റഷ്യന് ഹെലികോപ്റ്റര് തകര്ന്നുവീണ് കത്തി, 5 പ്രതിരോധ മേഖലാ ഉദ്യോഗസ്ഥര്ക്ക് ദാരുണാന്ത്യം
മോസ്കോ: റഷ്യയിൽ പ്രതിരോധ മേഖലയ്ക്ക് വേണ്ടി പ്രവർത്തിക്കുന്ന ഏവിയേഷൻ കമ്പനിയിലെ മുതിർന്ന ഉദ്യോഗസ്ഥരുമായി സഞ്ചരിച്ച ഹെലികോപ്ടർ തകർന്നുവീണ് അഞ്ച് പേർ മരിച്ചു. വെള്ളിയാഴ്ച ആച്ചി-സു ഗ്രാമത്തിന് സമീപമാണ് കെഎ-226 ഹെലികോപ്റ്റർ തകർന്നുവീണത്. റഷ്യൻ മാധ്യമ റിപ്പോർട്ടുകൾ പ്രകാരം, കിസ്ലിയാറിൽ നിന്ന് ഇസ്ബെർബാഷിലേക്ക് പോവുകയായിരുന്ന ഹെലികോപ്റ്ററിന് ആകാശത്തുവെച്ച് തീപിടിക്കുകയും, തുടർന്ന് അടിയന്തരമായി നിലത്തിറക്കാൻ ജീവനക്കാർ നിർബന്ധിതരാവുകയുമായിരുന്നു.
കാസ്പിയൻ കടൽത്തീരത്ത് ഹെലികോപ്റ്റർ ഇറക്കാൻ പൈലറ്റ് ശ്രമിച്ചെങ്കിലും, ഒടുവിൽ അത് കരബുഡാഖ്കെൻ്റ് ജില്ലയിലെ ഒരു സ്വകാര്യ വസതിയുടെ മുറ്റത്ത് തകർന്നുവീഴുകയായിരുന്നുവെന്ന് ദൃക്സാക്ഷികൾ പറഞ്ഞു. അപകടത്തെ തുടർന്നുണ്ടായ തീപിടിത്തം ഏകദേശം 80 ചതുരശ്ര മീറ്റർ സ്ഥലത്തേക്ക് വ്യാപിച്ചു. പിന്നീട് അഗ്നിശമനസേനാംഗങ്ങളെത്തിയാണ് തീ അണച്ചത്. മരിച്ചവരിൽ കെഇഎംഇസഡ് (KEMZ) കമ്പനിയിലെ ഡെപ്യൂട്ടി ജനറൽ ഡയറക്ടർ, ചീഫ് എൻജിനീയർ, ചീഫ് ഡിസൈനർ, ഹെലികോപ്റ്ററിൻ്റെ ഫ്ലൈറ്റ് മെക്കാനിക്ക് എന്നിവരും ഉൾപ്പെടുന്നു.
അപകടത്തിന്റെ വീഡിയോ സാമൂഹികമാധ്യമങ്ങളിൽ പ്രത്യക്ഷപ്പെട്ടു. ദാരുണമായ ഈ അപകടം നടന്ന നിമിഷങ്ങൾ വീഡിയോയിൽ കാണാം.
ആദ്യം, കടൽത്തീരത്തിനടുത്തുള്ള മണൽപ്പരപ്പിൽ നിന്ന് പറന്നുയരാൻ ശ്രമിക്കുന്നതിനിടെ ഹെലികോപ്റ്റർ അപകടകരമായി ചരിയുന്നത് കാണാം. നിമിഷങ്ങൾക്കുശേഷം, താഴെ തിരമാലകൾ ആഞ്ഞടിക്കുമ്പോൾ, സ്ഥിരത കൈവരിക്കാൻ പാടുപെട്ട് അത് വെള്ളത്തിന് മുകളിൽ താഴ്ന്നു പറക്കുന്നു.
തകർന്നുവീഴുന്നതിന് തൊട്ടുമുമ്പ് ഹെലികോപ്റ്ററിൻ്റെ വാൽഭാഗം അടർന്നുപോയി. ആഴം കുറഞ്ഞ വെള്ളത്തിന് മുകളിലൂടെ ചെറുതായി ഉയർത്താൻ പൈലറ്റിന് കഴിഞ്ഞെങ്കിലും, ഉടൻതന്നെ നിയന്ത്രണം നഷ്ടപ്പെടുകയും വിമാനം താഴേക്ക് പതിക്കുകയും ചെയ്തു. അവസാന നിമിഷങ്ങളിൽ, ഹെലികോപ്റ്റർ ശക്തിയായി വെട്ടിത്തിരിഞ്ഞ് വെള്ളത്തിലേക്ക് കൂപ്പുകുത്തി. തുടർന്ന് വെള്ളം ശക്തിയായി മുകളിലേക്ക് ചിതറിത്തെറിക്കുന്നതും ദൃശ്യങ്ങളിൽ കാണാം.
Content Highlights: A defence aviation helicopter carrying senior officials crashed in Russia, killing five. The incident occurred near Achi-Su village