തിരിച്ചറിയപ്പെട്ടത് ആയിരത്തോളം സ്പീഷിസുകളെ, ഇന്ന് ഭീഷണിയിൽ; മടങ്ങിവരുമോ ടറാൻടുല ചിലന്തികൾ
ചിലന്തികളെന്ന് കേള്‍ക്കുമ്പോള്‍ മനസിലേക്ക് എത്തുന്ന ഒരു രൂപമുണ്ട്. എന്നാല്‍ ഇവയില്‍ നിന്നെല്ലാം വ്യത്യസ്തമാണ് ടറാന്‍ടുലകളെന്നറിയപ്പെടുന്ന ചിലന്തികള്‍. കാര്‍ട്ടൂണിലും മറ്റും കണ്ടുപരിചയമുള്ള ചിലന്തിക്ക് സമാനമാണ് ഇവ. രോമാവൃതമായ ശരീരം ഇവയുടെ പ്രത്യേകതകളിലൊന്നാണ്. മറ്റ് ചിലന്തികളുമായി താരതമ്യം ചെയ്യുമ്പോള്‍ ടറാന്‍ടുല ചിലന്തിക്ക് വലിപ്പവും കൂടുതലാണ്. കണ്ടാല്‍ ഭീമനായതിനാല്‍ ആരുമൊന്ന് പേടിക്കുകയും ചെയ്യും. നിലവില്‍ ആയിരത്തോളം സ്പീഷിസില്‍പ്പെടുന്ന ടറാന്‍ടുല ചിലന്തികളെയാണ് തിരിച്ചറിഞ്ഞിട്ടുള്ളത്. പല കാരണങ്ങള്‍ കൊണ്ടും ഈ ചിലന്തി സ്പീഷിസ് ഭീഷണി നേരിടുകയാണ്.
മറ്റ് ജീവജാലങ്ങളെ വളര്‍ത്തുന്നത് പോലെ തന്നെ ടറാന്‍ടുല ചിലന്തികളെയും അരുമകളായി വളര്‍ത്തിപ്പോരുന്നുണ്ട്. 1970-80-കളിലാണ് ടറാന്‍ടുലകളെ അരുമകളായി വളര്‍ത്തുന്നത് വ്യാപകമായി തുടങ്ങുന്നത്. എന്നാല്‍ ടറാന്‍ടുല ചിലന്തികളെ മറ്റ് ജീവജാലങ്ങളെ മെരുക്കി വളര്‍ത്തുന്നത് പോലെ വളര്‍ത്തിയെടുക്കാന്‍ സാധിക്കില്ലെന്നാണ് വിദഗ്ധര്‍ പറയുന്നത്. അരുമകളായി വളര്‍ത്തുന്ന ചില ടറാന്‍ടുല ചിലന്തികളെ വനപ്രദേശത്ത് നിന്ന് പിടികൂടിയതാകാം. സ്വാഭാവിക ആവാസവ്യവസ്ഥയില്‍ നിന്ന് ഇവയെ പിടികൂടി മാറ്റുന്നത് എണ്ണത്തില്‍ കുറവ് വരുത്തിയേക്കും. എന്നാല്‍ ഇത് മാത്രമല്ല ടറാന്‍ടുല ചിലന്തികള്‍ക്ക് വെല്ലുവിളിയാകുന്നത്.