വാട്സാപ്പിനെ ഇനി ഇന്ത്യക്കാരനായ കുനാൽ ഷാ നയിക്കും; ക്രെഡിൽ കോടികൾ നിക്ഷേപിച്ച് മെറ്റ!

മുൻനിര മെസേജിങ് പ്ലാറ്റ്ഫോമായ വാട്സാപ്പിന്റെ (WhatsApp) മേധാവി സ്ഥാനത്തുനിന്ന് വിൽ കാത്‌കാർട്ട് (Will Cathcart) പടിയിറങ്ങുന്നു. മെറ്റാ സിഇഒ മാർക്ക് സക്കർബർഗാണ് തന്റെ ഫേസ്ബുക്ക് പോസ്റ്റിലൂടെ ഈ വിവരം ഔദ്യോഗികമായി അറിയിച്ചത്. കഴിഞ്ഞ ഏഴുവർഷമായി വാട്സാപ്പിനെ നയിച്ചിരുന്നത് വിൽ കാത്‌കാർട്ട് ആയിരുന്നു.

വിൽ കാത്‌കാർട്ടിന് പകരക്കാരനായി ഇന്ത്യയിലെ പ്രമുഖ ടെക് കമ്പനിയായ ക്രെഡിന്റെ (CRED) സ്ഥാപകൻ കുനാൽ ഷാ (Kunal Shah) മെറ്റയിൽ ചേരുകയും വാട്സാപ്പിന്റെ പുതിയ മേധാവിയായി ചുമതലയേൽക്കുകയും ചെയ്യും. കുനാൽ ഷായുടെ നേതൃപാടവവും ആഗോളക്കാഴ്ചപ്പാടും ലോകത്തിലെ ഏറ്റവും വലിയ മെസേജിങ് ആപ്പായ വാട്സാപ്പിനെ കൂടുതൽ മികച്ചതാക്കാൻ സഹായിക്കുമെന്ന് മാർക്ക് സക്കർബർഗ് തന്റെ പോസ്റ്റിൽ പറഞ്ഞു. ശതകോടിക്കണക്കിന് ആളുകൾക്കും ദശലക്ഷക്കണക്കിന് ബിസിനസുകൾക്കും വാട്സാപ്പിനെ ഏറ്റവും മികച്ച സേവനമാക്കി മാറ്റാൻ കുനാൽ ഷായ്ക്കൊപ്പം പ്രവർത്തിക്കാൻ താൻ കാത്തിരിക്കുകയാണെന്നും അദ്ദേഹം കൂട്ടിച്ചേർത്തു.

ഈ തീരുമാനത്തിനൊപ്പം തന്നെ കുനാൽ ഷായുടെ കമ്പനിയായ ക്രെഡിൽ 4.5 ബില്യൺ ഡോളർ മൂല്യം കണക്കാക്കി ഏകദേശം 900 ദശലക്ഷം ഡോളർ (ഏകദേശം 8,550 കോടി രൂപ) മെറ്റാ നിക്ഷേപിക്കുമെന്നും പ്രഖ്യാപിച്ചിട്ടുണ്ട്.

വാട്സാപ്പിന്റെ ഉപയോക്താക്കളുടെ എണ്ണം 300 കോടിയിലധികം (3 billion) എത്തിക്കുന്നതിലും കമ്യൂണിറ്റിയുടെ സ്വകാര്യത ഉറപ്പുവരുത്തുന്നതിലും വിൽ കാത്‌കാർട്ട് നൽകിയ വലിയ സംഭാവനകളെ സക്കർബർഗ് പ്രശംസിച്ചു. മെറ്റയുടെ ഏറ്റവും പ്രധാനപ്പെട്ടതും കാര്യക്ഷമതയുള്ളതുമായ നേതാക്കളിൽ ഒരാളായിരുന്നു അദ്ദേഹമെന്ന് സക്കർബർഗ് പറഞ്ഞു. വാട്സാപ്പിന്റെ നേതൃസ്ഥാനം ഒഴിയുമെങ്കിലും പുതിയ ഉത്പന്നങ്ങൾ വികസിപ്പിക്കുന്നതിനായി വിൽ കാത്‌കാർട്ട് മെറ്റയിൽത്തന്നെ പുതിയ ചുമതലയിൽ തുടരുമെന്നും സക്കർബർഗ് വ്യക്തമാക്കിയിട്ടുണ്ട്.

ക്രെഡിന് പുതിയ മേധാവിയായി മിതൻ സമ്പത്ത്

കുനാൽ ഷാ വാട്സാപ്പിലേക്ക് മാറുന്നതോടെ, ക്രെഡിന്റെ പ്രവർത്തന ചുമതലകളും ഇടക്കാല സിഇഒ സ്ഥാനവും നിലവിൽ കമ്പനിയുടെ സെക്കൻഡ്-ഇൻ-കമാൻഡ് ആയ മിതൻ സമ്പത്ത് ഏറ്റെടുക്കും. മികച്ചൊരു ടീമിനെ ചുമതലകൾ ഏൽപ്പിച്ചുകൊണ്ടാണ് താൻ പടിയിറങ്ങുന്നതെന്നും കമ്പനി ഇനിയും പതിറ്റാണ്ടുകളോളം നിലനിൽക്കുന്ന ഒരു സ്ഥാപനമായി മാറുമെന്നും കുനാൽ ഷാ പ്രതികരിച്ചു. കുനാൽ ഷായുടെ കാഴ്ചപ്പാടുകൾ പിന്തുടർന്ന് കമ്പനിയെ ഒരു പബ്ലിക് കമ്പനിയാക്കി മാറ്റാൻ ശ്രമിക്കുമെന്ന് മിതൻ സമ്പത്തും വ്യക്തമാക്കി.

കുനാൽ ഷായും ക്രെഡും 2015-ൽ ആരംഭിച്ച് 2018-ൽ വിറ്റഴിച്ച ഫ്രീചാർജ് (Freecharge) എന്ന ഡിജിറ്റൽ പേയ്മെന്റ് പ്ലാറ്റ്ഫോമിന് ശേഷം കുനാൽ ഷാ സ്ഥാപിച്ച രണ്ടാമത്തെ സ്റ്റാർട്ടപ്പാണ് ക്രെഡ്. 2018-ൽ ആണ് അദ്ദേഹം ക്രെഡ് ആരംഭിച്ചത്. വെറും എട്ട് വർഷത്തിനുള്ളിൽ വലിയ വളർച്ച നേടിയ കമ്പനിക്ക് നിലവിൽ 1.7 കോടി ഉപയോക്താക്കളും ഏകദേശം 3,200 കോടി രൂപയുടെ വരുമാനവുമുണ്ട്. ടൈഗർ ഗ്ലോബൽ, Peak XV Partners), റിബ്ബിറ്റ് ക്യാപിറ്റൽ തുടങ്ങിയ നിക്ഷേപകരിൽ നിന്നായി ഇതിനോടകം 1 ബില്യൺ ഡോളറോളം മുൻപ് ക്രെഡ് നേടിയിട്ടുണ്ട്. സ്വന്തം സ്റ്റാർട്ടപ്പുകൾക്ക് പുറമെ, നിരവധി പുതിയ കമ്പനികൾക്ക് സാമ്പത്തിക സഹായം നൽകുന്ന ഇന്ത്യയിലെ ഏറ്റവും സജീവമായ എയ്ഞ്ചൽ നിക്ഷേപകരിൽ ഒരാൾ കൂടിയാണ് കുനാൽ ഷാ.

Content Highlights: Meta CEO Mark Zuckerberg announced that Will Cathcart is stepping down as the head of WhatsApp after a successful seven-year tenure, with CRED founder Kunal Shah stepping in to lead the messaging platform's next phase of global growth and business expansion.