സിന്ധു നദീജല കരാർ: പാകിസ്താൻ യുദ്ധത്തിന് തയ്യാർ; ഭീഷണിയുമായി ഖ്വാജ ആസിഫ്
ഇസ്ലാമാബാദ്: സിന്ധു നദീജല വ്യവസ്ഥയിലെ ഇന്ത്യയുടെ നീക്കങ്ങൾ പാകിസ്താന്റെ ജലസുരക്ഷയ്ക്ക് ഭീഷണിയാണെന്ന് ബോധ്യപ്പെട്ടാൽ സൈനിക നടപടി സ്വീകരിക്കുമെന്ന് മുന്നറിയിപ്പ് നൽകി പാകിസ്താൻ പ്രതിരോധ മന്ത്രി ഖ്വാജ ആസിഫ്. നിലവിൽ നിർത്തിവെച്ചിരിക്കുന്ന സിന്ധു നദീജല കരാറിനെച്ചൊല്ലിയുള്ള തർക്കം രൂക്ഷമാകുന്നതിനിടെയാണ് പാക് മന്ത്രിയുടെ പ്രസ്താവന.
2028 ജൂണോടെ പാകിസ്താനിലേക്കുള്ള സിന്ധു നദിയുടെ ഒഴുക്ക്‌ പൂർണ്ണമായും തടയാനാകുമെന്ന് ഇന്ത്യയുടെ ജലശക്തി മന്ത്രി സി.ആർ. പാട്ടീൽ സൂചിപ്പിക്കുന്ന വീഡിയോ ക്ലിപ്പ് പുറത്തുവന്നതിന് പിന്നാലെയാണ് ഖ്വാജ ആസിഫിന്റെ പ്രതികരണം. ഇന്ത്യ ജലലഭ്യത തടസ്സപ്പെടുത്തിയാൽ യുദ്ധം ചെയ്യുമെന്നാണ്‌ അദ്ദേഹത്തിന്റെ മുന്നറിയിപ്പ്.
നിലവിൽ കടുത്ത ജലക്ഷാമമാണ് പാകിസ്താൻ നേരിടുന്നത്. ജലം ഒരു പ്രധാന ദേശീയ സുരക്ഷാ വിഷയമാണെന്ന് വിശേഷിപ്പിച്ച ആസിഫ്, സിന്ധു നദീതടത്തിലെ ജലലഭ്യതയ്ക്ക് ഗുരുതരമായ ഭീഷണിയുണ്ടെന്ന് തോന്നിയാൽ രൂക്ഷമായി പ്രതികരിക്കാൻ മടിക്കില്ലെന്ന് പറഞ്ഞു.
'ജലം ഞങ്ങളുടെ ദേശീയ സുരക്ഷയുടെ ഭാഗമാണ്. ഭീഷണി നേരിടുന്നുവെന്ന് തോന്നുന്ന നിമിഷം, ഞങ്ങൾ ഇന്ത്യക്കെതിരെ യുദ്ധം ആരംഭിക്കും. അത് തീർച്ചയാണ്.' അദ്ദേഹം പറഞ്ഞു. ജലം പങ്കിടുന്ന വ്യവസ്ഥകളിൽ മാറ്റം വരുത്താനോ നിയന്ത്രിക്കാനോ ഇന്ത്യ നീങ്ങുന്നുവെന്ന് സൂചന ലഭിച്ചാൽ ഉടൻ നടപടിയെടുക്കുമെന്ന് അദ്ദേഹം സൂചിപ്പിച്ചു.
2025 ഏപ്രിലിൽ ജമ്മു കശ്മീരിലെ പഹൽഗാമിലുണ്ടായ ഭീകരാക്രമണത്തിന് പിന്നാലെയാണ് ഇന്ത്യ 1960-ലെ സിന്ധു നദീജല കരാർ നിർത്തിവെച്ചത്. 26 പേർ കൊല്ലപ്പെട്ട ഈ ആക്രമണത്തിന് പിന്നാലെ ഉണ്ടായ സംഘർഷാവസ്ഥ ഇപ്പോഴും തുടരുകയാണ്. ആക്രമണത്തിന് പിന്നിൽ പാകിസ്താന്റെ പിന്തുണയുള്ള ഭീകരരാണെന്ന് ഇന്ത്യ കുറ്റപ്പെടുത്തിയിരുന്നു.
അതിർത്തി കടന്നുള്ള ഭീകരവാദത്തിനെതിരെ പാകിസ്താൻ വിശ്വസനീയവും മാറ്റമില്ലാത്തതുമായ നടപടി സ്വീകരിക്കുന്നതുവരെ ലോകബാങ്ക് മധ്യസ്ഥത വഹിച്ച ഈ കരാർ മരവിപ്പിക്കാനാണ് ഇന്ത്യ തീരുമാനിച്ചത്. സിന്ധു നദീജല വ്യവസ്ഥയിലെ ജലം പങ്കിടുന്നത് നിയന്ത്രിക്കുന്ന ഈ കരാർ അനുസരിച്ച്, നദീതടത്തിലെ ഏകദേശം 80 ശതമാനം ജലവും പാകിസ്താനാണ് ലഭിക്കുന്നത്.
ഇത് പാകിസ്താന്റെ കൃഷി, ജലസേചനം, വിപുലമായ സമ്പദ് വ്യവസ്ഥ എന്നിവയ്ക്ക് നിർണായകമാണ്. ജലമൊഴുക്കിൽ ഉണ്ടാകുന്ന ഏതൊരു തടസ്സവും നദീവ്യവസ്ഥയെ ആശ്രയിക്കുന്ന ദശലക്ഷക്കണക്കിന് ആളുകളെ ദോഷകരമായി ബാധിക്കുമെന്ന് ചൂണ്ടിക്കാട്ടി പാകിസ്താൻ ഇന്ത്യയുടെ തീരുമാനത്തെ ആവർത്തിച്ച് എതിർത്തിട്ടുണ്ട്.
ഇന്ത്യ കരാർ ലംഘനങ്ങൾ നടത്തിയെന്ന് ആരോപിച്ച്‌ പാക് ഉപപ്രധാനമന്ത്രി ഇഷാഖ് ദർ കഴിഞ്ഞയാഴ്ച്ച ഐക്യരാഷ്ട്രസഭ രക്ഷാസമിതിയുടെ ഇടപെടൽ തേടിയിരുന്നു. ചെനാബ് നദിയിൽനിന്ന് വെള്ളം തിരിച്ചുവിടാൻ ഇന്ത്യ നദി സംയോജന പദ്ധതി ലക്ഷ്യമിടുന്നുണ്ടെന്ന് ഈ മാസം ആദ്യം അവർ ആരോപിച്ചു. ഇത് സിന്ധു നദീജല കരാറിന്റെയും മറ്റ് അന്താരാഷ്ട്ര ബാധ്യതകളുടെയും ലംഘനമാണെന്ന് പാകിസ്താൻ ആരോപിക്കുന്നു.
പാകിസ്താൻ വർദ്ധിച്ചുവരുന്ന ജലക്ഷാമവും കാലാവസ്ഥാ വ്യതിയാനവും മൂലമുള്ള വെല്ലുവിളികൾ നേരിടുന്ന സാഹചര്യത്തിൽ, ആണവായുധങ്ങളുള്ള ഇരുഅയൽരാജ്യങ്ങൾക്കുമിടയിൽ സിന്ധു നദീജല തർക്കം മറ്റൊരു വലിയ സംഘർഷ വിഷയമായി മാറുകയാണെന്നാണ് വിലയിരുത്തൽ.
Content Highlights: Khawaja Asif threatens military action over water security concerns. Tensions rise following India's suspension of the 1960 Indus Waters Treaty after the 2025 Pahalgam attack. India's Jal Shakti Minister signals potential flow restrictions by 2028. Pakistan seeks UN Security Council intervention regarding alleged treaty violations.