ജിദ്ദയിൽ ഹജ്ജ് കോൺഫറൻസും പ്രദർശനവും നവംബറിൽ

ജിദ്ദ: രണ്ട് വിശുദ്ധ പള്ളികളുടെ പരിപാലകനായ സൽമാൻ ബിൻ അബ്ദുൽ അസീസ് രാജാവിന്റെ രക്ഷാകർതൃത്വത്തിൽ ആറാമത് ഹജ്ജ് കോൺഫറൻസും പ്രദർശനവും ജിദ്ദയിൽ നടക്കും. 2026 നവംബർ 8 മുതൽ 11 വരെ നടക്കുന്ന പരിപാടിക്ക് സൗദി ഹജ്ജ്-ഉംറ മന്ത്രാലയമാണ്, സൗദി വിഷൻ 2030യുടെ ഭാഗമായ ഗസ്റ്റ്സ് ഓഫ് ഗോഡ് സർവീസ് പ്രോഗ്രാമുമായി സഹകരിച്ച് നേതൃത്വം നൽകുന്നത്.

പ്രാദേശികവും അന്തർദേശീയവുമായ സർക്കാർ, സ്വകാര്യ, ലാഭേച്ഛയില്ലാത്ത മേഖലകളിൽ നിന്നായി 520-ലധികം സ്ഥാപനങ്ങൾ കോൺഫറൻസിൽ പങ്കെടുക്കും. വിവിധ മേഖലകളിലെ തീരുമാനമെടുക്കുന്നവരും ഇതിൽ പങ്കാളികളാകും.

അല്ലാഹുവിന്റെ അതിഥികളായ തീർഥാടകർക്ക് മികച്ച സേവനങ്ങൾ ഉറപ്പാക്കുന്നതിനുള്ള സൗദി നേതൃത്വത്തിന്റെ തുടർച്ചയായ ശ്രദ്ധയുടെ ഭാഗമായാണ് കോൺഫറൻസ് സംഘടിപ്പിക്കുന്നത്. ഹജ്ജ് സേവന സംവിധാനത്തിന്റെ വികസനം, സേവനങ്ങളുടെ ഗുണനിലവാരം ഉയർത്തൽ, സൗദി വിഷൻ 2030യുടെയും ഗസ്റ്റ്സ് ഓഫ് ഗോഡ് സർവീസ് പ്രോഗ്രാമിന്റെയും ലക്ഷ്യങ്ങൾ കൈവരിക്കൽ എന്നിവയാണ് പ്രധാന ലക്ഷ്യങ്ങൾ.

ഹിജ്‌റ വർഷം 1448-ലെ ഹജ്ജ് സീസണിനായുള്ള ആദ്യഘട്ട ഒരുക്കങ്ങൾക്ക് നിർണായക വേദിയായി കോൺഫറൻസ് മാറും. ബന്ധപ്പെട്ട വിവിധ വകുപ്പുകളും സ്ഥാപനങ്ങളും ഒത്തുചേർന്ന് കരാറുകൾ പൂർത്തിയാക്കുക, പ്രവർത്തനപരവും സംഘടനാപരവുമായ കാര്യങ്ങൾ ചർച്ച ചെയ്യുക, വിവിധ പരിഹാരങ്ങളും പദ്ധതികളും വിലയിരുത്തുക, പങ്കാളിത്തങ്ങൾ രൂപപ്പെടുത്തുക, ഹജ്ജ് സീസണിനായുള്ള തയ്യാറെടുപ്പ് ശക്തിപ്പെടുത്തുക തുടങ്ങിയവയാണ് പ്രധാന അജണ്ടകൾ.

ലോകത്തിന്റെ വിവിധ ഭാഗങ്ങളിൽ നിന്നുള്ള നേതാക്കളെയും തീരുമാനമെടുക്കുന്നവരെയും വിദഗ്ധരെയും ഒരുമിച്ച് കൊണ്ടുവരുന്ന ആഗോള വേദിയായും ഹജ്ജ് കോൺഫറൻസ് മാറും. വിവിധ രാജ്യങ്ങളിലെ മികച്ച മാതൃകകളും പരിഹാരങ്ങളും വിലയിരുത്തുന്നതിനും അനുഭവങ്ങൾ പങ്കുവെക്കുന്നതിനുമായി മൂന്ന് പ്രധാന മേഖലകളിലാണ് പരിപാടികൾ നടക്കുക.

ഇൻഫ്രാസ്ട്രക്ചർ ആൻഡ് ഓപ്പറേഷണൽ സർവീസസ് വിഭാഗത്തിൽ ഗതാഗതവും ലോജിസ്റ്റിക്സും, അടിസ്ഥാന സൗകര്യങ്ങളും സംവിധാനങ്ങളുടെ നടത്തിപ്പും, താമസവും ഹോസ്പിറ്റാലിറ്റിയും, ഭക്ഷണ വിതരണവും ഉൾപ്പെടും.

എംപവർമെന്റ് ആൻഡ് ഇന്റഗ്രേഷൻ വിഭാഗത്തിൽ സുരക്ഷ, ആരോഗ്യപരിചരണം, മാധ്യമ-ആശയവിനിമയ സംവിധാനങ്ങൾ, സാങ്കേതികവിദ്യ, നവീകരണം എന്നിവ ചർച്ച ചെയ്യും.

സുസ്ഥിര വികസനം എന്ന മൂന്നാമത്തെ വിഭാഗത്തിൽ മൂന്നാം മേഖല, സംരംഭകത്വം, പരിശീലനം, യോഗ്യതാ വികസനം, തീർഥാടകരുടെ അനുഭവം മെച്ചപ്പെടുത്തുന്നതിനുള്ള പദ്ധതികൾ എന്നിവ ഉൾപ്പെടും.

കോൺഫറൻസിനോടനുബന്ധിച്ച് 67,000 ചതുരശ്ര മീറ്ററിലധികം വിസ്തൃതിയിൽ ഹജ്ജ് സേവന സംവിധാനത്തെ കേന്ദ്രീകരിച്ചുള്ള പ്രത്യേക പ്രദർശനവും നടക്കും. 150-ലധികം രാജ്യങ്ങളിൽ നിന്നുള്ള വിവിധ സ്ഥാപനങ്ങളും സേവന-പരിഹാര ദാതാക്കളും പ്രദർശനത്തിൽ പങ്കെടുക്കും.

ഹജ്ജ് കാര്യാലയങ്ങൾ, സേവന ദാതാക്കൾ, വിവിധ മേഖലകളിലെ വിദഗ്ധർ എന്നിവരെ ഒരുമിച്ച് കൊണ്ടുവരുന്ന പ്രത്യേക വിഭാഗങ്ങളായാണ് പ്രദർശനം ഒരുക്കുന്നത്. വ്യോമയാനം, ഗതാഗതം, ഹോസ്പിറ്റാലിറ്റി, ആരോഗ്യം, അടിസ്ഥാന സൗകര്യങ്ങൾ, സാങ്കേതികവിദ്യ, നവീകരണം, തൊഴിലാളി സേവനങ്ങൾ, നിക്ഷേപം, ബിസിനസ് വികസനം തുടങ്ങിയ മേഖലകൾ ഇതിൽ ഉൾപ്പെടും.

പ്രത്യേക ഫോറങ്ങൾ, സംവാദങ്ങൾ, റൗണ്ട് ടേബിൾ ചർച്ചകൾ, വർക്ക്‌ഷോപ്പുകൾ, ബിസിനസ് കൂടിക്കാഴ്ചകൾ എന്നിവയിലൂടെയാണ് ഈ വിഭാഗങ്ങൾ സജീവമാക്കുക. പുതിയ പദ്ധതികളും കരാറുകളും പ്രഖ്യാപിക്കുന്നതിനും നൂതന പരിഹാരങ്ങൾ അവതരിപ്പിക്കുന്നതിനുമുള്ള വേദികളും ഒരുക്കും.

ഹജ്ജ് സേവന സംവിധാനത്തിലെ വിവിധ ഘടകങ്ങൾ തമ്മിലുള്ള ഏകോപനം ശക്തിപ്പെടുത്തുന്നതിനും പുതിയ പങ്കാളിത്തങ്ങൾ രൂപപ്പെടുത്തുന്നതിനും തീർഥാടകർക്ക് നൽകുന്ന സേവനങ്ങളുടെ നിലവാരം ഉയർത്തുന്നതിനും ഇത് സഹായിക്കുമെന്ന് മന്ത്രാലയം വ്യക്തമാക്കി.

കഴിഞ്ഞ പതിപ്പിലും ഹജ്ജ് കോൺഫറൻസിനും പ്രദർശനത്തിനും വലിയ ജനപങ്കാളിത്തമാണ് ലഭിച്ചത്. 150-ലധികം രാജ്യങ്ങളിൽ നിന്നായി 2.04 ലക്ഷത്തിലധികം സന്ദർശകരും 270 പ്രദർശകരും പങ്കെടുത്തു. 134 പ്രത്യേക സെഷനുകളും വർക്ക്‌ഷോപ്പുകളും സംഘടിപ്പിച്ചു. ലോകത്തിന്റെ വിവിധ രാജ്യങ്ങളിൽ നിന്നുള്ള 2,600-ലധികം പേർക്ക് പരിശീലന പരിപാടികളിലൂടെ പ്രയോജനം ലഭിക്കുകയും ചെയ്തു.

ആറാമത് ഹജ്ജ് കോൺഫറൻസിലും പ്രദർശനത്തിലും പങ്കെടുക്കാൻ താൽപര്യമുള്ള സ്ഥാപനങ്ങളെയും വിദഗ്ധരെയും ബന്ധപ്പെട്ടവരെയും ഹജ്ജ്-ഉംറ മന്ത്രാലയം രജിസ്റ്റർ ചെയ്യാൻ ക്ഷണിച്ചു.

കോൺഫറൻസിന്റെ വിവിധ പരിപാടികൾ, പ്രവർത്തനങ്ങൾ, തീയതികൾ എന്നിവയുടെ വിശദാംശങ്ങൾ ഔദ്യോഗിക കോൺഫറൻസ് വെബ്സൈറ്റിൽ ലഭ്യമാണ്.

Content Highlights: The 6th Hajj Conference and Exhibition will take place in Jeddah from November 8 to 11, 2026., Organized by the Saudi Hajj and Umrah Ministry in collaboration with the Guests of God Service Program under Vision 2030., Over 520 local and international institutions will participate to prepare for the 1448 AH Hajj season., Features a 67,000+ square meter exhibition with participants from over 150 countries focusing on infrastructure, technology, and pilgrim services.