'നാവികി'നെ ശക്തിപ്പെടുത്താന്‍ രണ്ടാം തലമുറ ഉപഗ്രഹങ്ങള്‍; എന്‍വിഎസ് 1 വിക്ഷേപണത്തിന് ഒരുങ്ങുമ്പോള്‍
നാവിക് സ്ഥാനനിര്‍ണയ സംവിധാനത്തിന് വേണ്ടിയുള്ള രണ്ടാം തലമുറ ഉപഗ്രഹ വിക്ഷേപണങ്ങള്‍ക്ക് തുടക്കമിടാൻ ഒരുങ്ങുകയാണ് ഇന്ത്യന്‍ സ്‌പേസ് റിസര്‍ച്ച് ഓര്‍ഗനൈസേഷന്‍ (ISRO). മെയ് 29 ന് ശ്രീഹരിക്കോട്ടയിലെ സതീഷ് ധവാന്‍ ബഹിരാകാശ നിലയത്തില്‍ നിന്നാണ് ജിഎസ്എല്‍വി എഫ്12/എന്‍വിഎസ്-1 ഉപഗ്രഹ വിക്ഷേപണം. ജിഎസ്എല്‍വി റോക്കറ്റിലാണ് 2232 കിലോ ഗ്രാം ഭാരമുള്ള ഉപഗ്രഹം ജിയോ സിങ്ക്രണസ് ട്രാന്‍സ്ഫര്‍ ഓര്‍ബിറ്റിലെത്തിക്കുക.
ഗതി നിര്‍ണയ, സ്ഥാനനിര്‍ണയ ആവശ്യങ്ങള്‍ക്കായി ഇന്ത്യ തുടക്കമിട്ട ദൗത്യമാണ് നാവിക് എന്നറിയപ്പെടുന്ന ഇന്ത്യന്‍ റീജ്യണല്‍ നാവിഗേഷണല്‍ സാറ്റലൈറ്റ് സിസ്റ്റം (ഐആര്‍എന്‍എസ്എസ്). മെച്ചപ്പെട്ട സൗകര്യങ്ങളുമായി തയ്യാറാക്കിയ നാവികിന്റെ രണ്ടാം തലമുറ ഉപഗ്രഹങ്ങളില്‍ ആദ്യത്തേതാണ് ഇപ്പോള്‍ വിക്ഷേപണത്തിനൊരുങ്ങിയിരക്കുന്ന എന്‍വിഎസ് 1. പുതിയ എന്‍വിഎസ് പരമ്പരയില്‍ അഞ്ച് ഉപഗ്രഹങ്ങളാണുള്ളത്. ഇതില്‍ ആദ്യ ഉപഗ്രഹത്തിന്റെ വിക്ഷേപണ തിയ്യതി മാത്രമാണ് നിശ്ചയിച്ചിട്ടുള്ളത്. തദ്ദേശീയമായി വികസിപ്പിച്ച ആറ്റോമിക് ക്ലോക്ക് ആണ് എന്‍വിഎസ് ഉപഗ്രഹങ്ങളില്‍ ഉപയോഗിക്കുക.
Content Highlights: navic gslv 17 nvs 1 satellite launch isro