സംഘർഷങ്ങളുടെ നടുവിലും ശാന്തമായി ജിദ്ദ; സുരക്ഷയിൽ ഉറച്ച വിശ്വാസവുമായി പ്രവാസികൾ

ജിദ്ദ: മേഖലയിൽ സംഘർഷാവസ്ഥ തുടരുമ്പോഴും സൗദി അറേബ്യയിലെ തീരനഗരമായ ജിദ്ദയിൽ ദൈനംദിന ജീവിതം സാധാരണ നിലയിൽ തുടരുകയാണെന്ന് താമസക്കാരും സന്ദർശകരും. തിരക്കേറിയ റോഡുകളും സജീവമായ വ്യാപാരകേന്ദ്രങ്ങളും വാരാന്ത്യങ്ങളിലെ സൗഹൃദസംഗമങ്ങളുമെല്ലാം നഗരത്തിന്റെ പതിവ് ജീവിതത്തിന് മാറ്റമില്ലെന്നതിന്റെ സൂചനകളാണ്. രാജ്യത്തിന്റെ സുരക്ഷാസംവിധാനങ്ങളിലും ജനങ്ങളുടെ സംരക്ഷണത്തിനായി അധികൃതർ സ്വീകരിക്കുന്ന നടപടികളിലും വിശ്വാസമുണ്ടെന്ന് വിവിധ രാജ്യങ്ങളിൽനിന്നുള്ള പ്രവാസികൾ വ്യക്തമാക്കുന്നു.

സാമൂഹിക മാധ്യമങ്ങളിലൂടെ പ്രചരിക്കുന്ന സ്ഥിരീകരിക്കാത്ത വാർത്തകൾ അനാവശ്യമായ ആശങ്കകൾക്ക് ഇടയാക്കാമെന്നും ഔദ്യോഗിക സ്രോതസ്സുകളിൽനിന്നുള്ള വിവരങ്ങൾക്ക് മുൻഗണന നൽകണമെന്നും ജിദ്ദയിലെ താമസക്കാർ അഭിപ്രായപ്പെടുന്നു. നിലവിലെ സാഹചര്യം സംബന്ധിച്ച് ജാഗ്രത പുലർത്തുമ്പോഴും പരിഭ്രാന്തരാകേണ്ട സാഹചര്യമില്ലെന്നാണ് പലരുടെയും നിലപാട്.

വർഷങ്ങളായി സൗദി അറേബ്യയിൽ താമസിക്കുന്ന പ്രവാസികൾക്ക് രാജ്യത്തിന്റെ സുരക്ഷിതത്വത്തെക്കുറിച്ചുള്ള ആത്മവിശ്വാസം ദീർഘകാലത്തെ ജീവിതാനുഭവങ്ങളിൽനിന്ന് ലഭിച്ചതാണ്. ചരിത്രപ്രസിദ്ധമായ അൽബലദിലെ തെരുവുകളിലും ജിദ്ദ കോർണിഷിലും തിരക്കേറിയ തഹ്‌ലിയ റോഡിലുമെല്ലാം പതിവ് തിരക്കുകൾ തുടരുന്നതായി അവർ ചൂണ്ടിക്കാട്ടുന്നു.

ചെറുപ്പം മുതൽ സൗദി അറേബ്യയിൽ കഴിയുന്ന കണ്ണൂർ സ്വദേശിയായ 52കാരന് ദൈനംദിന ജീവിതത്തിൽ കാര്യമായ മാറ്റങ്ങളൊന്നുമില്ല. ജോലിക്ക് പോകുന്നതും പ്രാദേശിക വിപണികൾ സന്ദർശിക്കുന്നതും പതിവുപോലെ തുടരുകയാണ്. പതിറ്റാണ്ടുകളായി ഈ രാജ്യത്ത് ജീവിക്കുന്നതിലൂടെ കൈവന്ന അനുഭവമാണ് സുരക്ഷയെക്കുറിച്ചുള്ള തന്റെ വിശ്വാസത്തിന് അടിസ്ഥാനമെന്ന് അദ്ദേഹം പറഞ്ഞു.

സൗദി അറേബ്യയോട് വലിയ കടപ്പാടുണ്ടെന്നും ജനങ്ങളുടെ സുരക്ഷ ഉറപ്പാക്കാൻ സർക്കാർ ആവശ്യമായ നടപടികൾ സ്വീകരിക്കുമെന്ന വിശ്വാസമുണ്ടെന്നും അദ്ദേഹം വ്യക്തമാക്കി. അതേസമയം, മേഖലയിൽ അടുത്തിടെയുണ്ടായ സംഭവങ്ങളിൽ ദുഃഖവും അദ്ദേഹം രേഖപ്പെടുത്തി.

ജിദ്ദയിൽ ജനിച്ചുവളർന്ന മറ്റൊരു പ്രവാസി കൗമാരക്കാരനും തന്റെ ജീവിതക്രമത്തിൽ മാറ്റമില്ലെന്ന് പറഞ്ഞു. കോളജിൽ പോകുന്നതും സുഹൃത്തുക്കളെ കാണുന്നതും പുറത്തുപോയി സമയം ചെലവഴിക്കുന്നതുമെല്ലാം സാധാരണപോലെ തുടരുകയാണ്. സൗദി അറേബ്യയുടെ സുരക്ഷയിലും സ്ഥിരതയിലും തങ്ങൾക്ക് വിശ്വാസമുണ്ടെന്നും അദ്ദേഹം കൂട്ടിച്ചേർത്തു.

പൊതുജനങ്ങളുടെ സുരക്ഷയ്ക്കും ക്ഷേമത്തിനും സൗദി സർക്കാർ നൽകുന്ന പ്രാധാന്യമാണ് തങ്ങളുടെ ആത്മവിശ്വാസം വർധിപ്പിക്കുന്നതെന്ന് മറ്റു പ്രവാസിയും പറയുന്നു. റിയാദിലുണ്ടായ ആക്രമണങ്ങളെക്കുറിച്ച് ദുഃഖം പങ്കുവെച്ച അവർ, പ്രതിസന്ധിഘട്ടങ്ങളിൽ ലഭിക്കുന്ന പിന്തുണയും പരിചരണവും സൗദി അറേബ്യയോടുള്ള വിശ്വാസം ശക്തിപ്പെടുത്തുന്നതായും വ്യക്തമാക്കി.

കുടുംബത്തോടൊപ്പം സുരക്ഷിതത്വം അനുഭവിക്കുന്നതായും പതിവുപോലെ ജോലിക്ക് പോകുന്നതായും കുടുംബത്തോടൊപ്പം താമസിക്കുന്ന മലപ്പുറത്തുകാരനായ മറ്റൊരു പ്രവാസി പറഞ്ഞു. താമസക്കാരുടെ സുരക്ഷയ്ക്കും ക്ഷേമത്തിനും സൗദി അറേബ്യ നൽകുന്ന പരിഗണനയിൽ വിശ്വാസമുണ്ടെന്നും ദൈനംദിന ജീവിതം തടസ്സങ്ങളില്ലാതെ മുന്നോട്ടുപോകുകയാണെന്നും അദ്ദേഹം വ്യക്തമാക്കി.

പ്രാദേശിക സംഘർഷങ്ങൾ വാർത്തകളിൽ നിറയുമ്പോഴും ജിദ്ദയിലെ ജീവിതം പതിവുപോലെ മുന്നോട്ടുകൊണ്ടുപോകുന്നവരുടെ വാക്കുകളിൽ പ്രകടമാകുന്നത് സുരക്ഷയിലുള്ള ആത്മവിശ്വാസമാണ്. അതേസമയം, ഔദ്യോഗിക നിർദേശങ്ങൾ പാലിക്കുകയും വിശ്വസനീയമായ സ്രോതസ്സുകളിൽനിന്ന് മാത്രം വിവരങ്ങൾ സ്വീകരിക്കുകയും ചെയ്യേണ്ടതിന്റെ പ്രാധാന്യവും താമസക്കാർ ഓർമിപ്പിക്കുന്നു.

Content Highlights: saudi news