ട്രെയിൻ യാത്രക്കാർക്കും കർശനമായ ബാഗേജ് നിയന്ത്രണങ്ങൾ, ഭാര പരിധി കഴിഞ്ഞാൽ പിഴ

വിമാനത്തിലൊന്നുമല്ലല്ലോ പോകുന്നേ, ട്രെയിനിൽ എത്ര ബാ​ഗ് വേണമെങ്കിലും കൊണ്ടുപോകാലോ എന്ന ചിന്ത വേണ്ട. ട്രെയിൻ യാത്രക്കാർക്കും കർശനമായ ബാഗേജ് നിയന്ത്രണങ്ങൾ ഏർപ്പെടുത്താനൊരുങ്ങുകയാണ് ഇന്ത്യൻ റെയിൽവേ. പ്രധാന റെയിൽവേ സ്റ്റേഷനുകളിൽ ഇലക്ട്രോണിക് വെയ്സിംഗ് മെഷീനുകൾ വഴി യാത്രക്കാർ അവരുടെ ലഗേജ് കടത്തിവിടണം. ല​ഗേജുകൾ അനുവദനീയമായ ഭാര പരിധികൾക്കുള്ളിലാവണം. പരിധി കഴിഞ്ഞാൽ പിഴ അടയ്ക്കേണ്ടി വരും. അല്ലെങ്കിൽ അധിക ചാർജ് ഈടാക്കും. ഭാര പരിധിക്ക് താഴെയാണെങ്കിലും സ്ഥലം തടസ്സപ്പെടുത്തുന്ന വലിയ ബാഗുകൾക്ക് പിഴ ചുമത്തിയേക്കാം. 

ട്രെയിനുകളിൽ ക്ലാസ് അനുസരിച്ച് ലഗേജ് പരിധി വ്യത്യാസപ്പെടും. എസി ഫസ്റ്റ് ക്ലാസ് യാത്രക്കാർക്ക് 70 കിലോ വരെയും എസി ടു ടയർ യാത്രക്കാർക്ക് 50 കിലോ വരെയും എസി ത്രീ ടയർ, സ്ലീപ്പർ ക്ലാസ് യാത്രക്കാർക്ക് 40 കിലോ വരെയും അനുവദിച്ചിട്ടുണ്ട്. ജനറൽ ക്ലാസ് യാത്രക്കാർക്ക് 35 കിലോ ആയി പരിമിതപ്പെടുത്തും. കൂടുതൽ കാര്യക്ഷമവും സുഖകരവുമായ യാത്രാനുഭവം ഉറപ്പാക്കുക എന്നതാണ് ഇതിലൂടെ ലക്ഷ്യം വെക്കുന്നത്.