നിയമങ്ങളില്ല, നിയന്ത്രണങ്ങളില്ല; വായനയെ ആഘോഷമാക്കുന്ന കേരളത്തിലെ കൂട്ടായ്മകൾ

'ഞായറാഴ്ച വൈകുന്നേരമാവാൻ കോഴിക്കോട്ടെ ചിലർ കാത്തിരിക്കും. ജോലിയുടെ സമ്മർദവും രാവിലെ മുതലുള്ള ഓട്ടപാച്ചിലും ഒന്നുമില്ലാത്ത ആ ദിവസം ഉച്ചയ്ക്ക് മൂന്നുമണിയാകുമ്പോൾ അവർ ഓരോരുത്തരായി സരോവരം ബയോപാർക്കിലേക്കെത്തും. ഇഷ്ടമുള്ള ഒരിടത്ത് ഇരിക്കും. പിന്നെ കൈയിലുള്ള പുസ്തകം തുറന്ന് വായിക്കാൻ തുടങ്ങും. മതിൽകെട്ടുകളിലാത്ത, തുറന്ന ആകാശത്തിനുകീഴെ മണിക്കൂറുകളോളം നിശബ്ദമായൊരു വായന. പിന്നീട് ചർച്ചയാണ്. വായിച്ച പുസ്തകത്തിൽ തുടങ്ങി സിനിമയിലേക്കും രാഷ്ട്രീയത്തിലും അങ്ങനെ പല വിഷങ്ങളിലേക്കും ചർച്ച നീളും. ഒടുക്കം അടുത്തയാഴ്ച കാണാമെന്ന് ഉറപ്പിൽ പിരിയും...'

'കോഴിക്കോട് റീഡ്‌സ്' എന്ന വായനാക്കൂട്ടായ്മയുടെ പതിവ് രീതിയാണിത്. പക്ഷേ സാഹിത്യനഗരമായ കോഴിക്കോട് മാത്രമേ വായനക്കൊരു കൂട്ടായ്മയുള്ളതെന്ന് കരുതരുത്. കേരളത്തിലെ മിക്ക ജില്ലകളിലും ഇന്ന് സജീവമായി പ്രവർത്തിക്കുന്ന നിരവധി വായനാകൂട്ടായ്മകളുണ്ട്. സ്ഥലത്തിനും സമയത്തിനും മാറ്റമുണ്ടെങ്കിലും എല്ലായിടത്തും വായനയ്ക്കായി ഒരുമിച്ചവരെ, വായനയെ ആഘോഷമാക്കുന്നവരെ കാണാം. എല്ലാവരും ഫോണിലാണെന്ന് പരാതിപ്പെടുന്നവരും വെർച്വൽ കാലത്ത് എന്ത് വായനയെന്ന് പറഞ്ഞ് സഹതപിക്കുന്നവരും ഈ കൂട്ടായ്മകളെ പരിചയപ്പെടണം. വായന ഇല്ലാതാവുകയല്ല, ഇവരിലൂടെയെല്ലാം വായന വളരുന്നതും വിടരുന്നതും നേരിൽ കാണാം.

കബ്ബൺ റീഡ്‌സ്

കേരളത്തിലെ പല വായനാ കൂട്ടായ്മകൾക്കും പ്രചോദനമായത് 'കബ്ബൺ ONG' എന്ന ബാംഗ്ലൂരിലെ കൂട്ടായ്മയാണ്. 2022 ഡിസംബറിൽ രണ്ടുസുഹൃത്തുക്കൾ തുടങ്ങിയ പതിവുശീലങ്ങളാണ് ഇന്ന് രാജ്യാന്തര തലത്തിൽ വളർന്ന ഈ കൂട്ടായ്മ. സുഹൃത്തുക്കളായ ശ്രുതി സാഹും ഹർഷ് സ്നേഹാൻഷുവും വാരാന്ത്യങ്ങളിൽ കബ്ബൺ പാർക്കിലേക്ക് സൈക്കിൾ സവാരി നടത്തുകയും അവിടെയിരുന്ന് പുസ്തകം വായിക്കുകയും ചെയ്തിരുന്നു. ഇതിന്റെ ചിത്രങ്ങൾ ഇൻസ്റ്റ്ഗ്രാമിലൂടെ പങ്കുവെച്ചപ്പോൾ ഇരുവരുടെയും സുഹൃത്തുക്കൾകൂടി അടുത്തയാഴ്ച വായനയിൽ പങ്കുചേർന്നു. പതിയെ പതിയെ അപരിചിതരായ നിരവധിയാളുകൾ വായനക്കായി കബ്ബൺ പാർക്കിലേക്ക് എത്തുകയുമായിരുന്നു.

പ്രത്യേകിച്ച് ഒരു നിയമാവലികളുമില്ലാതെ ആർക്കും ഭാഗമാവാൻ കഴിയുന്നു എന്നതാണ് കൂട്ടായ്മയെ ഏറെ വ്യത്യസ്തമാക്കുന്നത്. അംഗത്വമെടുക്കേണ്ട, വരിസംഖ്യ ആവശ്യമില്ല, പ്രായ- ലിംഗ വ്യത്യാസമില്ല. ആരുടെയും പേരുവിവരങ്ങൾ ശേഖരിക്കപ്പെടില്ല. പരസ്പരം പരിചയപ്പെടണമെന്നും നിർബന്ധമില്ല. സംസാരിക്കേണ്ടവർക്ക് സംസാരിക്കാം, പുതിയ ബന്ധങ്ങളുണ്ടാക്കാം. മിണ്ടാൻ താൽപര്യമില്ലെങ്കിൽ എന്തേ മിണ്ടാത്തതെന്ന് ആരും ചോദിക്കില്ല. എപ്പോൾ വരണം, എപ്പോൾ പോകണം, എവിടെ ഇരിക്കണം, എന്ത് വായിക്കണം ഇതെല്ലാം വായിക്കുന്നവർക്ക് തീരുമാനിക്കാം. എല്ലാം ഓരോരുത്തരുടെയും ഇഷ്ടമനുസരിച്ചാണ്.

കൂട്ടായ്മയെക്കുറിച്ച് പ്രധാനമന്ത്രി നരേന്ദ്രമോദി എക്‌സിൽ പങ്കുവെച്ചതോടെ ദേശീയ ശ്രദ്ധയും ലഭിച്ചു. മാസങ്ങൾക്കുള്ളിൽ രാജ്യത്തിനകത്തും പുറത്തുമായി അറുപതിലധികം നഗരങ്ങളിൽ കബ്ബൺ റീഡ്മിന്റെ ചാപ്റ്ററുകൾ തുടങ്ങി. എല്ലായിടത്തും കബ്ബൺ റീഡ്‌സിന്റേത് പോലെ തന്നെ, നിയമങ്ങളോ നടപടിക്രമങ്ങളോ ഒന്നുമില്ല. വായിക്കാനിഷ്ടമുള്ളവർക്കാർക്കും വരാം, വായിക്കാം.

തിരുവനന്തപുരം റീഡ്‌സ്

2023 ജൂണിലാണ് ടെക്‌നിക്കൽ റൈറ്ററായ ബിന്നി ബാബുരാജും രേവതി, ഗായത്രി എന്നിവരും ചേർന്നാണ് തിരുവനന്തപുരത്ത് കബ്ബൺ റീഡ്‌സിന്റെ
ചാപ്റ്റർ തുടങ്ങുന്നത്. എല്ലാ ശനിയാഴ്ചയും രാവിലെ എട്ടു മണിമുതൽ 11 മണിവരെ തലസ്ഥാനത്തെ മ്യൂസിയം പാർക്കിലാണ് ഇവരുടെ ഒത്തുചേരൽ. ആദ്യത്തെ എഡിഷനിൽ 15 പേരാണ് ഭാഗമായതെങ്കിൽ പിന്നീടത് മുപ്പതും നാൽപ്പതുമായി ഉയർന്നു. ഇന്ന് കുറഞ്ഞത് 40-45 പേരെങ്കിലും പുസ്തകവുമായി വായിക്കാനെത്തുന്നുണ്ട്.

മൂന്നുമണിക്കൂർ നേരം വായനയാണ്. ശേഷം എല്ലാവരുടെയും പുസ്തകമെല്ലാം അടുക്കിവെച്ച് ഫോട്ടോയെടുക്കും, പിന്നീട് വന്നവരുടെ ഒരു ഗ്രൂപ്പ് ഫോട്ടോ. എല്ലാം കഴിഞ്ഞാൽ ഒരു ചായ കുടിച്ച് പിരിയും. ഇതാണ് തിരുവനന്തപുരം റീഡ്‌സിന്റെ പതിവ്. ഇവിടെ ചർച്ചകൾ വളരെ കുറവാണ്. മനഃപൂർവം ചർച്ചകൾ കുറയ്ക്കാൻ ശ്രമിക്കാറുണ്ടെന്ന് ക്യുറേറ്റർ ബിന്നി തന്നെ പറയുന്നു. 'ഇവിടെ വായിക്കാനെത്തുന്നവരിൽ മിക്കവരും അന്തർമുഖരും സമൂഹത്തിൽ ഇടപെടാൻ അധികം താൽപര്യമില്ലാത്തവരുമാണ്. അവരെ ചർച്ചയുടെ ഭാഗമാക്കുന്നത് ശരിയല്ല. നിശബ്ദമായി വായിച്ചു മടങ്ങാം', ബിന്നി വ്യക്തമാക്കി.

എല്ലാ ആഴ്ചയും കൂടുന്നവരുടെ ഫോട്ടോ ഇൻസ്റ്റഗ്രാമിൽ പോസ്റ്റ് ചെയ്യുമെന്നല്ലാതെ മറ്റു പ്രൊമോഷൻ പരിപാടികളൊന്നും ഇവർ നടത്താറില്ല. വാട്ട്‌സ്ആപ്പ് ഗ്രൂപ്പില്ല. ഇൻസ്റ്റഗ്രാമിൽ പോലും സംശയങ്ങൾ ചോദിക്കാമെന്നേയുള്ളൂ. ഈ തീരുമാനത്തിനും ശനിയാഴ്ച രാവിലെ എട്ടുമണിക്ക് തന്നെ കൂടുന്നതിനുമെല്ലാം വ്യക്തമായ ഉത്തരവും ഇവർക്കുണ്ട്.

'രാവിലെ നേരം വൈകുന്നതിനനുസരിച്ച് കൂടുതൽ ആളുകൾ പാർക്കിലേക്ക് എത്താൻ തുടങ്ങും. വലിയ പ്രൊമോഷൻ കൊടുത്താലും ഇതുതന്നെയാണ് പ്രശ്‌നം. ഈ കൂട്ടായ്മ എന്തിനാണെന്ന് അറിഞ്ഞ്, വായിക്കാൻ ഇഷ്ടമുള്ളവർ മാത്രം വന്നാൽ മതി. അങ്ങനെ എത്രപേർ വന്നാലും കുഴപ്പമില്ല. ഒരു അവധി ദിവസം രാവിലെ ഇത്രനേരത്തെ വായിക്കണമെന്ന് ഉറപ്പുള്ളവർ മാത്രമേ വരികയുള്ളൂ', ബിന്നി പറയുന്നു.

തൃശ്ശൂർ റീഡ്‌സ്

തിരുവനന്തപുരം റീഡ്‌സ് തുടങ്ങിയതിനു പിന്നാലെ സാംസ്‌കാരിക തലസ്ഥാനത്ത് എൻജിനീയറായ ഗൗതം തുടങ്ങിയ വായനാകൂട്ടായ്മയാണ് തൃശ്ശൂർ റീഡ്‌സ്. തേക്കിൻക്കാട് മൈതാനത്തിൽ എല്ലാ ഞായറാഴ്ചയും രാവിലെ ഒൻപത് മണിമുതൽ 12 മണിവരെയാണ് ഇവിടത്തെ വായന. ആദ്യത്തെ എഡിഷനിൽ ഏഴുപേരായിരുന്നത് പിന്നീട് ഇരുപത്തിയഞ്ച് പേരിലേക്ക് വരെ എത്തി. തിരുവനന്തപുരത്തും കൊച്ചിയിലുമൊക്കെ ജോലിചെയ്യാനും പഠിക്കാനുമായി ആ നഗരങ്ങളിലേക്ക് കുടിയേറിയവരും കൂട്ടായ്മയുടെ ഭാഗമാണെങ്കിൽ ഇവിടെ അധികവും തൃശ്ശൂർ സ്വദേശികൾ തന്നെയാണുള്ളത്. ചാലക്കുടിയിൽ നിന്നും കുന്ദംകുളത്തുനിന്നും രണ്ട് മണിക്കൂറോളം യാത്ര ചെയ്ത് വരുന്നവരുമുണ്ട്.

അംഗങ്ങളുടെ എണ്ണം പരിമിതമായതിനാൽ വട്ടത്തിലിരുന്നൊക്കെയാണ് പലപ്പോഴും ഇവിടെ വായന. വരുമ്പോൾ സംസാരമൊന്നുമില്ല, വന്ന് ഇഷ്ടപ്പെട്ട സ്ഥലത്തിരുന്ന് വായന തുടങ്ങും. തുടർച്ചയായി വായിക്കാൻ ഇഷ്ടമില്ലാത്തവർ അല്പസമയം ഇടവേളയെടുക്കും. ആ സമയം വരയ്ക്കുന്നവരുമുണ്ട്. വായനയ്ക്ക് ശേഷമുള്ള അവസാനത്തെ അരമണിക്കൂർ ചർച്ചക്കായി മാറ്റിവെച്ചിരിക്കുകയാണ്. വായിച്ച പുസ്തകങ്ങളെ കുറിച്ചോ, വായിച്ചുകൊണ്ടിരിക്കുന്ന പുസ്തകങ്ങളെ കുറിച്ചോ ആവും ചർച്ച.

ഒരു പുസ്തകം വായിക്കുന്നതിന് അപ്പുറത്തേക്ക് വായനക്കായി നിരവധി കാര്യങ്ങളും ഇവർ ചെയ്യുന്നുണ്ട് എന്നതാണ് ഈ കൂട്ടായ്മയെ മറ്റുള്ളവയിൽ നിന്നും വ്യത്യസ്തമാക്കുന്നത്. മലയാളം പുസ്തകത്തിന് പ്രാധാന്യം കൊടുത്തുതുടങ്ങിയത് അത്തരത്തിൽ ഒരു ശ്രമമായിരുന്നു. ആദ്യത്തെ ആഴ്ചകളിൽ ഇംഗ്ലീഷ് പുസ്തകങ്ങളായിരുന്നു കൂടുതല്ലെങ്കിൽ ഇപ്പോൾ മലയാളവും സ്ഥാനം പിടിച്ചു. ഇതോടൊപ്പം പുസ്തകവുമായി ബന്ധപ്പെട്ട ക്വിസുകളും കളികളും ഇവർ സംഘടിപ്പിക്കാറുണ്ട്. പുസ്തകമേളകൾ വന്നാൽ ഒരുമിച്ച് പോകുന്നതും, ഓൺലൈനിൽ നിന്ന് പുസ്തകം വാങ്ങുന്നതിന് പകരം നേരിട്ട് നാട്ടിലെ കടകളിൽ നിന്ന് പുസ്തകം വാങ്ങുന്നതുമെല്ലാം ഇവരുടെ ഇത്തരം കുഞ്ഞുശ്രമങ്ങളാണ്.

'Genre of the Month' ആണ് അടുത്തൊരു പ്രത്യേകത. നന്നായി സംസാരിക്കുന്ന ആളുകൾ മാത്രം ചർച്ചകളിൽ കൂടുതലും സംസാരിക്കാൻ തുടങ്ങിയതോടെയാണ് എല്ലാവരുടെയും പങ്കാളിത്തം ഉറപ്പാക്കുന്നതിനായി 'Genre of the Month'  തുടങ്ങിയത്. ഓരോ മാസവും ഓരോ വിഭാഗം തിരഞ്ഞടുക്കും. ജൂണിൽ ക്രൈം ത്രില്ലർ
വിഭാഗമാണ് തിരഞ്ഞെടുത്തത്. ആ ആഴ്ചയിലെ ചർച്ചയെല്ലാം ഈ വിഭാഗത്തിലെ പുസ്തകങ്ങളെകുറിച്ചും വിഭാഗത്തെകുറിച്ചുമാവും. ഇഷ്ടമുണ്ടെങ്കിൽ ആ വിഭാഗത്തിലുള്ള പുസ്തകങ്ങൾ വായിക്കുകയും ചെയ്യാം. പക്ഷേ നിർബന്ധമായും ഭാഗമാകണമെന്നില്ല. വരുന്നവർക്ക് വായിച്ചുമടങ്ങാം. ഇഷ്ടമുള്ളവർ മാത്രം പങ്കെടുത്താൽ മതി.

കോഴിക്കോട് റീഡ്‌സ്

2023 ജൂണിൽ തന്നെയാണ് കോഴിക്കോടും വായനാകൂട്ടായ്മ തുടങ്ങുന്നത്. എയറോസ്‌പെയ്‌സ് എൻജിനീയറായ ആർ.ജീവയും ഓർത്തോപീഡിക് സർജനായ എൻ.എം നവീനും ചേർന്നാണ് കോഴിക്കോടിന്റെ ഹൃദയഭാഗത്തുള്ള മാനാഞ്ചിറ സ്വകയറിൽ വായനാക്കൂട്ടം തുടങ്ങിയത്. എന്നാൽ മാനാഞ്ചിറയിലെ ആൾക്കൂട്ടവും ശബ്ദവും പാട്ടുമെല്ലാം വായനയ്ക്ക് തടസമായതോടെ ജൂലായിൽ നഗരത്തിൽ നിന്നും മാറി സരോവരം ബയോപാർക്കിൽ വെച്ച് കൂടാൻ തീരുമാനിച്ചു. അതോടെ അംഗങ്ങളുടെ എണ്ണവും കൂടാൻ തുടങ്ങി. ആദ്യ സെഷനിൽ മൂന്നുപേർ ഉണ്ടായിരുന്നത് പിന്നീട് ഇരുപത് പേരായി. ഇപ്പോൾ എല്ലാ ഞായറാഴ്ചയും ഉച്ചയ്ക്ക് രണ്ട് മുതൽ മൂന്ന് വരെ അവർ സരോവരെത്തെത്തി വായിക്കാൻ തുടങ്ങും.

അഞ്ചരയൊക്കെയാവുമ്പോൾ പുസ്തകമെല്ലാം അടച്ച് സംസാരിക്കാൻ തുടങ്ങും. വായിച്ച പുസ്തകത്തിൽ തുടങ്ങി സിനിമയിലേക്കും സാമൂഹ്യവിഷയത്തിലേക്കുമെല്ലാം സംസാരം നീളും. ആറുമണിക്ക് സരോവരം അടയ്ക്കാനാവുമ്പോൾ പല നേരങ്ങളിലായി വന്നവർ ഒരുമിച്ച് ഇറങ്ങും. ചായ കുടിച്ച് പിരിയും. ആ ആഴ്ചയിലെ ചിത്രം ഇൻസ്റ്റഗ്രാമിൽ പോസ്റ്റ് ചെയ്യുന്ന പതിവ് കോഴിക്കോട് റീഡ്‌സിനുമുണ്ട്.

ചുമരുകളില്ല, ഒറ്റയ്ക്കല്ല

ഒറ്റയ്ക്ക് നാലുചുമരുകൾക്കുള്ളിലിരുന്ന് വായന ആസ്വദിച്ച പലരും ഇന്ന് കൂട്ടായും പൊതുസ്ഥലത്തുമിരുന്ന വായനയെ അനുഭവിക്കാൻ തുടങ്ങിയത് ഇത്തരം കൂട്ടായ്മകളുടെ ഭാഗമായതിന് ശേഷമാണ്. അത് തന്നെയാണ് പലരെയും ആകർഷിക്കുന്ന കാര്യവും. 'ഒരു പൊതുസ്ഥലത്ത് നമ്മൾ ഒറ്റയ്ക്ക് പോയി ഇരുന്ന്‌ വായിച്ചാൽ എല്ലാവരും തുറിച്ചുനോക്കും. ജാഡ കാണിക്കുകയാണെന്ന് വിചാരിക്കും. എന്നാൽ ഇവിടെ ആ പ്രശ്‌നമില്ല. ആരും ശ്രദ്ധിക്കാനില്ല. എല്ലാവരും കൂടെയല്ലേ വായിക്കുന്നത്'; കോഴിക്കോട് റീഡ്‌സിന്റെ ഭാഗമായ സിവിൽ സപ്ലൈസ് വകുപ്പിലെ സീനിയർ അസിസ്റ്റന്റ് അനിത പറയുന്നു.

മുറിയിലിരുന്ന് ഒതുങ്ങികൂടി വായിച്ചിരുന്ന തനിക്ക് ഇന്ന് സരോവരത്ത് കൂട്ടമായി ഇരുന്ന് വായിക്കാനാണ് ഏറ്റവും ഇഷ്ടമെന്ന് അഭിഭാഷകയായ ഉണ്ണിമായയും പറയുന്നു. 'മുറിയിലിരിക്കുന്ന സൗകര്യത്തോടെ തന്നെ ഇവിടെയിരുന്നും വായിക്കാം. പ്രകൃതിരമണീയമായ സ്ഥലത്ത് കിടന്നും ഇരുന്നുമെല്ലാം വായിക്കാം. എന്ത് ചെയ്താലും ആരും നിങ്ങളെ വിലയിരുത്താനില്ല'- ഉണ്ണിമായ പറയുന്നു.

വായന വളരുന്നു

ചുറ്റുമുള്ളവരെല്ലാം വായിക്കുന്നത് കണ്ടാൽ നമുക്കും വായിക്കാനുള്ള താത്പര്യം വർധിക്കുമെന്നാണ് കൂട്ടായ്മയിലെ അംഗങ്ങൾ അവകാശപ്പെടുന്നുണ്ട്. 'ചിലർക്ക് വായിക്കാൻ ആഗ്രഹമുണ്ടാകും. പക്ഷേ വായിച്ചുതുടങ്ങില്ല. ഇനി വായിക്കാൻ തുടങ്ങിയാലും പല കാരണങ്ങൾ കൊണ്ട് ബ്രേക്ക് വരും. എന്നാൽ ഇവിടേക്ക് വരുമ്പോൾ ചുറ്റുമുള്ളവരെല്ലാം വായിക്കുകയാണ്. അപ്പോൾ വായിക്കണമെന്ന ഒരു തോന്നൽ നമുക്കും തോന്നിതുടങ്ങും. നമ്മളും വായിച്ചുതുടങ്ങും. പലർക്കും വായനാശീലം വീണ്ടെടുക്കാൻ പറ്റിയെന്നാണ് മിക്കവരും പറയുന്നത്. ഞായറാഴ്ച ഇവിടെ വരുമ്പോൾ മാത്രം വായിക്കുന്നവരുണ്ടാകും. എന്നാലും പുസ്തകങ്ങൾ മുുഴുവനായി വായിക്കാൻ പറ്റും'- തൃശ്ശൂർ റീഡ്‌സിലെ ഗൗതം പറയുന്നു.

വീട്ടിലിരുന്ന് വായിക്കുന്നതിനേക്കാൾ ഇവിടെ വന്ന് വായിക്കുമ്പോൾ കൂടുതൽ വായിക്കാൻ കഴിയുമെന്ന് തിരുവനന്തപുരം റീഡ്‌സിലെ അംഗവും ഗ്രാഫിക് ഡിസൈനറുമായ സന്ദീപ് എസ് പ്രദീപും സമ്മതിക്കുന്നുണ്ട്. ഒരു വർഷത്തിനുള്ളിൽ 45 ബുക്ക് സന്ദീപ് വായിച്ചുക്കഴിഞ്ഞു. 'ആദ്യം വായിക്കുന്ന കാര്യത്തിൽ നല്ല ഉഴപ്പുണ്ടായിരുന്നു. എന്നാൽ ഇപ്പോൾ ആഴ്ചയിൽ എന്തായാലും മൂന്ന് മണിക്കൂർ വായിക്കുമെന്നായി. അല്ലാത്ത സമയത്തും വായിക്കുന്നത് കൂടിയിട്ടുണ്ട്'- സന്ദീപ് പറഞ്ഞു.

പഠനത്തിന്റെ ജോലിയുടെയും തിരക്കിൽ നിന്നുപോയതും കുറഞ്ഞു പോയതുമായ വായന തിരിച്ചുകൊണ്ടുവരാനായ സന്തോഷത്തിലാണ് മിക്കവരും. എല്ലാ തിരക്കുകളിൽ നിന്നും ഇന്ന് മാറി ആഴ്ചയിൽ രണ്ടുമൂന്നു മണിക്കൂറെങ്കിലും അവർക്ക് ഇന്ന് വായനക്കായി മാറ്റിവെക്കാനാവുന്നുണ്ട്. രണ്ട് മൂന്ന് പുസ്തകങ്ങൾ മാത്രം വർഷത്തിൽ വായിച്ചിരുന്ന പലരും ഇതിന്‍റെ ഭാഗമായതിനുശേഷം 20- 22 പുസ്തകങ്ങൾ വായിക്കുന്നുണ്ട്. പതിയെ പതിയെ വായന ഒരു ശീലവും ജീവിതത്തിന്റെ ഭാഗവുമാവുകയാണ്.

പുതിയ പുസ്തകങ്ങളറിയാം, പങ്കിടാം

കൂട്ടായ്മയ്ക്കിടയിൽ പുതിയ പുസ്തകങ്ങൾ പരിചയപ്പെടുത്തലും പങ്കുവെയ്ക്കലുമെല്ലാം നടക്കുന്നുണ്ടെന്ന് എല്ലാവരും ഒരുപോലെ സമ്മതിക്കുന്ന കാര്യമാണ്. റാം കെയർ ഓഫ് ആനന്ദിയും ഒരിക്കലും പോലെ പുസ്തകങ്ങൾ വലിയ വായിക്കപ്പെടുന്നതിലും ചർച്ചാവിഷയമാകുന്നതിലും വായനാകൂട്ടായ്‌നമകളും സഹായിച്ചിട്ടുണ്ടെന്നാണ് തോന്നുന്നതെന്ന് ഗൗതം പറയുന്നു. പുതിയ പുസ്തകങ്ങൾ ചിലർ നിർദേശിക്കുന്നത് സഹാകരമായിട്ടുണ്ടെന്ന് സന്ദീപും പറയുന്നു.

ഒരു നോവലുകൾ വായിച്ചിരുന്ന പലരും മറ്റുപല യാത്രാവിവരണങ്ങളിലേക്കും ക്രൈംമിലേക്കും തിരിഞ്ഞു. മറ്റു പല ജോണറുകളും ആളുകൾ വായിക്കാൻ തുടങ്ങി. ഇതിനെല്ലാം പുറമെ തങ്ങളുടെ പുസ്തകങ്ങൾ വായിച്ച് അഭിപ്രായം പറയണമെന്ന് ആവശ്യപ്പെട്ട് പുതിയ എഴുത്തുകാരും ചില കൂട്ടായ്മകളെ ബന്ധപ്പെടാറുണ്ട്.

വേണം വായനാകൂട്ടായ്മകൾ

എല്ലാ നാട്ടിലും ഇത്തരത്തിലുളള വായനാകൂട്ടായ്മകൾ വേണമെന്നാണ് എല്ലാവരുടെയും ആവശ്യം. കൊച്ചിയിലും കോഴിക്കോടുമെല്ലാം ഇന്ന് ഒന്നിലധികം കൂട്ടായ്മകളുണ്ട്. പല പ്രായത്തിലുള്ള, വ്യത്യസ്ത മേഖലകളിൽ നിന്നുള്ള എല്ലാവരും വായനകൊണ്ട് മാത്രം കൂടിചേരുന്നത് അത്രയേറെ പ്രിയപ്പെട്ടതാണെന്ന് ഇവർ പറയുന്നു.

'വായന ഇഷ്ടപ്പെട്ട് മാത്രം വരുന്നവരാണ്. അവിടെ വേറൊരു രീതിയിലുള്ള വേർതിരിവും ഇല്ല. വായന മാത്രമാണ് എല്ലാവരെയും ഒന്നിക്കുന്നത്. വായനയെ ഇഷ്ടപ്പെടുന്നവർ ഇത്രപേരുണ്ടെന്ന് അറിയുന്നത് കൂട്ടായ്മ തുടങ്ങിയതിനുശേഷമാണ്. കുറേ അന്തർമുഖരായിട്ടുള്ളവർ മുന്നോട്ടുവന്നിട്ടുണ്ട്. സെലന്റ് റീഡിങ് ആവുമ്പോൾ അവർക്കത് സൗകര്യപ്രദമാണ്. താരങ്ങളുടെയോ ബാന്റിന്റെയോ ആരാധകരെ പോലെയല്ല, വായന കൊണ്ട് ഒരുമിച്ചവരാണ്. ഒരു പുസ്തകത്തെയോ ഒരു എഴുത്തുകാരനെയോ പിന്തുടരുന്നവരല്ല, വായന പിന്തുടരുന്നവരാണ്', ഗൗതം പറയുന്നു.

സാമൂഹ്യമാധ്യമങ്ങളുടെ ഉപയോഗം കൂടിയപ്പോൾ വായന എത്രത്തോളം നടക്കുന്നുണ്ടെന്ന സംശയം എല്ലാവർക്കുമുണ്ട്. കൂട്ടായ്മയുടെ ഭാഗമാകുമ്പോൾ മറ്റു ആൾക്കാരും വായിക്കുന്നുണ്ടെന്ന് അറിയുന്നതും വായനയെ കുറിച്ച് ചർച്ച ചെയ്യുന്നതും വലിയ പ്രചോദനമാണ്. കൂടാതെ വായനയിലൂടെ ലഭിച്ച നല്ല സൗഹൃദവും ഏറെ വിലപ്പെട്ടതാണ്, കൂട്ടായ്മകളെ വേണമെന്നാവശ്യപ്പെട്ട് സന്ദീപ് പറയുന്നു.

Content Highlights: Reading group in kerala