ഗ്രീസ് ജംപിങ് മീറ്റില്‍ മലയാളി താരം എം.ശ്രീശങ്കറിന് സ്വര്‍ണം, ജസ്വിന് വെള്ളി

ഏതന്‍സ്: ഗ്രീസ് ജംപിങ് മീറ്റിലെ പുരുഷന്മാരുടെ ലോങ്ജംപ് മത്സരത്തില്‍ ഇന്ത്യയുടെ മലയാളിതാരം മുരളി ശ്രീശങ്കറിന് സ്വര്‍ണം. 8.18 മീറ്റര്‍ ദൂരം കണ്ടെത്തിയാണ് താരം സ്വര്‍ണമെഡല്‍ കഴുത്തിലണിഞ്ഞത്. ഈ ഇനത്തില്‍ ഇന്ത്യയുടെ തന്നെ ജസ്വിന്‍ ആല്‍ഡ്രിന്‍ വെള്ളി നേടി. 7.85 മീറ്റാണ് ജസ്വിന്‍ താണ്ടിയത്. 

ലോക അത്‌ലറ്റിക്‌സ് കോണ്ടെനിറ്റല്‍ ടൂറിന്റെ ഭാഗമായി നടന്ന മത്സരത്തില്‍ ഈ സീസണിലെ മികച്ച ദൂരമാണ് ശ്രീശങ്കര്‍ കണ്ടെത്തിയത്. പാലക്കാട് യാക്കര സ്വദേശിയായ ശ്രീശങ്കര്‍ ആറാമത്തെ ചാട്ടത്തിലാണ് മികച്ച ദൂരം കണ്ടെത്തിയത്. അഞ്ചുചാട്ടങ്ങള്‍ എട്ട് മീറ്ററിന് മുകളിലെത്തി. 7.94, 8.17, 8.11, 8.04, 8.01, 8.18 എന്നിങ്ങനെയാണ് ശ്രീശങ്കറിന്റെ പ്രകടനം. 

കോമണ്‍വെല്‍ത്ത് ഗെയിംസ് വെള്ളിമെഡല്‍ ജേതാവായ ശ്രീശങ്കറിന്റെ ഈ സീസണിലെ മൂന്നാം മത്സരമായിരുന്നു ഇത്. ഇന്ത്യന്‍ ജിപിയില്‍ 7.94 മീറ്റര്‍ ചാടിയ താരം കാലിഫോര്‍ണിയയില്‍ വെച്ച് നടന്ന മത്സരത്തില്‍ 8.29 മീറ്റര്‍ കണ്ടെത്തി. ജസ്വിന്‍ ഈയിടെ ശ്രീശങ്കര്‍ സ്ഥാപിച്ച ദേശീയ റെക്കോഡ് മറികടന്നിരുന്നു. എന്നാല്‍ ഗ്രീസില്‍ ആ പ്രകടനം പുറത്തെടുക്കാന്‍ ജസ്വിന് സാധിച്ചില്ല. ശ്രീശങ്കറിന്റെ 8.36 മീറ്ററിന്റെ റെക്കോഡ് തകര്‍ത്ത് ജസ്വിന്‍ 8.42 മീറ്ററിന്റെ ദേശീയ റെക്കോഡ് സ്ഥാപിച്ചു. ഇതോടെ ഓഗസ്റ്റില്‍ ബുഡാപെസ്റ്റില്‍ നടക്കുന്ന ലോക അത്‌ലറ്റിക്‌സ് ചാമ്പ്യന്‍ഷിപ്പിന് ജസ്വിന്‍ യോഗ്യത നേടുകയും ചെയ്തു. 8.25 മീറ്ററായിരുന്നു യോഗ്യതാമാര്‍ക്ക്.

Content Highlights: Long jumper Sreeshankar wins title at Greece meet