ട്രംപ് പങ്കെടുത്ത അത്താഴ വിരുന്നിൽ വെടിവെപ്പ് നടത്തിയ അക്രമി അധ്യാപകനും ഗെയിം ഡെവലപ്പറും

വാഷിങ്ടൺ: വൈറ്റ് ഹൗസ് മാധ്യമപ്രവർത്തകരുടെ അസോസിയേഷൻ സംഘടിപ്പിച്ച ഡിന്നറിൽ വെടിവെപ്പ് നടത്തിയതായി സംശയിക്കുന്നയാൾ തെക്കൻ കാലിഫോർണിയയിൽ നിന്നുള്ള ഒരു അധ്യാപകനും വീഡിയോ ഗെയിം ഡെവലപ്പറുമായിരുന്നിവെന്ന് വിവരം. സംഭവത്തിൽ അറസ്റ്റിലായ കോൾ തോമസ് അലൻ എന്ന 31-കാരന്റെ സോഷ്യൽമീഡിയ അക്കൗണ്ടുകളും മറ്റും പരിശോധിച്ചതിലൂടെയാണ് ഇക്കാര്യം വ്യക്തമാകുന്നത്. ലോസ് ഏഞ്ജൽസിലെ ടോറൺസ് എന്ന സ്ഥലത്താണ് ഇയാൾ താമസിച്ചിരുന്നത്.

കോളേജ് പ്രവേശനത്തിനായി വിദ്യാർത്ഥികൾക്ക് അഡ്മിഷൻ കൗൺസിലിംഗും പരീക്ഷാ തയ്യാറെടുപ്പ് സേവനങ്ങളും നൽകുന്ന സി2 എഡ്യൂക്കേഷൻ എന്ന കമ്പനിയിൽ അദ്ദേഹം കഴിഞ്ഞ ആറ് വർഷമായി ജോലി ചെയ്യുന്നു. 2024-ൽ കമ്പനിയുടെ ഫേസ്ബുക്ക് പേജിൽ പങ്കുവെച്ച ഒരു പോസ്റ്റിൽ, അലനെ കമ്പനിയുടെ ടീച്ചർ ഓഫ് ദ മന്ത് ആയി ലിസ്റ്റ് ചെയ്തിരുന്നു.

ലിങ്ക്ഡ്ഇൻ പ്രൊഫൈൽ അനുസരിച്ച്, അലൻ 2017 ൽ കാലിഫോർണിയ ഇൻസ്റ്റിറ്റ്യൂട്ട് ഓഫ് ടെക്‌നോളജിയിൽ നിന്ന് മെക്കാനിക്കൽ എഞ്ചിനീയറിംഗിൽ ബിരുദം നേടി, കഴിഞ്ഞ വർഷം കാലിഫോർണിയ സ്റ്റേറ്റ് യൂണിവേഴ്‌സിറ്റിയിൽ നിന്ന് കമ്പ്യൂട്ടർ സയൻസിൽ ബിരുദാനന്തര ബിരുദവും നേടി.

വീൽചെയറുകൾക്കുള്ള ഒരു പ്രോട്ടോടൈപ്പ് എമർജൻസി ബ്രേക്ക് വികസിപ്പിച്ചതിന് 2017-ൽ ഒരു പ്രാദേശിക മാധ്യമത്തിൽ ഇദ്ദേഹത്തെ കുറിച്ച് വാർത്ത വന്നിട്ടുണ്ട്. ഫെഡറൽ ഇലക്ഷൻ കമ്മീഷൻ രേഖകൾ പ്രകാരം, 2024 ഒക്ടോബറിൽ അലൻ കമലാ ഹാരിസിന്റെ പ്രസിഡന്റ് സ്ഥാനത്തേക്കുള്ള പ്രചാരണത്തിന് 25 ഡോളർ സംഭാവന നൽകി. അലൻ തന്റെ ലിങ്ക്ഡ്ഇൻ പ്രൊഫൈലിൽ ഒരു വീഡിയോ ഗെയിം ഡെവലപ്പർ എന്നും വിശേഷിപ്പിച്ചിട്ടുണ്ട്.

ശനിയാഴ്ച രാത്രി പ്രസിഡന്റ് ഡോണാൾഡ് ട്രംപ് പങ്കെടുത്ത വൈറ്റ് ഹൗസ് കറസ്‌പോണ്ടന്റ്‌സ് അസോസിയേഷൻ ഡിന്നറിന് പുറത്തുള്ള ലോബിയിലേക്ക് തോക്കുകളും കത്തികളുമായി അലൻ ഇരച്ചുകയറുകയായിരുന്നു. വെടിയൊച്ച കേട്ടതോടെ ട്രംപിനെ മറ്റു ഉന്നതരേയും സീക്രട്ട് ഏജന്റുമാർ സുരക്ഷിതമായി മാറ്റി. പരിപാടി നടന്ന വേദിക്ക് 50 യാർഡ് അകലെ വെച്ച് ഇയാളെ സുരക്ഷാ ഉദ്യോഗസ്ഥർ കീഴടക്കിയതായി ട്രംപ് പിന്നീട് അറിയിച്ചു.

അത്താഴ വിരുന്ന് നടന്ന വാഷിങ്ടൺ ഹിൽട്ടൺ ഹോട്ടലിലെ അതിഥികളിലൊരാളായിരുന്നു വെടിവെപ്പ് നടത്തിയ കോൾ തോമസ് അലൻ എന്നാണ് യുഎസ് അധികൃതർ പറയുന്നത്. ഇയാളുടെ ഉദ്ദേശ്യം എന്തായിരുന്നുവെന്ന് യുഎസ് പോലീസ് സ്ഥിരീകരിച്ചിട്ടില്ല. ഒരു സീക്രട്ട് ഏജന്റിന് വെടിയേറ്റെങ്കിലും ബുള്ളറ്റ് പ്രൂഫ് ധരിച്ചതിനാൽ പരിക്കുകളില്ലെന്ന് ട്രംപ് അറിയിച്ചു.

Content Highlights: Suspect identified as 31-year-old teacher and game developer Cole Thomas Allen., Incident occurred at the White House Correspondents Association dinner.