നർമദ മുതൽ കെ-റെയിൽ വരെ; എഴുപതല്ല, മുപ്പതാണ് മേധയുടെ പേരാട്ടവീര്യത്തിന് പ്രായം

'ഞാന്‍ എതിര്‍ക്കുന്നവര്‍ എന്നെ കൊല്ലുമായിരിക്കും. അതിനപ്പുറം എന്താണ് അവര്‍ക്ക് ചെയ്യാന്‍ കഴിയുക?...'
ടാറ്റാ ഇന്‍സ്റ്റിറ്റ്യൂട്ട് ഓഫ് സോഷ്യല്‍ സയന്‍സിലെ ഫാക്കല്‍റ്റി അംഗത്വവും ഗവേഷണവും അവസാനിപ്പിച്ച് നര്‍മദ തീരത്തെ ആദിവാസികളുടേയും കര്‍ഷകരടേയും നിലനില്‍പ്പിന്റെ പോരാട്ടത്തിനായി ഇറങ്ങിത്തിരിച്ച 30-കാരിയുടെ വാക്കുകളായിരുന്നു ഇത്. നര്‍മദ നദീസംരക്ഷണ പ്രക്ഷോഭങ്ങളുടെ മുഖമായിരുന്ന ആ യുവതിയുടെ പോരാട്ടം അവിടെ  ഒതുങ്ങിനിന്നില്ല. രാജ്യത്തെവിടെ നീതി നിഷേധമുണ്ടോ അവിടെയെല്ലാം അവര്‍ സമരങ്ങളുടെ മുന്നില്‍നിന്നു. അവകാശപ്പോരാട്ടങ്ങളിലെ ആ മേധാശക്തിക്ക് 70 വയസ് തികയുകയാണ്. ആ സന്ധിയില്ലാത്ത പോരാട്ടങ്ങളുടെ സമരരൂപത്തിന്റെ പേരാണ് മേധാ പട്കര്‍.

സമരപഥങ്ങളില്‍ ഒരിക്കലും തളരാത്ത, ശക്തി ക്ഷയിക്കാത്ത മേധയുടെ പേര് നര്‍മദ ബച്ചാവോ ആന്ദോളനുമായി കൂട്ടിച്ചേര്‍ത്താണ് എപ്പോഴും പറയപ്പെടാറ്. എന്നാല്‍, അവിടെ മാത്രമായി മേധയുടെ പോരാട്ടം ഒതുങ്ങിനിന്നില്ല. പോലീസിന്റേയും രാഷ്ട്രീയ നേതൃത്വങ്ങളുടേയും ആക്രമണത്തിന് അവര്‍ പലതവണ ഇരയായി. നിലവിലെ ഭരണകൂടവും അതിന് നേതൃത്വം നല്‍കുന്ന പാര്‍ട്ടിയും ഇന്നും അവരെ വാക്കുകള്‍ കൊണ്ട് അക്രമിക്കുന്നു. എന്നിട്ടും, അവര്‍ തന്റെ ജീവിതലക്ഷ്യവുമായി മുന്നോട്ടുപോകുന്നു. താനെന്തെങ്കിലും ചെയ്യുന്നുണ്ടെങ്കില്‍ അത് തന്റെ കര്‍ത്തവ്യം മാത്രമാണെന്ന വിശ്വാസത്തോടെ ഇന്നും വിഷയങ്ങളില്‍ ഇടപെടുന്നു. നര്‍മദാതീരത്തെ നിരാലംബരുടെ നേതാവ് ഒരു രാജ്യത്തിന്റെയാകെ 'മേധാതായ്'യും 'മേധാദീദി'യുമായി നിലകൊള്ളുന്നു.

Content Highlights: Life Story of Indian Social activist Medha Patkar