എൻജിനീയറോ റാപ്പറോ മേയറോ, ആരാണ് നേപ്പാളിലെ ജെൻ സീ തലമുറ നേതൃസ്ഥാനത്ത് കാണുന്ന ബാലേന്ദ്ര ഷാ?

കാഠ്മണ്ഡു: നാലുതവണ പ്രധാനമന്ത്രിയായിരുന്ന കെ.പി. ശർമ ഒലിയെ പിന്തള്ളി 35-കാരനായ കാഠ്മണ്ഡു മുൻ മേയർ ബാലേന്ദ്ര ഷാ നേപ്പാളിലെ പാർലമെന്റ് തിരഞ്ഞെടുപ്പിൽ മുന്നേറുകയാണ്. അഞ്ച് മാസം മുൻപ് അരങ്ങേറിയ യുവജന പ്രക്ഷോഭങ്ങളെത്തുടർന്നായിരുന്നു ശർമ ഒലിയുടെ രാജി. പ്രക്ഷോഭങ്ങളിൽ 77 പേർ മരിച്ചിരുന്നു. ഝാപ്പ-5 ൽ നിന്നാണ് ശർമ ഒലിയും ബാലേന്ദ്ര ഷായും മത്സരിക്കുന്നത്. റാപ്പർ കൂടിയായ ബാലേന്ദ്ര ബാലേൻ എന്നാണ് വിളിക്കപ്പെടുന്നത്.

ജെൻ-സീയുടെ പിന്തുണയുള്ള രാഷ്ട്രീയ സ്വാതന്ത്ര്യ പാർട്ടി (RSP) സ്ഥാനാർഥിയായാണ്‌ ബാലേൻ മത്സരിക്കുന്നത്. 2025 സെപ്റ്റംബറിലെ ജെൻ-സീയുടെ നേതൃത്വത്തിലുള്ള പ്രക്ഷോഭങ്ങൾക്ക് ശേഷം നടന്ന നേപ്പാളിലെ ആദ്യത്തെ പൊതുതിരഞ്ഞെടുപ്പാണിത്. ഈ പ്രക്ഷോഭങ്ങളെത്തുടർന്ന് ഒലിയുടെ സർക്കാർ ആഴ്ചകളോളം നീണ്ടുനിന്ന അസ്വസ്ഥതകൾക്കൊടുവിൽ രാജിവെക്കേണ്ടി വന്നിരുന്നു. വ്യാഴാഴ്ച രാത്രി വൈകിയാണ് വോട്ടെണ്ണൽ ആരംഭിച്ചത്, വെള്ളിയാഴ്ചയും തുടരുകയാണ്.

ബാലേൻ വേദിയിലെത്തുമ്പോൾ, ആരാധകർ കറുത്ത ഷർട്ടും കടുംകണ്ണടയും ധരിച്ച് അദ്ദേഹത്തെ അനുകരിക്കുന്നത് പതിവാണ്. അദ്ദേഹം വളരെ അപൂർവമായി മാത്രമേ തൻ്റെ കണ്ണട മാറ്റാറുള്ളൂ. "എന്നെ നോക്കൂ. ഞാൻ നിങ്ങളെ സ്നേഹിക്കുന്നു", എന്ന് ബാലേൻ ആരാധകരോട് ആവർത്തിച്ച് പറയാറുമുണ്ട്.

കാഠ്മണ്ഡുവിലായിരുന്നു ബാലേന്ദ്രയുടെ ജനനം. എൻജിനീയറിങ് ബിരുദപഠനത്തിനുശേഷം ഇന്ത്യയിൽ സ്ട്രക്ചറൽ എൻജിനീയറിങ്ങിൽ ബിരുദാനന്തര ബിരുദം പൂർത്തിയാക്കി. 2013-ൽ, ബാലേൻ നേപ്പാളിലെ പ്രമുഖ റാപ്പ് യുദ്ധവേദിയായ റോ ബാർസിൽ തൻ്റെ വ്യക്തിമുദ്ര പതിപ്പിച്ചു, വിജയിയായി. അദ്ദേഹത്തിൻ്റെ വരികൾ മൂർച്ചയുള്ളതും വിട്ടുവീഴ്ചയില്ലാത്തതുമായിരുന്നു, അഴിമതി, രാഷ്ട്രീയ സ്തംഭനാവസ്ഥ, അധികാര കേന്ദ്രീകരണം എന്നിവയെ വിമർശിച്ചു. ഒരു റാപ്പറിനപ്പുറം ഒരു കവിയാണെന്നും അടിച്ചമർത്തപ്പെട്ടവർക്ക് വേണ്ടി സംസാരിക്കുന്ന വ്യക്തിയാണെന്നും ബാലേൻ പ്രശംസിക്കപ്പെട്ടു. 

2022-ൽ മേയർ സ്ഥാനത്തേക്ക് സ്വതന്ത്രനായി മത്സരിച്ച ബാലേൻ, 61,767 വോട്ടുകൾ നേടി വിജയിച്ചു, പ്രമുഖ പാർട്ടികളിലെ എതിരാളികളെ പരാജയപ്പെടുത്തിയായിരുന്നു വിജയം. ബാലേൻ്റെ സംഗീതം രാജ്യാതിർത്തിക്കപ്പുറത്തേക്ക് വ്യാപിച്ചു. ഒലിയുടെ രാജിയ്ക്ക് ശേഷം യുവജന പ്രക്ഷോഭകർ നേതൃത്വത്തെക്കുറിച്ച് ചർച്ച ചെയ്തപ്പോൾ ഒരു ഡിസ്കോർഡ് ഫോറത്തിൽ അദ്ദേഹത്തിൻ്റെ പേര് 16,000 ത്തിൽ കൂടുതൽ തവണ പ്രത്യക്ഷപ്പെട്ടു. ഇത് അദ്ദേഹത്തെ ഏറ്റവും കൂടുതൽ ചർച്ച ചെയ്യപ്പെട്ട വ്യക്തിയാക്കി.

നിരവധി ജെൻ സീ-സെഡ് പ്രവർത്തകർ അദ്ദേഹത്തെ തങ്ങളുടെ ഇഷ്ടപ്പെട്ട നേതാവായി കണ്ടു, എന്നിരുന്നാലും അദ്ദേഹം അത് നിരസിച്ച് മുൻ സുപ്രീം കോടതി ചീഫ് ജസ്റ്റിസ് സുശീല കാർക്കിയെ പരസ്യമായി പിന്തുണച്ചു. തിരഞ്ഞെടുപ്പ് നിരീക്ഷിക്കാൻ മുൻ ചീഫ് ജസ്റ്റിസ് സുശീല കാർക്കിയുടെ ഇടക്കാല സർക്കാർ രൂപവത്കരിക്കുന്നതിനും ബലേൻ സഹായിച്ചു. ബാലേൻ പ്രധാനമായും ഓൺലൈനിലൂടെയാണ് തൻ്റെ ആരാധകവൃന്ദത്തെ കെട്ടിപ്പടുത്തത്, സാമൂഹിക മാധ്യമ പ്ലാറ്റ്‌ഫോമുകളിലുടനീളം ലക്ഷക്കണക്കിന് അനുയായികളെ നേടി.

2025 സെപ്റ്റംബറിലെ പ്രക്ഷോഭങ്ങൾ നേപ്പാളിൻ്റെ രാഷ്ട്രീയ ഭൂപ്രകൃതിയെ മാറ്റിമറിച്ചു. തൊഴിലില്ലായ്മ, അഴിമതി, അനീതി എന്നിവ കാരണം യുവ നേപ്പാളികൾ തെരുവിലിറങ്ങി, ഇത് ഒലിയുടെ രാജിക്ക് കാരണമായി. ബാലേൻ ഔദ്യോഗികമായി പ്രക്ഷോഭങ്ങൾക്ക് നേതൃത്വം നൽകിയില്ലെങ്കിലും, അവരുമായി അടുത്ത് ബന്ധപ്പെട്ടിരുന്നു. യുവജനങ്ങളുടെ അപ്രഖ്യാപിത നേതാവായിരുന്നു അദ്ദേഹം.

Content Highlights: 35-year-old rapper Balen Shah is leading the parliamentary election against former PM K.P. Sharma Oli., He represents the Rastriya Swatantra Party (RSP), which has strong support from Gen-Z voters., Shah previously won the Kathmandu mayoral election in 2022 as an independent candidate., His rise is connected to youth-led protests against corruption that led to Oli's government resigning.