ഇറാൻ ധാരണാപത്രം ചട്ടക്കൂട് മാത്രം; ഗൾഫ് രാജ്യങ്ങളുടെ പരമാധികാരം സംരക്ഷിക്കുമെന്ന് മാർക്കോ റൂബിയോ

മനാമ: ഇറാനുമായുള്ള കരാറിൽ യുഎസ് ഒപ്പുവെക്കുന്നതിൽ ആശങ്ക വേണ്ടെന്നും ഗൾഫ് രാജ്യങ്ങളുടെ താൽപ്പര്യങ്ങൾ സംരക്ഷിക്കപ്പെടുമെന്നും ഉറപ്പ് നൽകി യുഎസ് സ്റ്റേറ്റ് സെക്രട്ടറി മാർക്കോ റൂബിയോ. ബഹ്റൈൻ സന്ദർശനത്തിനിടെ മനാമയിൽ നടന്ന വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.

ഇറാനുമായുള്ള പുതിയ ധാരണാപത്രം ഗൾഫ് രാജ്യങ്ങളുടെ താൽപ്പര്യങ്ങളെയോ പരമാധികാരത്തെയോ സുരക്ഷയെയോ സ്ഥിരതയെയോ ഒരുതരത്തിലും ബാധിക്കില്ലെന്ന് റൂബിയോ ഉറപ്പുനൽകി. ഗൾഫ് സഹകരണ കൗൺസിൽ (ജിസിസി) അംഗരാജ്യങ്ങളുടെ സുരക്ഷാ കാര്യങ്ങളിൽ അമേരിക്ക പ്രതിജ്ഞാബദ്ധമാണെന്ന് റൂബിയോ പറഞ്ഞു.

തന്റെ ഗൾഫ് പര്യടനത്തിന്റെ പ്രധാന ലക്ഷ്യം ഇറാനുമായുള്ള ചർച്ചകളുടെ ഫലങ്ങളെക്കുറിച്ച് പ്രാദേശിക പങ്കാളികളെ ബോധവാന്മാരാക്കുക എന്നതാണെന്ന് അദ്ദേഹം വ്യക്തമാക്കി. സുപ്രധാനമായ നയതന്ത്ര നീക്കങ്ങൾ പങ്കാളികൾ മാധ്യമങ്ങളിലൂടെ അറിയുന്ന സാഹചര്യം ഉണ്ടാകാൻ അമേരിക്ക ആഗ്രഹിക്കുന്നില്ലെന്നും പകരം നേരിട്ടുള്ള ആശയവിനിമയം ആവശ്യമാണെന്നും അദ്ദേഹം പറഞ്ഞു. മനാമയിൽ ജിസിസി വിദേശകാര്യ മന്ത്രിമാരുമായി നടത്തിയ കൂടിക്കാഴ്ച വളരെ ഫലപ്രദമായിരുന്നുവെന്ന് അദ്ദേഹം പറഞ്ഞു. ചർച്ചകളിൽ ജിസിസി രാജ്യങ്ങളുടെ കാഴ്ചപ്പാടുകൾ പ്രതിഫലിക്കണമെന്നാണ് അമേരിക്ക ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു.

സമുദ്ര സുരക്ഷയെക്കുറിച്ചും ഹോർമുസ് കടലിടുക്കിലെ സാഹചര്യങ്ങളെക്കുറിച്ചും ചർച്ചയിൽ പരാമർശങ്ങളുണ്ടായി. അന്താരാഷ്ട്ര ജലപാതകളിലൂടെയുള്ള കപ്പൽ ഗതാഗതത്തിന് ടോളുകളോ ഫീസോ ചുമത്താനുള്ള നീക്കങ്ങളെ ജിസിസി രാജ്യങ്ങൾ ശക്തമായി എതിർക്കുന്നുണ്ടെന്നും അത്തരം നടപടികളെ അമേരിക്ക ഒരു കാരണവശാലും പിന്തുണയ്ക്കില്ലെന്നും റൂബിയോ വ്യക്തമാക്കി.

പ്രസ്താവനകൾക്ക് ഉപരിയായി, കടലിടുക്കിലൂടെയുള്ള കപ്പലുകളുടെ സുഗമമായ സഞ്ചാരം ഉറപ്പാക്കുന്ന നടപടികളെ അടിസ്ഥാനമാക്കിയായിരിക്കും അമേരിക്ക സ്ഥിതിഗതികൾ വിലയിരുത്തുകയെന്നും അദ്ദേഹം പറഞ്ഞു.

ഇറാനുമായുള്ള നയതന്ത്ര ചർച്ചകൾക്ക് എല്ലാ അവസരങ്ങളും നൽകാൻ വാഷിങ്ടൺ തയ്യാറാണെങ്കിലും അത് ഗൾഫ് പങ്കാളികളുടെ സുരക്ഷയെ ബാധിക്കുന്ന തരത്തിലാവില്ലെന്ന് അദ്ദേഹം ആവർത്തിച്ചു. നിലവിലെ ധാരണാപത്രം ഒരു അന്തിമ കരാറല്ലെന്നും മറിച്ച് ചർച്ചകൾക്കുള്ള ഒരു പൊതു ചട്ടക്കൂട് മാത്രമാണെന്നും അദ്ദേഹം വിശദീകരിച്ചു. ഇതിൽ സമയപരിധി, പരിശോധനാ സംവിധാനങ്ങൾ, പരിമിതികൾ തുടങ്ങിയ കാര്യങ്ങളാണ് ഉൾപ്പെടുത്തിയിരിക്കുന്നത്.

നിലവിലുള്ള ഉപരോധ ഇളവ് 60 ദിവസത്തെ ഹ്രസ്വകാലത്തേക്ക് മാത്രമുള്ളതാണെന്നും ഇറാൻ തയ്യാറാണെങ്കിൽ ഒരു 'യഥാർഥ കരാറിൽ' എത്താൻ അമേരിക്ക സന്നദ്ധമാണെന്നും അദ്ദേഹം പറഞ്ഞു. യുണൈറ്റഡ് അറബ് എമിറേറ്റ്സും കുവൈറ്റും സന്ദർശിച്ച ശേഷമാണ് യുഎസ് സ്റ്റേറ്റ് സെക്രട്ടറി ബഹ്റൈനിലെത്തിയത്.

Content Highlights: US reaffirms commitment to GCC security despite new Iran MoU., Iran-US MoU is a framework for talks, not a final agreement., US opposes tolls in the Strait of Hormuz to ensure maritime safety., Current Iran sanctions relief is limited to 60 days., Direct communication prioritized over media reporting for regional partners.