ഒ.എൻ.വി. കുറുപ്പിന് പ്രണാമമർപ്പിച്ച് സോഹാർ ലിറ്റററി ഫോറം

മസ്‌കറ്റ്: മലയാളത്തിന്റെ പ്രിയകവി ഒ.എൻ.വി. കുറുപ്പിന്റെ സ്മരണ പുതുക്കി സോഹാർ ലിറ്റററി ഫോറത്തിന്റെ ആഭിമുഖ്യത്തിൽ ഓൺലൈൻ അനുസ്മരണ സംഗമം സംഘടിപ്പിച്ചു. സാംസ്‌കാരിക ലോകത്തെ നിരവധി പ്രമുഖരും സാഹിത്യപ്രേമികളും പങ്കെടുത്ത ചടങ്ങിൽ ഒ.എൻ.വിയുടെ കാവ്യപ്രപഞ്ചത്തെക്കുറിച്ചും മലയാള സാഹിത്യത്തിന് അദ്ദേഹം നൽകിയ സംഭാവനകളെക്കുറിച്ചും ഗൗരവകരമായ ചർച്ചകൾ നടന്നു.

പ്രമുഖ സാംസ്‌കാരിക പ്രവർത്തകനും പ്രഭാഷകനുമായ ഡോ. റോയി പി. വീട്ടിൽ അനുസ്മരണ പ്രഭാഷണം നടത്തി. ഒ.എൻ.വിയുടെ കവിതകളിലെ മാനവികതയും പ്രകൃതിസ്‌നേഹവും കാലാതീതമാണെന്ന് അദ്ദേഹം ഓർമിപ്പിച്ചു. വാക്കും വരികളും കൊണ്ട് വിപ്ലവവും പ്രണയവും ഒരുപോലെ തുന്നിച്ചേർത്ത കവിയായിരുന്നു ഒ.എൻ.വിയെന്ന് ഡോ. റോയി പി. വീട്ടിൽ തന്റെ പ്രഭാഷണത്തിൽ കൂട്ടിചേർത്തു.

ലിറ്റററി ഫോറം പ്രസിഡന്റ് കെ.ആർ.പി. വള്ളികുന്നം, സെക്രട്ടറി സി.കെ. സുനിൽകുമാർ എന്നിവർ ചടങ്ങിൽ സംസാരിക്കുകയും ഒ.എൻ.വിയുടെ മലയാളസാഹിത്യത്തിലെ സംഭാവനകളെക്കുറിച്ചുള്ള ഓർമകൾ പങ്കുവെക്കുകയും ചെയ്തു. അനുസ്മരണത്തിന്റെ ഭാഗമായി പരിപാടിയിൽ നിരവധിപ്പേർ പങ്കെടുത്തു.

സനീഷ്, നിഷാദ് ചങ്ങരംകുളം, ബിന്ദു മനോജ്, അവന്തിക സുരേഷ്, ദിയ ആർ. നായർ, ശിഖ സനീഷ്, അഭിജിത്ത് നാരായൺ, വിദ്യാ ധനിൽ, സന്ദേശ് ആൻഡ് ഫാമിലി എന്നിവർ ഒ.എൻ.വിയുടെ ശ്രദ്ധേയമായ കവിതകളും ചലച്ചിത്ര- നാടകഗാനങ്ങളും ചടങ്ങിൽ ആലപിച്ചു. അദ്ദേഹത്തിന്റെ വരികളിലെ ലളിതവും എന്നാൽ അഗാധവുമായ അർഥതലങ്ങളെ സ്പർശിക്കുന്ന രീതിയിലായിരുന്നു അവതരണങ്ങൾ.

സമൂഹത്തിന്റെ വിവിധ തുറകളിൽനിന്നുള്ള ആളുകൾ ഓൺലൈൻ പ്ലാറ്റ്ഫോമിലൂടെ സംഗമത്തിന്റെ ഭാഗമായി. വരും തലമുറയ്ക്കും ഒ.എൻ.വിയുടെ കൃതികൾ വഴികാട്ടിയാകുമെന്ന് ചടങ്ങിൽ സംസാരിച്ച സാഹിത്യകാരനും സോഹാർ ലിറ്റററി ഫോറം പ്രസിഡന്റുമായ കെ.ആർ.പി. വള്ളികുന്നം അഭിപ്രായപ്പെട്ടു.

Content Highlights: Sohar Literary Forum held an online tribute to beloved Malayalam poet ONV Kurup in Muscat, celebrating his contributions to literature and humanity