ദുലീപ് ട്രോഫി; ഉപനായകനായി വൈഭവ്, ഇഷാൻ നയിക്കും

ന്യൂഡൽഹി: കൗമാരതാരം വൈഭവ് സൂര്യവംശി നേതൃനിരയിലേക്ക്. ദുലീപ് ട്രോഫിയിലാണ് ഉപനായകനായാണ് വൈഭവെത്തുന്നത്. ഈസ്റ്റ് സോൺ ടീമിന്റെ സ്‌ക്വാഡിലാണ് കൗമാരതാരത്തെ വൈസ് ക്യാപ്റ്റനാക്കിയത്. 15 അംഗ സ്‌ക്വാഡിനെ ഇഷാൻ കിഷനാണ് നയിക്കുന്നത്.

അടുത്തിടെ ഇന്ത്യയുടെ സീനിയർ ടീമിനായി അരങ്ങേറ്റം കുറിച്ചതിന് പിന്നാലെയാണ് ഈസ്റ്റ് സോണിന്റെ ഉപനായകനായി കൂടി പരീക്ഷിക്കുന്നത്. മുഹമ്മദ് ഷമി, അഭിമന്യു ഈശ്വരൻ, മുകേഷ് കുമാർ, ഷഹബാസ് അഹമ്മദ് എന്നീ താരങ്ങൾ ടീമിലുണ്ട്. പേസർ ഷമി 2025 ചാമ്പ്യൻസ് ട്രോഫി ഫൈനലിന് ശേഷം ഇന്ത്യക്ക് വേണ്ടി കളിച്ചിട്ടില്ല. എന്നാൽ ആഭ്യന്തര ക്രിക്കറ്റിൽ ബംഗാളിന് വേണ്ടി താരം മികച്ച പ്രകടനം കാഴ്ചവെച്ചിരുന്നു. ഓഗസ്റ്റ് 23 നാണ് ടൂർണമെന്റ് ആരംഭിക്കുന്നത്.

വൈഭവിനെ നേരത്തേ തന്നെ ഉപനായകനായുള്ള പരീക്ഷണം നടത്തിയിരുന്നു. രഞ്ജി ട്രോഫിയിൽ ബിഹാർ ടീമാണ് വൈഭവിനെ ഇതിന് മുൻപ് ഉപനായകനാക്കിയിരുന്നത്. ഇന്ത്യയുടെ സീനിയർ ടീമിലും മിന്നും ബാറ്റിങ് കാഴ്ചവെക്കുന്നതിനിടെയാണ് ദുലീപ് ട്രോഫിയിലെ സ്‌ക്വാഡ് പ്രഖ്യാപനം. സിംബാബ്‌വെയ്‌ക്കെതിരായ ടി20 പരമ്പരയിൽ ഉജ്ജ്വല പ്രകടനമായിരുന്നു താരത്തിന്റെത്. പരമ്പരയിൽ 50.33 ശരാശരിയിൽ 151 റൺസാണ് വൈഭവ് നേടിയത്. പരമ്പരയിലെ താരവും വൈഭവായിരുന്നു. ഈ പ്രകടനത്തോടെ വൈഭവ് സൂര്യവംശി ടി20 ബാറ്റിങ് റാങ്കിങ്ങിൽ വൻ കുതിപ്പ് നടത്തിയിരുന്നു. 230 സ്ഥാനങ്ങൾ മെച്ചപ്പെടുത്തിയ വൈഭവ് നിലവിലെ റാങ്കിങ്ങിൽ 48-ാം സ്ഥാനത്തെത്തി.

ഈസ്റ്റ് സോൺ സ്ക്വാഡ്: ഇഷാൻ കിഷൻ, വൈഭവ് സൂര്യവംശി, അഭിമന്യു ഈശ്വരൻ, സുദീപ് കുമാർ ഗരാമി, ഷഹബാസ് അഹമ്മദ്, സൂരജ് സിന്ധു ജയ്സ്വാൾ, മുഹമ്മദ് ഷമി, മുകേഷ് കുമാർ, കുമാർ കുശാഗ്ര, ശിഖർ മോഹൻ, അനുകുൽ റോയ്, വിരാട് സിങ്, സുബ്രാൻഷു സേനാപതി, ഡെനിഷ് ദാസ്, അഭിജിത് സർക്കാർ

Content Highlights: Vaibhav Suryavanshi appointed as vice-captain for East Zone., Ishan Kishan named as the captain of the 15-member squad.