ഡ്യുവല് ക്യാമറയും ഒ.എല്.ഇ.ഡി. സ്ക്രീനുമാായി ഷാവോമിയുടെ എ.ആര്. ഗ്ലാസുകള് പുറത്തിറക്കി
ഷാവോമി പുതിയ സ്മാര്ട് ഗ്ലാസുകള് പുറത്തിറക്കി. കമ്പനിയുടെ ആദ്യ മിജിയ എ.ആര്. ഗ്ലാസസ് ക്യാമറയാണ് ചൈനയില് അവതരിപ്പിച്ചത്. 2,499 യുവാന് ആണ് ഇതിന് വില. ഇത് ഏകദേശം 29,030 രൂപ വരും. ഇന്ത്യയുള്പ്പടെയുള്ള ആഗോളവിപണിയില് എപ്പോഴാണ് ഇത് അവതരിപ്പിക്കുക എന്ന് വ്യക്തമല്ല. ചൈനയില് അവതരിപ്പിച്ചിട്ടുള്ള എല്ലാ ഉല്പന്നങ്ങളും ഷാവോമി ഇന്ത്യയിലും മറ്റ് രാജ്യങ്ങളിലും അവതരിപ്പിച്ചിട്ടില്ല.
മിജിയ ഗ്ലാസസ് ക്യാമറ യുപിന് എന്ന ക്ലൗഡ് ഫണ്ടിങ് പ്ലാറ്റ്ഫോമിലൂടെയാണ് നിലവില് ഓര്ഡര് ചെയ്യാനാവുക.
ഈ സ്മാര്ട് ഗ്ലാസുകള്ക്ക് രണ്ട് വശങ്ങളിലുമായി സ്ഥാപിച്ചിട്ടുള്ള ഡ്യുവല് ക്യാമറ സംവിധാനമുണ്ട്. 50 മെഗാപിക്സല് അവാദ് ബെയര് ഫോര് ഇന് വണ് വൈഡ് ആംഗിള് ക്യാമറയും എട്ട് എം.പി. പെരിസ്കോപിക് ടെലിഫോട്ടോ ക്യാമറയുമാണിതിലുള്ളത്. സ്പ്ലിറ്റ് ഓഐഎസ് ഒപ്റ്റിക്കല് സ്റ്റെബിലൈസേഷനുണ്ട്. ഇതില് 5എക്സ് ഒപ്റ്റിക്കല് സൂം, 15എക്സ് ഹൈബ്രിഡ് സൂം സംവിധാനങ്ങളുണ്ടെന്നും കമ്പനി അവകാശപ്പെടുന്നു.
ഗ്ലാസിന്റെ ചിത്രം കാണുമ്പോള് വലിയൊരു ഉപകരണമായി തോന്നുന്നുണ്ട്. എന്നാല്, 100 ഗ്രാം ഭാരമാണ് ഇതിനുള്ളത്. അതായത് ഇത് ധരിക്കുമ്പോള് കാര്യമായ ബുദ്ധിമുട്ടൊന്നും ഉണ്ടാവില്ലെന്നാണ് കമ്പനിയുടെ വാദം.
മിജിയ ആപ്പ് ഉപയോഗിച്ച് ഈ സ്മാര്ട് ഗ്ലാസ് നിയന്ത്രിക്കാം. ഈ ആപ്പിന്റെ സഹായത്തോടെ ചിത്രങ്ങള് ഇംപോര്ട്ട് ചെയ്യാനും പങ്കുവെക്കാനും സാധിക്കും. 100 മിനിറ്റ് ദൈര്ഘ്യമുള്ള വീഡിയോ തുടര്ച്ചയായി റെക്കോര്ഡ് ചെയ്യാന് ഇതില് സാധിക്കും.
സ്നാപ്ഡ്രാഗണ് 8 ചിപ്പില് പ്രവര്ത്തിക്കുന്ന ഈ ഉപകരണത്തില് മൂന്ന് ജി.ബി. റാം ഉണ്ട്. 32 ജി.ബി. സ്റ്റോറേജും ലഭ്യമാണ്. 3000 നിറ്റ്സ് പരമാവധി ബ്രൈറ്റ്നെസ് ഉള്ള ഒ.എല്.ഇ.ഡി. സ്ക്രീനും ഈ സ്മാര്ട്ഗ്ലാസിനുണ്ട്. ബ്ലൂ ലൈറ്റ് ലെവലുകളുടെ കാര്യത്തില് ടി.യു.വി. സര്ട്ടിഫിക്കറ്റ് ഉപകരണത്തിന് ലഭിച്ചിട്ടുണ്ട്.
ശാസ്ത്ര സാങ്കേതിക വിദ്യാ രംഗത്തെ കൂടുതല് വാര്ത്തകള് ടെലഗ്രാം വഴി അറിയാം ഗ്രൂപ്പില് അംഗമാവൂ... ക്ലിക്ക് ചെയ്യൂ: https://t.me/technews_mbi
Content Highlights: Xiaomi AR glasses dual camera setup and OLED screen