'ക്ഷമ ചോദിക്കുന്നു, എനിക്ക് കൊമ്പൊന്നുമില്ല', വാഹനാപകടത്തില്‍ നടന് ബൈജുവിന്റെ വിശദീകരണം
തിരുവനന്തപുരം നഗരത്തിലുണ്ടായ വാഹനാപകടത്തില്‍ വിശദീകരണവുമായി നടന് ബൈജു സന്തോഷ്. ഫെയ്‌സ്ബുക്ക് വീഡിയോയിലൂടെയാണ് നടന് വിശദീകരണം നല്‍കിയത്. ടയര്‍ പൊട്ടിയതിനാലാണ് വാഹനത്തിന്റെ നിയന്ത്രണം നഷ്ടമായതെന്നും മദ്യപിച്ചിരുന്നില്ലെന്നും ബൈജു പറഞ്ഞു.
''65 കിലോമീറ്റര്‍ വേഗതയിലാണ് സഞ്ചരിച്ചത്. വെള്ളയമ്പലം ജങ്ഷനില്‍വെച്ച് മുന്നിലെ ടയര്‍ പൊട്ടിയപ്പോള്‍ കാറിന്റെ നിയന്ത്രണം നഷ്ടമായി. തിരിക്കാന്‍ നോക്കിയപ്പോള്‍ തിരിഞ്ഞില്ല, അങ്ങനെ സ്‌കൂട്ടറുകാരന്റെ ദേഹത്തുതട്ടി. അപ്പോള്‍ തന്നെ പുറത്തിറങ്ങി ആ ചെറുപ്പക്കാരനോട് ആശുപത്രിയില്‍ പോകണമോ എന്ന് ചോദിച്ചു. വേണ്ട, കുഴപ്പമൊന്നുമില്ലെന്നാണ് അപ്പോള്‍ പറഞ്ഞത്. അയാള്‍ക്ക് ഒടിവോ ചതിവോ ഒന്നുമില്ല, അയാള്‍ക്കും പരാതിയില്ല. പോലീസ് നിയമപരമായി കേസെടുത്തിട്ടുണ്ട്.