കോലിക്കും രോഹിത്തിനും ഇത് കേരളത്തിലെ അവസാന മത്സരം; കാര്യവട്ടം ഏകദിനത്തിന് ഒരുങ്ങി ആരാധകർ

തിരുവനന്തപുരം: ഒരു വർഷംമാത്രം അകലെയുള്ള ലോകകപ്പിനുള്ള ടീം ഇന്ത്യയുടെ ഒരുക്കങ്ങൾക്ക് കാര്യവട്ടം ഞായറാഴ്ച തുടക്കമാകും. വെസ്റ്റ് ഇൻഡീസിനെതിരായ ഏകദിന പരമ്പരയിലെ ആദ്യകളിയാണ് നടക്കുന്നത്. ഗ്രീൻഫീൽഡ് സ്റ്റേഡിയത്തിൽ ഉച്ചയ്ക്ക് രണ്ടുമുതലാണ് പോരാട്ടം. 2027-ലെ ലോകകപ്പിനുള്ള ടീമിനെ സജ്ജമാക്കുന്നതിന്റെ ആദ്യപടികൂടിയാണ് മൂന്നുകളികളുടെ പരമ്പര. ലോകകപ്പിനുമുൻപ് ഇന്ത്യൻ ടീം ഇനി 14 ഏകദിന മത്സരങ്ങളിൽ മാത്രമാണ് കളിക്കുന്നത്. രോഹിത് ശർമ-വിരാട് കോലി എന്നിവർക്കൊപ്പം ക്യാപ്റ്റൻ ശുഭ്മൻ ഗില്ലിനും പരിശീലകൻ ഗൗതം ഗംഭീറിനും വെല്ലുവിളിയുയർത്തുന്ന പരമ്പരയാണിത്.

ലോകകപ്പിനുശേഷം ഇരുവരും വിരമിച്ചേക്കുമെന്ന് വിലയിരുത്തലുള്ളതിനാൽ രോ-കോ സഖ്യത്തിന്റെ കേരളത്തിലെ അവസാന ഏകദിന മത്സരമായിരിക്കും ഞായറാഴ്ചയെന്നാണ് സൂചന. 12 കളിയിൽ ഇന്ത്യയെ നയിച്ച ഗില്ലിന് ഇതുവരെ ആറുവീതം ജയപരാജയങ്ങളാണ് ഉണ്ടായിട്ടുള്ളത്.

ഭാഗ്യ ഗ്രൗണ്ട്

കാര്യവട്ടം ഗ്രീൻഫീൽഡ് സ്റ്റേഡിയത്തിൽ ഇതുവരെനടന്ന ഏഴ് അന്താരാഷ്ട്ര മത്സരങ്ങളിൽ ആറിലും ഇന്ത്യയാണ് ജയിച്ചത്. ട്വന്റി-20യിൽ വെസ്റ്റ് ഇൻഡീസിനോട് മാത്രമാണ് പരാജയപ്പെട്ടത്. രണ്ട് ഏകദിനങ്ങളിലും കൂറ്റൻ വിജയവും നേടിയിട്ടുണ്ട്. 2018-ൽ വെസ്റ്റ് ഇൻഡീസിനെ ഒൻപത് വിക്കറ്റിനും 2023-ൽ ശ്രീലങ്കയെ 317 റൺസിനുമാണ് ഇന്ത്യ ഇവിടെ പരാജയപ്പെടുത്തിയിട്ടുള്ളത്. വിരാട് കോലിയും ശുഭ്മൻ ഗില്ലും ശ്രീലങ്കയ്ക്ക് എതിരേ സെഞ്ചുറി നേടിയിട്ടുള്ള ഗ്രൗണ്ടിൽ വെസ്റ്റ് ഇൻഡീസിനെതിരേ രോഹിത് ശർമ അർധസെഞ്ചുറിയും നേടിയിട്ടുണ്ട്. അന്താരാഷ്ട്ര ഏകദിന മത്സരങ്ങളിൽ വിരാട് കോലിക്ക് 15,000 റൺസ് നേടാൻ 59 റൺസുകൂടി മതി. അവസാന മത്സരത്തിൽ ഇംഗ്ലണ്ടിനെതിരേ ലോർഡ്സിൽ തകർപ്പൻ സെഞ്ചുറിനേട്ടത്തോടെയാണ് രോഹിത് മത്സരത്തിനിറങ്ങുന്നത്. ലോക നമ്പർ വൺ ബാറ്ററെന്ന ക്രെഡിറ്റുമായാണ് ക്യാപ്റ്റൻ ശുഭ്മൻ ഗിൽ എത്തുന്നത്.

ഏറക്കുറേ പുതുമുഖങ്ങളുൾപ്പെടുന്ന വെസ്റ്റ് ഇൻഡീസിനെ വിക്കറ്റ് കീപ്പർ ബാറ്റർ ഷായ് ഹോപ്പാണ് നയിക്കുന്നത്.

മഴമുന്നറിയിപ്പില്ല

ഞായറാഴ്ച തിരുവനന്തപുരത്ത് മഴമുന്നറിയിപ്പ് നൽകിയിട്ടില്ല. നേരിയ ചാറ്റൽമഴ സാധ്യതമാത്രമാണ് കാലാവസ്ഥാ വകുപ്പ് പ്രവചിക്കുന്നത്. തിരുവനന്തപുരത്ത് പകൽ നല്ല ചൂടുള്ള കാലാവസ്ഥയാണ് നിലവിൽ. ശരാശരി 33 ഡിഗ്രിയാണ് അന്തരീക്ഷതാപനില.

Content Highlights: First ODI between India and West Indies at Greenfield Stadium, Karyavattom., Preparation series for the 2027 ICC World Cup with only 14 ODIs remaining., Potentially the final match in Kerala for veteran players Rohit Sharma and Virat Kohli., Favorable venue stats for India at Karyavattom with strong prior performances.