ഫുട്‌ബോൾ ഇതിഹാസം ലയണൽ മെസ്സിയുടെ പേരിൽ പുതിയ സസ്യ ഇനം; 'സാൽവിയ മെസ്സി'
ഫുട്‌ബോൾ ലോകത്ത് ഏതാണ്ട് എല്ലാ പ്രധാന ബഹുമതികളും സ്വന്തമാക്കിയ അർജന്റീന ഇതിഹാസം ലയണൽ മെസ്സിക്ക് ഇപ്പോഴിതാ ശാസ്ത്ര ലോകത്തുനിന്ന് അപൂർവ ആദരം. പുതുതായി കണ്ടെത്തിയ ഒരു സസ്യ ഇനത്തിന് മെസ്സിക്കുള്ള ആദരം എന്ന നിലയ്ക്ക് അദ്ദേഹത്തിന്റെ പേര് നൽകിയിരിക്കുകയാണ് ഗവേഷകർ. 'സാൽവിയ മെസ്സി' എന്നാണ് ഗവേഷകർ ഈ സസ്യത്തിന് നൽകിയിരിക്കുന്ന പേര്.
പെറുവിലെ മധ്യ, തെക്കൻ ആന്തിസ് പർവ്വതനിരകളിലാണ് ഈ സസ്യം കണ്ടുവരുന്നത്. അർജന്റീന ദേശീയ ടീമിന്റെ ജേഴ്‌സിയുടെ നിറങ്ങളോട് സാമ്യമുള്ള വെള്ളയും ഇളം നീലയും നിറത്തിലുള്ള പൂക്കളാണ് ഇതിനുള്ളത്. 2005-ൽ സീനിയർ ടീമിൽ അരങ്ങേറ്റം കുറിച്ചതുമുതൽ മെസ്സി അണിയുന്ന പരമ്പരാഗത അർജന്റീന ഫുട്‌ബോൾ കിറ്റിന്റെ ദളങ്ങളെ അനുസ്മരിപ്പിക്കുന്ന ഈ നിറങ്ങളാണ് സസ്യത്തിന് മെസ്സിയുടെ പേരുനൽകാൻ ശാസ്ത്രജ്ഞർക്ക് പ്രചോദനമായത്.
സസ്യ വർഗ്ഗീകരണത്തിൽ ശ്രദ്ധ കേന്ദ്രീകരിക്കുന്ന അന്താരാഷ്ട്ര ജേണലായ 'ഫൈറ്റോടാക്‌സ'യുടെ ഒക്ടോബർ പതിപ്പിലാണ് ഈ കണ്ടെത്തൽ രേഖപ്പെടുത്തിയിരിക്കുന്നത്. വളരെ പരിമിതമായ ഭൂമിശാസ്ത്രപരമായ വിസ്തൃതിയിൽ മാത്രം കണ്ടുവരുന്നതിനാൽ ഗവേഷകർ ഈ സസ്യത്തെ വംശനാശഭീഷണി നേരിടുന്നവയുടെ വിഭാഗത്തിലാണ് ഉൾപ്പെടുത്തിയിരിക്കുന്നത്.
വ്യക്തികളോടുള്ള ആദപസൂചകമായി ജീവിവർഗ്ഗങ്ങൾക്ക് പേരിടുന്ന സസ്യശാസ്ത്രപരമായ നാമകരണ രീതി പിന്തുടർന്നാണ് ഈ പേര് നൽകിയിരിക്കുന്നത്. ഇതിൽ 'സാൽവിയ' എന്നത് ജീനസ് നാമവും 'മെസ്സി' എന്നത് അർജന്റീന ഫുട്‌ബോളർക്കുള്ള ആദരവുമാണ്. ഗോളുകളും ട്രോഫികളും വ്യക്തിഗത റെക്കോഡുകളും നിറഞ്ഞ മെസ്സിയുടെ കരിയറിന്, സസ്യശാസ്ത്ര രേഖകളിൽ സ്ഥാനം പിടിച്ചതിലൂടെ വേറിട്ടൊരു അംഗീകാരം ലഭിച്ചിരിക്കുകയാണ്.
Content Highlights: A new plant species has been named 'Salvia Messi' in honor of football legend Lionel Messi., The plant features white and light blue flowers resembling the Argentina national football team jersey., It is found in the central and southern Andes mountains of Peru and is classified as endangered., The discovery was published in the international botany journal Phytotaxa.