ഏകദിന ലോകകപ്പ് ഷെഡ്യൂളായി; ഇന്ത്യ-പാക് പോരാട്ടം ഒക്ടോബർ 10-ന്

കേപ്ടൗൺ (ദക്ഷിണാഫ്രിക്ക): 2027 ഐസിസി ഏകദിന ലോകകപ്പിനുള്ള ഗ്രൂപ്പുകളും മത്സരക്രമവും പ്രഖ്യാപിച്ച് അന്താരാഷ്ട്ര ക്രിക്കറ്റ് കൗൺസിൽ (ഐസിസി). ദക്ഷിണാഫ്രിക്ക, സിംബാബ്​വെ, നമീബിയ എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന ടൂർണമെന്റ് 2027 ഒക്ടോബർ 2-ന് ആരംഭിക്കും. 14 ടീമുകൾ മാറ്റുരയ്ക്കുന്ന ലോകകപ്പിലെ ഗ്രൂപ്പ് ഘട്ട മത്സരങ്ങൾ ഒക്ടോബർ ഏഴിനാണ് ആരംഭിക്കുന്നത്. കേപ് ടൗണിൽ നിലവിലെ ചാമ്പ്യന്മാരായ ഓസ്‌ട്രേലിയയും ഇന്ത്യയും ആദ്യ മത്സരത്തിൽ ഏറ്റുമുട്ടും.

ഇന്ത്യ, ഓസ്‌ട്രേലിയ, അഫ്ഗാനിസ്ഥാൻ, പാകിസ്താൻ, സിംബാബ്​വെ എന്നിവരാണ് ഗ്രൂപ്പ് എയിലെ ടീമുകൾ. ഒന്നാം ക്വാളിഫയർ ജയിക്കുന്ന ടീമും ഈ ഗ്രൂപ്പിലുണ്ടാകും. ദക്ഷിണാഫ്രിക്ക, ഇംഗ്ലണ്ട്, ന്യൂസീലൻഡ്, ബംഗ്ലാദേശ്, ശ്രീലങ്ക എന്നിവരാണ് ഗ്രൂപ്പ് ബിയിലുള്ളത്.

രണ്ടു ഗ്രൂപ്പുകളിൽ നിന്നുമായി ഏറ്റവും മികച്ച ഏഴു ടീമുകൾ 'സൂപ്പർ സെവൻ' ഘട്ടത്തിലേക്ക് യോഗ്യത നേടും. അതിൽ നിന്ന് ഏറ്റവും മികച്ച നാല് ടീമുകളായിരിക്കും സെമിഫൈനലിലേക്ക് പ്രവേശിക്കുക. ഒക്ടോബർ 2, 4, 6 തീയതികളിൽ വിൻഡ്‌ഹോക്കിൽ നടക്കുന്ന 'സൂപ്പർ സീരീസ്' മത്സരങ്ങളിലൂടെയായിരിക്കും ഗ്രൂപ്പ് ഘട്ടത്തിലേക്കുള്ള അവസാന ടീമിനെ തീരുമാനിക്കുന്നത്.

ഇന്ത്യയുടെ ഗ്രൂപ്പ് മത്സരങ്ങൾ

ഒക്ടോബർ 7-ഇന്ത്യ - ഓസ്‌ട്രേലിയ (കേപ് ടൗൺ)

ഒക്ടോബർ 10 - ഇന്ത്യ - പാകിസ്താൻ (ജോഹന്നാസ്ബർഗ്)

ഒക്ടോബർ 14 - ഇന്ത്യ - അഫ്ഗാനിസ്ഥാൻ (ഷ്വാനെ)

ഒക്ടോബർ 17 - ഇന്ത്യ - ക്വാളിഫയർ എ (ബ്ലൂംഫോണ്ടെയ്ൻ)

ഒക്ടോബർ 24 - ഇന്ത്യ - സിംബാബ്​വെ (വിക്ടോറിയ ഫോൾസ്)

ഓരോ ഗ്രൂപ്പിലെയും ആദ്യ മൂന്ന് സ്ഥാനക്കാരും, നാലാം സ്ഥാനക്കാരിൽ കൂടുതൽ പോയിന്റുള്ള ഒരു ടീമും ഉൾപ്പെടെ ഏഴ് ടീമുകൾ 'സൂപ്പർ 7' ഘട്ടത്തിലേക്ക് യോഗ്യത നേടും. ഒക്ടോബർ 25 മുതൽ നവംബർ 14 വരെയാണ് സൂപ്പർ 7 മത്സരങ്ങൾ നടക്കുന്നത്. സൂപ്പർ 7 ഘട്ടത്തിൽ ആദ്യ നാല് സ്ഥാനങ്ങളിൽ എത്തുന്ന ടീമുകളാണ് സെമി ഫൈനലിൽ കടക്കുക. കേപ് ടൗണിൽ നവംബർ 17-ന് ഒന്നാം സെമി ഫൈനലും നവംബർ 18-ന് ഷ്വാനെയിൽ രണ്ടാം സെമിയും നടക്കും. നവംബർ 21-ന് ജൊഹാനസ്ബർഗിലാണ് ഫൈനൽ. നവംബർ 22 റിസർവ് ദിനമായുണ്ട്.

Content Highlights: 2027 ICC ODI World Cup is co-hosted by South Africa, Zimbabwe, and Namibia, starting on October 2, 2027., India is placed in Group A alongside Australia, Afghanistan, Pakistan, Zimbabwe, and a qualifier team., The highly anticipated India vs Pakistan match is scheduled for October 10, 2027, in Johannesburg., The tournament format includes a group stage, Super 7 round, two semi-finals, and the final on November 21, 2027.