മാവോ സേതുങ്ങിനെക്കുറിച്ചുള്ള പരാമർശം; കിലിയൻ എംബാപ്പെയുമായുള്ള കരാറുകൾ റദ്ദാക്കി ചൈനീസ് ബ്രാൻഡുകൾ

ബെയ്ജിങ്: ചൈനയുടെ മുൻ ഭരണാധികാരി മാവോ സേതുങ്ങിനെക്കുറിച്ച് നടത്തിയ പരാമർശത്തെ തുടർന്ന് റയൽ മാഡ്രിഡിന്റെ ഫ്രഞ്ച് ഫുട്‌ബോൾ താരം കിലിയൻ എംബാപ്പെയ്ക്ക് വലിയ തിരിച്ചടി. എംബാപ്പെയുടെ പരാമർശം അടങ്ങിയ വീഡിയോ സോഷ്യൽ മീഡിയയിൽ വൈറലായതിനെ തുടർന്ന് മൂന്ന് പ്രമുഖ ചൈനീസ് ബ്രാൻഡുകൾ താരവുമായുള്ള കരാറുകൾ റദ്ദാക്കി.

ഊർജ്ജ പാനീയ നിർമ്മാതാക്കളായ ഡോങ്‌പെങ് ബെവറേജ്, ക്ഷീര കമ്പനിയായ മെങ്‌നിയു, ചീസ് ഉത്പന്ന നിർമാതാക്കളായ മിൽക്ക് ഗ്രൗണ്ട് എന്നിവരാണ് എംബാപ്പെയുമായുള്ള സഹകരണം അവസാനിപ്പിച്ചത്. ദേശീയ വികാരങ്ങളെ വ്രണപ്പെടുത്തുന്ന പെരുമാറ്റങ്ങളോട് ഒട്ടും സഹിഷ്ണുത കാട്ടില്ലെന്ന് ഡോങ്‌പെങ് പ്രസ്താവിച്ചു. ചൈനീസ് ജനതയുടെ വികാരങ്ങളെ മുറിവേൽപ്പിക്കുന്ന പ്രസ്താവനകളെ എതിർക്കുന്നുവെന്ന് മെങ്‌നിയു വ്യക്തമാക്കി. ചൈനീസ് സോഷ്യൽ മീഡിയ പ്ലാറ്റ്ഫോമായ വെയ്ബായിൽ ഇത് വലിയ ചർച്ചയാവുകയും, ഇലക്ട്രോലൈറ്റ് പാനീയങ്ങൾ ഉൾപ്പെടെയുള്ള ഉത്പന്നങ്ങളിൽ നിന്ന് താരത്തിന്റെ ചിത്രം നീക്കം ചെയ്യണമെന്ന് ഉപയോക്താക്കൾ ആവശ്യപ്പെടുകയും ചെയ്തു.

തന്റെ മുഖം ഉൾപ്പെടുത്തി നിർമിച്ച ഇന്റർനെറ്റ് മീമുകളെക്കുറിച്ച് എംബാപ്പെ സംസാരിക്കുന്ന ഒരു വീഡിയോ ആണ് വിവാദങ്ങൾക്ക് കാരണമായത്. മീമുകളിൽ ഏതാണ് പ്രിയപ്പെട്ടതെന്ന് ചോദിച്ചപ്പോൾ, 'ചൈനീസ് ഏകാധിപതിയാണെന്ന് കരുതുന്ന ഒരാളുടെ ശരീരത്തിൽ തന്റെ മുഖം ചേർത്ത മീം' എന്ന് എംബാപ്പെ മറുപടി നൽകുകയായിരുന്നു.

1976-ൽ അന്തരിച്ച പീപ്പിൾസ് റിപ്പബ്ലിക് ഓഫ് ചൈനയുടെ സ്ഥാപക നേതാവായ മാവോ സേതുങ്ങിനെക്കുറിച്ചാണ് ഈ പരാമർശമെന്ന് വിലയിരുത്തപ്പെടുന്നു. എന്നാൽ വീഡിയോയുടെ സത്യാവസ്ഥ സ്വതന്ത്രമായി സ്ഥിരീകരിച്ചിട്ടില്ല. നേരത്തെ, സെപ്റ്റംബറിൽ 'ഫ്രാൻസ് ഫുട്‌ബോളിന്' നൽകിയ അഭിമുഖത്തിൽ, ഇത്തരം ചരിത്രപുരുഷന്മാരുമായി തന്റെ മുഖം ഉപമിക്കുന്ന മീമുകളോടുള്ള വിയോജിപ്പ് 27-കാരനായ എംബാപ്പെ വ്യക്തമാക്കിയിരുന്നു.

Content Highlights: Three major Chinese brands cancelled endorsement deals with Kylian Mbappe., The backlash follows a viral video where Mbappe allegedly referenced Mao Zedong in a meme context., Brands like Dongpeng Beverage and Mengniu cited national sentiments for terminating contracts., Mbappe's image is being removed from various Chinese marketing campaigns and products.