ഛബഹാർ തുറമുഖം, എണ്ണ ഇറക്കുമതി; ഇറാൻ- യുഎസ് സമാധാന കരാറിൽ ഇന്ത്യയുടെ നേട്ടങ്ങൾ

ടെഹ്റാൻ: അമേരിക്കയും ഇറാനും തമ്മിലുള്ള സമാധാന കരാർ ഇന്ത്യയുടെ ഊർജ്ജ സുരക്ഷയിലും വ്യാപാര മേഖലയിലും വിപ്ലവകരമായ മാറ്റങ്ങൾ കൊണ്ടുവരുമെന്ന് റിപ്പോർട്ട്. ഈ കരാറിലൂടെ ഇറാനിൽ നിന്നുള്ള എണ്ണ ഇറക്കുമതി പുനരാരംഭിക്കാനും ഹോർമുസ് കടലിടുക്കിലൂടെയുള്ള ചരക്ക് നീക്കം സുഗമമാക്കാനും സാധിക്കും. പ്രധാനമായും ചബഹാർ തുറമുഖം കേന്ദ്രീകരിച്ചുള്ള ഇന്ത്യയുടെ തന്ത്രപ്രധാനമായ കണക്റ്റിവിറ്റി പദ്ധതികൾക്ക് ഇത് കരുത്ത് നൽകും.

2019-ൽ അമേരിക്കൻ ഉപരോധത്തെത്തുടർന്ന് നിർത്തിവെച്ച ഇറാനിയൻ എണ്ണ ഇറക്കുമതി പുനരാരംഭിക്കാൻ പുതിയ ധാരണാപത്രം വഴിയൊരുക്കും. ഉപരോധത്തിന് മുൻപ് ഇന്ത്യയുടെ മൊത്തം എണ്ണ ഇറക്കുമതിയുടെ 10 ശതമാനവും ഇറാനിൽ നിന്നായിരുന്നു. എണ്ണ വിൽപനയിലൂടെ ലഭിക്കുന്ന വരുമാനത്തിന്റെ 60 ശതമാനവും ഊർജ്ജ മേഖലയിൽ നിന്നായതിനാൽ കയറ്റുമതി വേഗത്തിൽ പുനരാരംഭിക്കാൻ ഇറാനും വലിയ താല്പര്യമുണ്ട്. ഇറാനിൽ നിന്നുള്ള ക്രൂഡ് ഓയിൽ എത്തുന്നതോടെ ഇന്ത്യയുടെ ഇറക്കുമതി സ്രോതസ്സുകൾ വൈവിധ്യവത്കരിക്കാനും ഊർജ്ജ സുരക്ഷ ശക്തിപ്പെടുത്താനും സാധിക്കും.

ഹോർമുസ് കടലിടുക്കിലെ സംഘർഷാവസ്ഥ ലഘൂകരിക്കുന്നത് ഇന്ത്യയിലെ പാചകവാതക വിതരണത്തെ ഗുണകരമായി ബാധിക്കും. ഇന്ത്യയുടെ എൽപിജി ഇറക്കുമതിയുടെ ഏകദേശം 90 ശതമാനവും ഈ തന്ത്രപ്രധാനമായ ജലപാതയിലൂടെയാണ് കടന്നുപോകുന്നത്. സമീപകാലത്തുണ്ടായ സംഘർഷങ്ങൾ ഗ്യാസ് വില വർദ്ധനവിനും വിതരണ തടസ്സങ്ങൾക്കും കാരണമായിരുന്നു. കടലിടുക്ക് വീണ്ടും സുരക്ഷിതമാകുന്നതോടെ വിപണിയിലെ അനിശ്ചിതത്വം നീങ്ങും.

ഇന്ത്യയുടെ തന്ത്രപ്രധാനമായ ചബഹാർ തുറമുഖ പദ്ധതിക്ക് ഈ കരാർ പുതുജീവൻ നൽകും. അഫ്ഗാനിസ്ഥാൻ, മധ്യേഷ്യ, റഷ്യ എന്നിവടങ്ങളിലേക്കുള്ള ഇന്ത്യയുടെ പ്രധാന കവാടമായ ഈ തുറമുഖം ഇന്റർനാഷണൽ നോർത്ത്-സൗത്ത് ട്രാൻസ്‌പോർട്ട് കോറിഡോറിന്റെ സുപ്രധാന ഭാഗമാണ്. 2025 ഒക്ടോബറിൽ അമേരിക്ക ഉപരോധ ഇളവുകൾ റദ്ദാക്കിയതിനെത്തുടർന്ന് ഈ പദ്ധതി കടുത്ത സമ്മർദ്ദത്തിലായിരുന്നു. യുഎസ്-ഇറാൻ ബന്ധം സാധാരണ നിലയിലാകുന്നതോടെ ചബഹാർ പദ്ധതിയിലെ നിയന്ത്രണങ്ങൾ നീങ്ങുമെന്നും ഇന്ത്യയ്ക്ക് ഈ മേഖലയിൽ വീണ്ടും സജീവമാകാൻ കഴിയുമെന്നും പ്രതീക്ഷിക്കുന്നു.

മുൻപ് പ്രതിവർഷം 17 ബില്യൺ ഡോളറിൽ അധികമായിരുന്ന ഉഭയകക്ഷി വ്യാപാരം ഈ കരാറിലൂടെ വീണ്ടും വർദ്ധിപ്പിക്കാൻ സാധിക്കുമെന്ന് ഇറാൻ അംബാസഡർ മുഹമ്മദ് ഫതാലി വ്യക്തമാക്കി. ഊർജ്ജ സുരക്ഷ, സമുദ്ര വ്യാപാരം, പ്രാദേശിക കണക്റ്റിവിറ്റി എന്നീ മൂന്ന് മേഖലകളിലും ഇന്ത്യയ്ക്ക് ഇതിന്റെ ഗുണഫലങ്ങൾ ലഭിക്കും. നിലവിൽ 40-ഓളം രാജ്യങ്ങളിൽ നിന്ന് എണ്ണ ഇറക്കുമതി ചെയ്യുന്നുണ്ടെങ്കിലും ഇറാൻ കൂടി ഈ പട്ടികയിലേക്ക് തിരിച്ചെത്തുന്നത് ഇന്ത്യയ്ക്ക് വലിയ നേട്ടമാണ്.

Content Highlights: US-Iran peace deal benefits India's energy security, crude imports, and the strategic Chabahar port project.