'അവർ മികച്ചതൊന്നും അർഹിക്കുന്നില്ല'; റൊണാൾഡോ ടീം ക്യാമ്പ് വിട്ടതിന് പിന്നാലെ പ്രതികരണവുമായി സഹോദരി

ക്രിസ്റ്റിയാനോ റൊണാൾഡോ പോർച്ചുഗൽ ദേശീയ ടീം ക്യാമ്പ് വിട്ടതിന് പിന്നാലെ സോഷ്യൽ മീഡിയയിൽ പോസ്റ്റ് പങ്കുവെച്ച് അദ്ദേഹത്തിന്റെ സഹോദരി എൽമ അവെയ്‌റോ. പോർച്ചുഗൽ ടീമിനേയും മാധ്യമങ്ങളേയും പരിഹസിക്കുന്ന ഒരു ആരാധകന്റെ പോസ്റ്റ് എൽമ അവെയ്‌റോ ഇൻസ്റ്റ്ഗ്രാം സ്‌റ്റോറിയായി പങ്കുവെച്ചു.

‘പോർച്ചുഗീസ് ടീം മികച്ചതൊന്നും അർഹിക്കുന്നില്ല. അവർ അസൂയാലുക്കളും അറിവില്ലാത്തവും പുച്ഛത്തോടെ കാര്യങ്ങൾ നോക്കികാണുന്നവരുമാണ്. അവർക്ക് ഇപ്പോൾ ടീം ഘടന ആവശ്യമാണ്. പോർച്ചുഗീസ് മാധ്യമങ്ങൾക്ക് ഊഹാപോഹങ്ങളും ആവശ്യമായിരുന്നു. ക്രിസ്റ്റിയാനോയ്ക്ക് മുമ്പ് ഫുട്‌ബോളിൽ നമ്മൾ ശരാശരി ടീമായിരുന്നു. അതിലേക്ക് തന്നെ മടങ്ങാൻ ഇപ്പോൾ നമ്മൾ അർഹരാണ്. എല്ലാത്തിനും നന്ദി ക്രിസ്റ്റിയാനോ’- എന്നായിരുന്നു ആരാധകന്റെ പോസ്റ്റ്. ഇത് പങ്കുവെച്ച് ‘എല്ലാം പറഞ്ഞുകഴിഞ്ഞു’ എന്നാണ് എൽമ കുറിച്ചത്.

പോർച്ചുഗൽ പരിശീലകൻ ജോർജ് ജീസസിന്റെ വാർത്താസമ്മേളനത്തിന് പിന്നാലെയാണ് റൊണാൾഡോ ടീം വിട്ടത്. യുവേഫ നാഷൻസ് ലീഗിൽ ഡെൻമാർക്കിനെതിരായ മത്സരത്തിലും റൊണാൾഡോ ആദ്യ ഇലവനിൽ ഉണ്ടാകില്ലെന്ന് ജീസസ് വാർത്താസമ്മേളനത്തിൽ വ്യക്തമാക്കിയിരുന്നു. ഗോൺസാലോ റാമോസിനാണ് മുന്നേറ്റത്തിൻ മുൻഗണന നൽകുന്നതെന്നും ആവശ്യമുണ്ടെങ്കിൽ മാത്രമേ റൊണാൾഡോ ഇറക്കൂവെന്നും കോച്ച് വ്യക്തമാക്കി. ഇതിന് പിന്നാലെ പോർച്ചുഗീസ് ഫുട്‌ബോൾ ഫെഡറേഷന്റെ വാഹനത്തിൽ റൊണാൾഡോ കോപ്പൻഹേഗനിലെ പാർക്കൻ സ്റ്റേഡിയം വിടുകയായിരുന്നു. താരം പുലർച്ചെ മാഡ്രിഡിലെത്തുകയും ചെയ്തു.

പിന്നാലെ ടീം ക്യാമ്പ് വിട്ടതായി റൊണാൾഡോ സോഷ്യൽ മീഡിയയിലൂടെ ആരാധകരെ അറിയിച്ചു. തന്നെ ഈ തീരുമാനത്തിലേക്ക് നയിച്ച കാരണങ്ങൾ സമയമാകുമ്പോൾ പോർച്ചുഗീസുകാരോട് വെളിപ്പെടുത്തുമെന്നും റൊണാൾഡോ കുറിച്ചു.

Content Highlights: Cristiano Ronaldo left the Portugal national team camp before the Nations League game against Denmark., Coach Jorge Jesus confirmed Ronaldo would not be in the starting lineup., Ronaldo's sister Elma Aveiro backed a controversial social media post criticizing the press and fans., Ronaldo promised to reveal the true reasons behind his sudden exit from the squad.