മറഡോണയും ഒസിംഹെനും സ്പല്ലെറ്റിയും... കിരീടനേട്ടത്തെക്കുറിച്ച് നാപ്പോളിയ്ക്ക് പറയാന്‍ ഏറെയുണ്ട്
എസ്.എസ്.സി. നാപ്പോളി....! പേരു കേള്‍ക്കുമ്പോള്‍ മറനീക്കി തെളിഞ്ഞു വരുന്നത് ഒരു ഇതിഹാസമാണ്. സാക്ഷാല്‍ ഡീഗോ മറഡോണ. നാപ്പോളി ലോകോത്തര ക്ലബ്ബായി വളര്‍ന്നതില്‍ മറഡോണയുടെ വിയര്‍പ്പും ചോരയുമുണ്ട്. പക്ഷേ, മറഡോണാ യുഗം അവസാനിച്ചതോടെ നാപ്പോളിയും തകര്‍ന്നു. ആരാധകര്‍ കുറഞ്ഞ് വരുമാനം ഇല്ലാതായി. ഒടുവില്‍ ഇറ്റലിയിലെ പ്രതാപശാലിയായ ക്ലബ്ബ് തകര്‍ന്നടിഞ്ഞു. നാപ്പോളിയുടെ കാലം കഴിഞ്ഞുവെന്ന് പലരും വിധിയെഴുതി. ഫുട്‌ബോള്‍ ഭ്രാന്തന്മാര്‍ മിലാന്‍ ഡെര്‍ബിയ്ക്കും യുവന്റസിന്റെ പോരാട്ടങ്ങള്‍ക്കുമായി അലറിവിളിച്ചു. നേപ്പിള്‍സിലെ ഡീഗോ മറഡോണ സ്‌റ്റേഡിയത്തില്‍ ആരവങ്ങള്‍ നിലച്ചു. ആദ്യസ്ഥാനങ്ങളിലെത്താതെ ടീം തരംതാഴ്ത്തപ്പെട്ടു. ഫുട്‌ബോളിലെ ദുര്‍ഭൂതങ്ങള്‍ കഴുകന്‍ കണ്ണുകളുമായി ക്ലബ്ബിന് മുകളില്‍ വട്ടമിട്ടു പറന്നു. കിരീടം നേടുമെന്ന ആരാധകരുടെ പ്രതീക്ഷകള്‍ കണ്ണീരോടെ വീണുടഞ്ഞു.
എന്നാല്‍, നാപ്പോളിയ്ക്ക് വേണ്ടി കാലം കാത്തുവെച്ചത് മറ്റൊന്നായിരുന്നു. 2021-ല്‍ പരിശീലകന്‍ ലൂസിയാനോ സ്പല്ലെറ്റിയിലൂടെ നാപ്പോളിയുടെ തലവര തെളിഞ്ഞു. എസ്.എസ്. റോമയിലും ഇന്റര്‍ മിലാനിലും അത്ഭുതങ്ങള്‍ പുറത്തെടുത്ത തന്ത്രശാലിയായ അറുപത്തിനാലുകാരന്‍ പരിശീലകന്‍ നാപ്പോളിയുടെ മാനേജരായി സ്ഥാനമേറ്റതോടെ ടീം അടിമുടി മാറി. നിലവിലുള്ള ഫോര്‍മാറ്റിനെ തച്ചുടച്ച സ്പല്ലെറ്റി പുതിയൊരു ടീമിനെ വാര്‍ത്തെടുത്തു. മുഖംമൂടിയണിഞ്ഞ് കാലില്‍ അത്ഭുതമൊളിപ്പിച്ച വിക്ടര്‍ ഒസിംഹെന്‍ അടക്കമുള്ള യുവനിരയെ മുന്നില്‍ കൊണ്ടുവന്ന് അദ്ദേഹം ടീമിനായി പുതിയ ജാതകമെഴുതി. അത് ഫലം കണ്ടു. സ്ഥാനമേറ്റെടുത്ത ആദ്യ വര്‍ഷം തന്നെ നാപ്പോളി ഇറ്റാലിയന്‍ സീരി എ യില്‍ മൂന്നാം സ്ഥാനം നേടിയെടുത്തു. 38 മത്സരങ്ങളില്‍നിന്ന് 24 വിജയങ്ങളടക്കം 79 പോയന്റുമായാണ് ടീം മൂന്നാമതെത്തിയത്. കിരീടം നേടിയ എ.സി. മിലാനുമായി ഏഴ് പോയന്റിന്റെ വ്യത്യാസം മാത്രമാണുണ്ടായത്. ഒപ്പം ചാമ്പ്യന്‍സ് ലീഗ് യോഗ്യതയും നേടി. അന്നുതന്നെ നാപ്പോളി എതിരാളികള്‍ക്ക് ഒരു സിഗ്നല്‍ കൊടുത്തു...; വലിയൊരു സിഗ്നല്‍!
Content Highlights: unbelievable run of napoli to win italian serie a title after 33 years of wait