ഗോളിൽ വിക്കറ്റ് വേട്ടയുമായി മാനവ് സുതാർ; ഒന്നാം ടെസ്റ്റിൽ ലങ്കയെ തകർത്ത് ഇന്ത്യ

ഗോൾ: ശ്രീലങ്കയ്‌ക്കെതിരായ ഒന്നാം ക്രിക്കറ്റ് ടെസ്റ്റിൽ ഇന്ത്യയ്ക്ക് 165 റൺസ് ജയം. 372 റൺസ് വിജയലക്ഷ്യവുമായി രണ്ടാം ഇന്നിങ്‌സിനിറങ്ങിയ ലങ്ക 206 റൺസിന് ഓൾഔട്ടായി. സ്‌കോർ: ഇന്ത്യ 462, 193, ശ്രീലങ്ക 284, 206. ആറു വിക്കറ്റ് വീഴ്ത്തിയ മാനവ് സുതാറാണ് രണ്ടാം ഇന്നിങ്‌സിൽ ലങ്കയെ തകർത്തത്. പ്രസിദ്ധ് കൃഷ്ണ രണ്ടു വിക്കറ്റ് വീഴ്ത്തി.

ക്യാപ്റ്റൻ ധനഞ്ജയ ഡിസിൽവയുടെയും സോണൽ ദിനുഷയുടെയും ചെറുത്തുനിൽപ്പാണ് അഞ്ചാം ദിനം ഇന്ത്യൻ വിജയം ഇത്രയും വൈകിപ്പിച്ചത്. നാലിന് 84 റൺസെന്നനിലയിൽ അഞ്ചാം ദിനം ബാറ്റിങ് ആരംഭിച്ച ലങ്കയ്ക്കായി ധനഞ്ജയ ഡിസിൽവയും സോണൽ ദിനുഷയും ആത്മവിശ്വാസത്തോടെ ബാറ്റ് വീശി. ഈ കൂട്ടുകെട്ടിന്റെ മികവിൽ ആദ്യ സെഷനിൽ ലങ്ക, ഇന്ത്യയെ പരീക്ഷിച്ചു. 202 പന്തുകൾ നേരിട്ട ഈ സഖ്യം പൊളിക്കാൻ ഇന്ത്യയ്ക്ക് ഒടുവിൽ 56-ാം ഓവർ വരെ കാക്കേണ്ടി വന്നു. 151 പന്തിൽ നിന്ന് 59 റൺസെടുത്ത ധനഞ്ജയ ഡിസിൽവയെ പുറത്താക്കി രവീന്ദ്ര ജഡേജയാണ് ഇന്ത്യയ്ക്ക് ആഗ്രഹിച്ച ബ്രേക്ക് ത്രൂ സമ്മാനിച്ചത്. സോണലിനൊപ്പം 95 റൺസ് ചേർത്ത ശേഷമാണ് ക്യാപ്റ്റൻ മടങ്ങിയത്. പിന്നാലെ നിരോഷ ഡിക്വെല്ലയെ (10) പുറത്താക്കി പ്രസിദ്ധ് കൃഷ്ണ ലങ്കയുടെ ആറാം വിക്കറ്റ് വീഴ്ത്തി.

എന്നാൽ കേശാര നുവാന്തയെ കൂട്ടുപിടിച്ച് സോണൽ ദിനുഷ ഇന്നിങ്‌സ് മുന്നോട്ടു നയിച്ചു. 91 പന്തുകൾ നേരിട്ട ഈ സഖ്യം 43 റൺസ് ചേർത്തു. ഒടുവിൽ 76-ാം ഓവറിൽ ദിനുഷയെ ലെഗ് സ്ലിപ്പിൽ ധ്രുവ് ജുറെലിന്റെ കൈകളിലെത്തിച്ച് മാനവ് സുതാറാണ് ഈ ചെറുത്തുനിൽപ്പ് അവസാനിപ്പിച്ചത്. ഒന്നാം ഇന്നിങ്‌സിൽ സെഞ്ചുറി നേടിയ ദിനുഷ രണ്ടാം ഇന്നിങ്‌സിലും ആ മികവ് തുടർന്നു. 128 പന്തിൽ നിന്ന് 84 റൺസെടുത്ത താരം ഇന്ത്യയുടെ ക്ഷമയെ പരീക്ഷിച്ചാണ് ക്രീസിൽ തുടർന്നത്. പിന്നാലെ പ്രഭാത് ജയസൂര്യ, ലഹിരു കുമാര, കേശാര നുവാന്ത എന്നിവരെ പുറത്താക്കി ഇന്ത്യ, ലങ്കൻ ഇന്നിങ്‌സ് അവസാനിപ്പിച്ചു.

നിഷാൻ മധുഷ്‌ക (ആറ്), ലാഹിരു ഉദാര (16), പസിന്ദു സൂര്യഭണ്ഡാര (പൂജ്യം), കാമിന്ദു മെൻഡിസ് (രണ്ട്) എന്നിവരാണ് ലങ്കൻ രണ്ടാമിന്നിങ്‌സിൽ പുറത്തായ മറ്റ് താരങ്ങൾ.

Content Highlights: Sri Lanka reached 105/4 on Day 5 chasing a target of 372 runs., Captain Dhananjaya de Silva and Sonal Dinusha formed a crucial partnership., India set a target of 372 after being bowled out for 193 in their second innings., Four Sri Lankan wickets fell early before the resistance.