ചരിത്രത്തിൽ ആദ്യം; പാക് തിരഞ്ഞെടുപ്പിൽ മത്സരിക്കാനൊരുങ്ങി ഹിന്ദു യുവതി

ഇസ്ലാമാബാദ്: പാകിസ്താൻ ചരിത്രത്തില്‍ ആദ്യമായി ഒരു ഹിന്ദു യുവതി തിരഞ്ഞെടുപ്പില്‍ മത്സരിക്കാന്‍ ഒരുങ്ങുന്നു. ഖെെബർ പത്തൂൺക്വയിലെ ബുനർ ജില്ലയിലെ പി.കെ-25 മണ്ഡലത്തിൽ നിന്നാണ് സവീറ പർകാശ് ജനവിധി തേടുന്നത്. 2024 ഫെബ്രുവരി 8-ാം തീയതിയാണ് പാകിസ്താനില്‍ തിരഞ്ഞെടുപ്പ്. 
‌
പാകിസ്താന്‍ പീപ്പിള്‍സ് പാര്‍ട്ടി ടിക്കറ്റിലാണ് സവീറ മത്സരിക്കുന്നത്. കഴിഞ്ഞ ആഴ്ച ഔദ്യോ​ഗികമായി ഇവര്‍ നാമനിര്‍ദേശ പത്രിക സമര്‍പ്പിച്ചിരുന്നു. കഴിഞ്ഞ 35 വർഷമായി പിപിപിയുടെ സജീവ പ്രവർത്തകനാണ് സവീറയുടെ പിതാവ് ഡോ. ഓം പർകാശ്. 2022-ൽ മെഡിസിൻ ബിരുദം പൂർത്തിയാക്കിയ സവീറ പി.പി.പി വനിതാ വിഭാ​ഗത്തിന്റെ ജനറൽ സെക്രട്ടറിയായിരുന്നു. 

'സ്ത്രീകളുടെ ഉന്നമനത്തിനായും അവരുടെ അവകാശത്തിനായി ശബ്ദമുയർത്താനുമാണ് തന്റെ ശ്രമം. അവർക്ക് സുരക്ഷിതമായ അന്തരീക്ഷം ഒരുക്കണം. സ്ത്രീകളോടുള്ള ചരിത്രപരമായ അവ​ഗണനയും അടിച്ചമർത്തലും പരിഹരിക്കും. 

മനുഷ്യനെ സേവിക്കുന്നത് തന്റെ രക്തത്തിൽ അലിഞ്ഞുചേർന്നിട്ടുള്ള കാര്യമാണ്. സർക്കാർ ആശുപത്രികളിലെ മോശം അവസ്ഥയും നിസ്സഹാസവസ്ഥയും നേരിട്ട് കണ്ടതിന് പിന്നാലെയാണ് താൻ തിരഞ്ഞെടുപ്പിൽ മത്സരിക്കാൻ തീരുമാനിച്ചത്'- സവീറ പറഞ്ഞു. 

Content Highlights: Who is Saveera Parkash, first Hindu woman to contest elections in Pakistan