സിഡ്നിയിലെ വെടിവെപ്പിൽ നിന്ന് രക്ഷപ്പെട്ടു, പേടിപ്പെടുത്തുന്ന അനുഭവമെന്ന് മൈക്കൽ വോൺ
സിഡ്നി: ഓസ്ട്രേലിയയിലെ സിഡ്നി ബോണ്ടി ബീച്ചിലുണ്ടായ വെടിവെപ്പിൽ നിന്ന് രക്ഷപ്പെട്ട് മുൻ ഇംഗ്ലണ്ട് നായകൻ മൈക്കൽ വോൺ. വെടിവെപ്പിനെ തുടർന്ന് സമീപത്തെ റസ്റ്ററന്റിൽ കുടുങ്ങിയതായും ഇത് പേടിപ്പെടുത്തുന്ന അനുഭവമായിരുന്നെന്നും വോൺ എക്സിൽ കുറിച്ചു. ഓസ്ട്രേലിയയിൽ നടന്നുകൊണ്ടിരിക്കുന്ന ആഷസ് പരമ്പയിലെ ബ്രോഡ്കാസ്റ്ററാണ് വോൺ. സിഡ്നിയില് പ്രാദേശിക സമയം വൈകീട്ടുണ്ടായ വെടിവെപ്പില് 12 പേരാണ് കൊല്ലപ്പെട്ടത്. ബീച്ചില് യഹൂദരുടെ ഒരു ആഘോഷ പരിപാടി നടക്കുന്നതിനിടെയാണ് ആക്രമണമുണ്ടായത്.
സംഭവത്തില് ഒരാളെ തിരിച്ചറിഞ്ഞു. നവീദ് അക്രം (24) ആണ് തോക്കുധാരികളില് ഒരാള്. സിഡ്നിയിലെ ബോണിറിഗ്ഗിലുള്ള അക്രമിന്റെ വീട്ടില് പോലീസ് റെയ്ഡ് നടത്തുന്നു. സംഭവത്തില് രണ്ടുപേരെയും പോലീസ് കസ്റ്റഡിയിലെടുത്തിട്ടുണ്ട്.
ബോണ്ടിയിൽ ഒരു റസ്റ്ററന്റിൽ കുടുങ്ങിയത് പേടിപ്പെടുത്തുന്ന അനുഭവമായിരുന്നു. ഇപ്പോൾ സുരക്ഷിതമായി വീട്ടിലെത്തി. അടിയന്തര സേവനങ്ങൾക്കും ഭീകരവാദികളെ നേരിട്ട വ്യക്തിക്കും ഒരായിരം നന്ദി. - വോൺ കുറിച്ചു.
Being locked in a restaurant in Bondi was scary .. Now home safe .. but thanks so much to the emergency services and the guy who confronted the terrorist .. thoughts with all who have been affected .. xxx
— Michael Vaughan (@MichaelVaughan) December 14, 2025
ഒരു വാഹനത്തിലെത്തിയ അക്രമകാരികള്, അതില്നിന്ന് പുറത്തിറങ്ങി വെടിവെപ്പ് നടത്തുകയായിരുന്നെന്നാണ് ഡെയ്ലി മെയില് റിപ്പോര്ട്ട് ചെയ്തത്. വൈകീട്ട് ആറരയോടെയാണ് സംഭവം. സംഭവസ്ഥലത്തെ ദൃശ്യങ്ങളില് കറുത്ത വസ്ത്രം ധരിച്ച രണ്ടുപേര് ബീച്ചിന് സമീപം വെടിയുതിര്ക്കുന്നതായി കാണാം. ഭയപ്പെട്ടുപോയ ബീച്ച് സന്ദര്ശകര് നാല് ദിശകളിലേക്കും ചിതറിയോടുന്നതും പുറത്തുവന്ന ദൃശ്യങ്ങളിലുണ്ട്.
ഇതിനിടെ ഒരാള് പിറകെവന്ന് തോക്കുധാരികളിലൊരാളെ ധീരമായി കീഴ്പ്പെടുത്തുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. അക്രമിയെ തടഞ്ഞശേഷം അയാളില്നിന്ന് തോക്ക് ബലമായി പിടിച്ചെടുക്കുന്നതാണ് ദൃശ്യം. ഈ ഇടപെടല് കൂടുതല് രക്തച്ചൊരിച്ചില് തടഞ്ഞെന്നാണ് വിലയിരുത്തല്.
Content Highlights: Michael Vaughan was 'locked in a restaurant in Bondi' during mass shooting