കുവൈറ്റ് മഹാ ഇടവക സപ്തതി സംഗമത്തിന്റെ ഉദ്ഘാടനം ഡോ. യുഹാനോൻ മാർ ദിയസ്കോറോസ് നിർവഹിച്ചു

കുവൈറ്റ്: മലങ്കര ഓർത്തഡോക്സ് സുറിയാനി സഭയുടെ കൽക്കത്താ ഭദ്രാസനത്തിന്റെ കീഴിലുള്ള കുവൈറ്റ് സെന്റ് ഗ്രീഗോറിയോസ് ഇന്ത്യൻ ഓർത്തഡോക്സ് മഹാ ഇടവകയുടെ സപ്തതി ആഘോഷങ്ങളുടെ ഭാഗമായി സംഘടിപ്പിച്ച ‘കുവൈറ്റ് മഹാ ഇടവക സപ്തതി സംഗമം 2026’-ന്റെ ഉദ്ഘാടനം മലങ്കര ഓർത്തഡോക്സ് സുറിയാനി സഭയുടെ കോട്ടയം ഭദ്രാസന മെത്രാപ്പോലീത്താ ഡോ. യുഹാനോൻ മാർ ദിയസ്കോറോസ് നിർവഹിച്ചു.

കൽക്കത്താ ഭദ്രാസനാധിപൻ അലക്സിയോസ് മാർ യൗസേബിയോസ് മെത്രാപ്പോലീത്താ അധ്യക്ഷത വഹിച്ച സംഗമത്തിൽ കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ, ചാണ്ടി ഉമ്മൻ എം.എൽ.എ., കൊല്ലം ഭദ്രാസന മെത്രാപ്പോലീത്താ ഡോ. ജോസഫ് മാർ ദിവന്നാസിയോസ്, മലങ്കര സഭയുടെ അൽമായ ട്രസ്റ്റി റോണി വർഗീസ് എബ്രഹാം എന്നിവർ വിശിഷ്ടാതിഥികളായി പങ്കെടുത്തു.

കുവൈറ്റ് മഹാ ഇടവക വികാരി റവ. ഫാ. ഡോ. ബിജു പാറയ്ക്കൽ സ്വാഗതവും സപ്തതി ജനറൽ കൺവീനർ മാത്യൂസ് വർഗീസ് നന്ദിയും രേഖപ്പെടുത്തി. മഹാ ഇടവക ട്രസ്റ്റി ജെറി ജോൺ കോശി, സെക്രട്ടറി ടിജു അലക്സ് പോൾ, സഭാ മാനേജിംഗ് കമ്മിറ്റി അംഗങ്ങളായ തോമസ് കുരുവിള, പോൾ വർഗീസ്, സപ്തതി ഫിനാൻസ് കൺവീനർ നവീൻ കുര്യൻ തോമസ്, പ്രോഗ്രാം കൺവീനർ ബിനു ബെന്ന്യാം എന്നിവർ ചടങ്ങിൽ സന്നിഹിതരായിരുന്നു.

മഹാ ഇടവകയുടെ മുൻ വികാരിമാരെയും മുൻകാലങ്ങളിൽ ഭരണസാരഥ്യം വഹിച്ചവരെയും ചടങ്ങിൽ ആദരിച്ചു. കീസ് ബാൻഡ് അവതരിപ്പിച്ച ക്രൈസ്തവ ഗാനാലാപനം സപ്തതി സംഗമത്തിന്റെ മുഖ്യ ആകർഷണമായി.

പുതുപ്പള്ളി പള്ളി ഓഡിറ്റോറിയത്തിൽ നടന്ന സംഗമത്തിൽ കുവൈറ്റ് മഹാ ഇടവകയുടെ മുൻ വികാരിമാർ, ട്രസ്റ്റിമാർ, സെക്രട്ടറിമാർ, സഭാ മാനേജിംഗ് കമ്മിറ്റി അംഗങ്ങൾ, കുവൈറ്റിലെ പ്രവാസജീവിതത്തിനുശേഷം നാട്ടിൽ സ്ഥിരതാമസമാക്കിയ മുൻ ഇടവകാംഗങ്ങൾ, അവധിക്കായി നാട്ടിലെത്തിയ ഇടവകാംഗങ്ങൾ എന്നിവർ പങ്കെടുത്തു.

Content Highlights: Platinum Jubilee celebrations of Kuwait St. Gregorious Indian Orthodox Maha Edavaka officially inaugurated for 2026., Inaugurated by Kottayam Diocese Metropolitan Dr. Yuhanon Mar Dioscoros., Featured prominent guests including Kerala Legislative Assembly Speaker and Chandy Oommen MLA., Honored former vicars and past leaders of the parish during the event at Puthuppally Church Auditorium.