രേഖയില്ലാതെ ആധാർ ഓൺലൈനായി അപ്‌ഡേറ്റ് ചെയ്യാം; അറിയാം നവംബർ ഒന്ന് മുതലുള്ള മാറ്റങ്ങൾ
നവംബർ മാസം തുടങ്ങാനിരിക്കേ നവംബർ ഒന്നുമുതൽ നിലവിൽ വരുന്ന മാറ്റങ്ങളൊന്ന് നോക്കിയാലോ... ആധാർ അപ്‌ഡേറ്റഷനിലാണ് പ്രധാനമാറ്റം. ഒരു രേഖയും അപ്‌ലോഡ് ചെയ്യാതെ തന്നെ ആധാർ ഉടമകൾക്ക് അവരുടെ പേര്, വിലാസം, ജനനത്തീയതി, മൊബൈൽ നമ്പർ എന്നിവ ഓൺലൈനായി അപ്‌ഡേറ്റ് ചെയ്യാൻ കഴിയും. വിരലടയാളം, ഐറിസ് സ്കാൻ തുടങ്ങിയ ബയോമെട്രിക് അപ്‌ഡേറ്റുകൾക്കായി മാത്രമേ അക്ഷയകേന്ദ്രങ്ങളിൽ പോകേണ്ടിവരൂ. അപ്‌ഡേറ്റുകൾക്കുള്ള സേവന നിരക്കിലും മാറ്റമുണ്ട്. പേര്, വിലാസം, ജനനത്തീയതി അല്ലെങ്കിൽ മൊബൈൽ നമ്പർ എന്നിവയിലെ അപ്‌ഡേറ്റുകൾക്ക് 75 രൂപയും ബയോമെട്രിക് മാറ്റങ്ങൾക്ക് 125 രൂപയും ഇനി ചിലവാകും.
ബാങ്കിംഗ് മേഖലയിലും ചില മാറ്റങ്ങളുണ്ട്. 2025 ലെ ബാങ്കിംഗ് നിയമ (ഭേദഗതി) നിയമത്തിലെ പ്രധാന വകുപ്പുകൾ നവംബർ 1 മുതലാണ് പ്രാബല്യത്തിൽ വരിക. ഇത്പ്രകാരം ബാങ്ക് അക്കൗണ്ടുകൾ, ലോക്കറുകൾ എന്നിവയ്ക്കായി നാല് നോമിനികളെ വരെ ബാങ്കുകൾ അനുവദിക്കും. അടിയന്തര സാഹചര്യങ്ങളില്‍ നിയമപരമായ അവകാശികൾക്ക് ഇതുവഴി കൂടുതൽ എളുപ്പത്തിൽ ഫണ്ട് ക്ലെയിം ചെയ്യാം. അതുപോലെ നാമനിർദ്ദേശ പ്രക്രിയയും ബാങ്കുകൾ ലളിതമാക്കും. ഇതോടെ ഒത്തുതീർപ്പുകളിലെ തർക്കങ്ങൾക്കും കാലതാമസത്തിനുമുള്ള സാധ്യത കുറയും.