം കണ്ടിട്ടുണ്ട്. ഇപ്പോഴിതാ ജീവികളുടെ തലച്ചോറിൽ നുഴഞ്ഞുകയറി അവരെ സോംബികളാക്കിമാറ്റുന്ന ഫംഗസിനെ കണ്ടെത്തിയിരിക്കുകയാണ് ശാസ്ത്രജ്ഞർ. പേടിക്കണ്ട, മനുഷ്യരിലല്ല. അയർലൻഡിലെ ഗുഹകളിൽ കാണപ്പെടുന്ന ചില ചിലന്തികളെയാണ് ഈ ഫംഗസ് ബാധിക്കുന്നത്.

ബി.ബി.സി.യുടെ വിന്റർവാച്ച് എന്ന പരിപാടിയുടെ ഷൂട്ടിങ്ങിനിടെ 2021-ലാണ് ഈ ‘സോംബി ചിലന്തികളെ’ ആദ്യമായി കണ്ടെത്തുന്നത്. ജിബെല്ലുലാ അറ്റൻബെറോഗി (Gibellula attenboroughii) എന്ന ഈ ഫംഗസ് തലച്ചോറിലെ ഡോപ്പമിൻ എന്ന ഹോർമോൺ ഉത്‌പാദനത്തെ ബാധിക്കുന്നു. ഇതോടെ ഫംഗസിനു വേണ്ടരീതിയിൽ പ്രവർത്തിക്കാൻ തയ്യാറാകുന്ന ചിലന്തികൾ സുരക്ഷിതമായ വലവിട്ട് ഗുഹയുടെ ഭിത്തികളിലേക്കും മേൽക്കൂരയിലേക്കും ഇറങ്ങിവന്നശേഷം അവിടെവെച്ച് ജീവൻ വെടിയുന്നു.