വാട്സാപ്പിൽ ഇനി ആറക്ക പിൻ വേണ്ട! സുരക്ഷ വർധിപ്പിക്കാൻ വരുന്നു വമ്പൻ ഫീച്ചർ
ഉപയോക്താക്കളുടെ അക്കൗണ്ട് സുരക്ഷ കൂടുതൽ ശക്തമാക്കുന്നതിനായി വാട്സാപ്പ് പുതിയ മാറ്റത്തിനൊരുങ്ങുന്നു. ഇതിന്റെ ഭാഗമായി നിലവിൽ അക്കൗണ്ട് സുരക്ഷയ്ക്കായി നൽകുന്ന ആറക്ക പിൻ നമ്പറുള്ള ടൂ-ഫാക്ടർ ഓതന്റിക്കേഷന് പകരമായി ഉടൻ തന്നെ പാസ്വേഡുകൾ ഉപയോഗിക്കാൻ സാധിച്ചേക്കും. വാട്സാപ്പ് ട്രാക്കർ വെബ്സൈറ്റായ വാബീറ്റാഇൻഫോ (WaBetaInfo) ആണ് ഈ പുതിയ അപ്ഡേറ്റിനെക്കുറിച്ചുള്ള വിവരങ്ങൾ പങ്കുവെച്ചത്.
നിലവിൽ വികസന ഘട്ടത്തിലുള്ള ഈ പാസ്വേഡ് ഫീച്ചർ വൈകാതെ തന്നെ ബീറ്റാ ഉപയോക്താക്കൾക്ക് ലഭ്യമാകുമെന്ന് പ്രതീക്ഷിക്കുന്നു. അക്കങ്ങളും അക്ഷരങ്ങളും ഉൾപ്പെടുന്ന പാസ്വേഡുകൾ ഉപയോഗിക്കാൻ സാധിക്കുന്നതിനാൽ, നിലവിലെ ആറക്ക പിൻ നമ്പറിനെക്കാൾ കൂടുതൽ സുരക്ഷ ഉറപ്പാക്കാൻ ഇതിലൂടെ സാധിക്കും. അക്കങ്ങൾ മാത്രമുള്ള പിൻ നമ്പറുകളെ അപേക്ഷിച്ച് പാസ്വേഡുകൾ തകർക്കാൻ ബുദ്ധിമുട്ടാണ് എന്നതാണ് ഇതിന്റെ ഏറ്റവും വലിയ സവിശേഷത.
ഇന്ത്യയെപ്പോലുള്ള രാജ്യങ്ങളിൽ വാട്സാപ്പ് വഴി യുപിഐ (UPI) പേയ്മെന്റുകൾ നടത്തുന്നതിനാൽ ഇത്തരം അധിക സുരക്ഷാ സംവിധാനങ്ങൾ ഏറെ സഹായകമാകും. അന്യർ ചാറ്റുകൾ പരിശോധിക്കുന്നത് തടയാൻ നിലവിൽ സ്ക്രീൻ പാറ്റേണുകൾ ഉപയോഗിക്കാറുണ്ടെങ്കിലും, അതിനെക്കാൾ ശക്തമായ ഒരു സംവിധാനമായിരിക്കും പുതിയ പാസ്വേഡ് ഫീച്ചർ.
ഈ പുതിയ പാസ്വേഡ് സംവിധാനം ഉപയോക്താക്കൾക്ക് ആവശ്യമെങ്കിൽ മാത്രം തിരഞ്ഞെടുക്കാൻ സാധിക്കുന്ന ഒന്നായിരിക്കും; ഇത് ഡിഫോൾട്ടായി അക്കൗണ്ടുകളിൽ പ്രവർത്തിക്കില്ല.
ഇതിനു പുറമെ മറ്റ് ചില പുതിയ ഫീച്ചറുകളും വാട്സാപ്പ് ഈ ആഴ്ച പുറത്തിറക്കിയിട്ടുണ്ട്. ഉപയോക്താക്കൾക്ക് ഇനി മുതൽ ഐപാഡുകളിൽ (iPad) ഫോണിന്റെ സഹായമില്ലാതെ തന്നെ ലോഗിൻ ചെയ്യാനും സ്വന്തമായി അക്കൗണ്ട് തുടങ്ങാനും സാധിക്കും. മുൻപ് ഫോണുമായി ബന്ധിപ്പിച്ച് ഒരു കമ്പാനിയൻ ഡിവൈസ് (companion device) ആയി മാത്രമേ ഐപാഡുകളിൽ വാട്സാപ്പ് ഉപയോഗിക്കാൻ സാധിച്ചിരുന്നുള്ളൂ. ഇതിന് പുറമെ വെബ്, ഡെസ്ക്ടോപ്പ് വേർഷനുകളിൽ ഉപയോഗിക്കാൻ സാധിക്കുന്ന ഒരു ഇൻ-ബിൽറ്റ് പിഡിഎഫ് റീഡറും (PDF reader), എഡിറ്ററും കൂടെ വാട്സാപ്പ് അവതരിപ്പിച്ചിട്ടുണ്ട്.
Content Highlights: WhatsApp is testing a new alphanumeric password system for two-factor authentication to replace the current 6-digit PIN, providing stronger account security alongside new updates like standalone iPad support and a built-in PDF reader.