എട്ടാം വാർഷിക നിറവിൽ 'എക്സ്പോർട്ട് ബഹ്‌റൈൻ'
മനാമ: 'പുതിയ അവസരങ്ങൾ, വിശാലമായ ചക്രവാളങ്ങൾ' എന്ന പ്രമേയത്തിന് കീഴിൽ 'എക്സ്പോർട്ട് ബഹ്‌റൈൻ' തങ്ങളുടെ എട്ടാം വാർഷികം ആഘോഷിക്കുന്നു. അന്താരാഷ്ട്ര വ്യാപാര അവസരങ്ങൾ പ്രയോജനപ്പെടുത്താനും കയറ്റുമതി വിപണികൾ വൈവിധ്യവൽക്കരിക്കാനും ബഹ്‌റൈനി ബിസിനസുകളെ സഹായിക്കുന്നതിൽ സ്ഥാപനം നിർണായക പങ്കാണ് വഹിക്കുന്നത്.
ദേശീയ സ്ഥിതിവിവരക്കണക്കുകൾ പ്രകാരം, 2025-ൽ ബഹ്‌റൈനിൽ ഉൽപ്പാദിപ്പിച്ച ഉൽപ്പന്നങ്ങളുടെ കയറ്റുമതി മൂല്യം 10.96 ബില്യൺ യുഎസ് ഡോളറിലെത്തി. രാജ്യത്തിന്റെ ആകെ കയറ്റുമതിയായ 13.11 ബില്യൺ യുഎസ് ഡോളറിന്റെ 83.6 ശതമാനമാണിത്. മുൻവർഷത്തെ അപേക്ഷിച്ച് 6.7 ശതമാനം വളർച്ചയാണ് ഈ മേഖലയിൽ രേഖപ്പെടുത്തിയത്.
കഴിഞ്ഞ എട്ട് വർഷത്തിനിടെ കയറ്റുമതി രംഗത്തേക്ക് കടന്നുവരുന്ന സ്ഥാപനങ്ങൾക്കായി വിപണി വിവരങ്ങൾ, തന്ത്രപരമായ പങ്കാളിത്തങ്ങൾ, ലോജിസ്റ്റിക്‌സ് സേവനങ്ങൾ, ഇ-കൊമേഴ്‌സ് പിന്തുണ, അന്താരാഷ്ട്ര റീട്ടെയിൽ ശൃംഖലകളിലേക്കുള്ള പ്രവേശനം എന്നിവ 'എക്സ്പോർട്ട് ബഹ്‌റൈൻ' ഉറപ്പാക്കുന്നു.
ബിസിനസുകളുടെ കയറ്റുമതി സജ്ജതയും ആവശ്യങ്ങളും പരിഗണിച്ച് കൂടുതൽ പ്രത്യേക പരിപാടികൾ ആവിഷ്കരിക്കാനും നിലവിലുള്ള സേവനങ്ങളുടെ കാര്യക്ഷമത വർധിപ്പിക്കാനുമാണ് സ്ഥാപനം ലക്ഷ്യമിടുന്നത്.
ബഹ്‌റൈനിലെ കയറ്റുമതി പിന്തുണാ സംവിധാനത്തിന്റെ വികസനത്തിലും ബിസിനസുകളുടെ അന്താരാഷ്ട്ര വിപണി പ്രവേശനം സുഗമമാക്കുന്നതിലും കഴിഞ്ഞ എട്ട് വർഷം സുപ്രധാന നാഴികക്കല്ലായെന്ന് വ്യവസായ വാണിജ്യ മന്ത്രിയും 'എക്സ്പോർട്ട് ബഹ്‌റൈൻ' ചെയർമാനുമായ അബ്ദുള്ള ബിൻ അദേൽ ഫക്രോ വ്യക്തമാക്കി.
ലോജിസ്റ്റിക്കൽ, പ്രവർത്തന വെല്ലുവിളികളെ മറികടക്കാനും ആഗോള വിപണിയിൽ ബഹ്‌റൈനി ഉൽപ്പന്നങ്ങളുടെ മത്സരശേഷി ശക്തിപ്പെടുത്താനും സ്ഥാപനം പ്രതിജ്ഞാബദ്ധമാണെന്ന് 'എക്സ്പോർട്ട് ബഹ്‌റൈൻ' ആക്ടിംഗ് ചീഫ് എക്‌സിക്യൂട്ടീവ് ഓഫീസർ ഫാത്തിമ അസീസ് റോസ്തം പറഞ്ഞു.